«Situacyja značna bolš surjoznaja». Chakiery ŭ Litvie skrali kala 600 tysiač zapisaŭ, u tym liku litoŭskich raźviedčykaŭ
Vyciek danych z Centra rehistraŭ Litvy naŭprost pahražaje nacyjanalnaj biaśpiecy krainy, pakolki zakranaje supracoŭnikaŭ śpiecsłužbaŭ, zajaviŭ lidar litoŭskich kansiervataraŭ Łaŭrynas Kaščunas. Palityk padazraje, što za hetym staić maštabnaja raźviedvalnaja apieracyja RF.
Hienieralnaja prakuratura Litvy zaraz rasśleduje kražu kala 600 tysiač zapisaŭ. Pavodle źviestak viedamstva, niezakonnyja padklučeńni da sistemy adbyvalisia z-za miažy.
«Praź niedachop infarmacyi ŭ hramadskaj prastory mahło skłaścisia ŭražańnie, što heta maštabnaje kibierzłačynstva, ale napraŭdu situacyja značna bolš surjoznaja i niasie pahrozu nacyjanalnaj biaśpiecy Litvy — padazrajecca, što heta vyviedvalnaja apieracyja Rasiejskaj Fiederacyi», — napisaŭ palityk u Facebook.
«Padčas jaje, mahčyma, byli skradzienyja źviestki dziaržaŭnych rejestraŭ ab słužbovych asobach litoŭskaj vyviedki, aficerach, asobnych palitykach i dziaržsłužačych, a taksama inšych fizičnych i jurydyčnych asobach», — dadaŭ jon.
Miž tym, adrasy damoŭ, siadzib i inšaj nieruchomaści raźviedčykaŭ, aficeraŭ, dypłamataŭ abo palitykaŭ ličacca kanfidencyjnaj infarmacyjaj, pakolki mohuć stvaryć umovy dla sačeńnia, cisku ci navat pahrozy fizičnaj biaśpieki.
«Majučy dakładny adras, možna adsočvać rasparadak dnia čałavieka — kali jon sychodzić abo viartajecca dadomu, chto jaho naviedvaje, jakija jaho zvyčki abo maršruty pieramiaščeńnia. Taksama moža vieścisia fizičnaje nazirańnie pobač ź miescam žycharstva dla vyjaŭleńnia sietki kantaktaŭ, uraźlivych miescaŭ abo, u niekatorych vypadkach, dla ŭstanoŭki techničnych srodkaŭ nazirańnia, takich jak kamiery abo abstalavańnie dla pierachopu sihnałaŭ», — adznačyŭ kiraŭnik partyi «Sajuz Ajčyny — litoŭskija chryścijanskija demakraty».
Akramia taho, na asnovie dadzienych rejestraŭ, infarmacyi pra siamju, nieruchomaści, škołach abo sacyjalnych suviaziach možna skłaści padrabiaznyja profili asoby.
«U niekatorych vypadkach adrasy vykarystoŭvajucca dla viarboŭki abo cisku — z metaj vyjaŭleńnia finansavych ciažkaściaŭ, uraźlivych miescaŭ siamji abo asabistych zvyčak, a taksama dla ŭskosnaha dostupu da čałavieka praz susiedziaŭ, pastaŭščykoŭ pasłuh abo znajomych», — skazaŭ Kaščunas.
Prakuratura nie nazyvaje ni krainu, ź jakoj było arhanizavana padklučeńnie, ni ŭstanovy, čyje ŭlikovyja zapisy byli vykarystanyja. Kiraŭnik Centra rehistraŭ taksama zajaviŭ, što nie moža raskryć hetuju infarmacyju, piša LRT.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju12
Kamientary