Dziaŭčynie zacisnuła palcy ruki na vychadzie ź mietro

«Siońnia na vychadzie sa stancyi mietro «Uschod» mnie prycisnuła palcy susiednimi dźviaryma. Pajšła kroŭ, ad vyhladu jakoj ja pačała hublać prytomnaść prama ŭ pierachodzie», — padzialiłasia dziaŭčyna historyjaj u sacsietcy, jakuju pračytali bolš za 70 tysiač karystalnikaŭ.

— I vialiki dziakuj usim nieabyjakavym, chto akazaŭ mnie dapamohu: niechta kupiŭ vady, niechta apracoŭvaŭ mnie ruku i vyciraŭ kroŭ, rabotniki mietro vyklikali chutkuju.

Asobnaja padziaka była adrasavana dziaŭčynie, u jakoj z saboj akazaŭsia fłakončyk našatyrnaha śpirtu. Jana zastavałasia z paciarpiełaj da pryjezdu chutkaj.

U kamientaryjach dziaŭčynie žadali chutčejšaha vyzdaraŭleńnia i dzialilisia svaimi historyjami dapamohi ŭ hramadskim transparcie.

«Tak, rabotniki mietro ŭ nas załatyja! Pastajanna mianie supravadžajuć — strata prytomnaści byvaje ź dziacinstva».

«Sa spačuvańniem vam. U Minsku ž zvyčajna ŭsie prytrymlivajuć dźviery adzin adnamu, bo ich z-za skraźniaku mocna kidaje», — napisaŭ karystalnik, jakomu paciarpiełaja adkazała, što zaŭsiody tak robić, ale vykazała zdahadku, što ŭ hety raz «inšy čałaviek nie spraviŭsia z kiravańniem».

«Mnie niejak stała drenna na «Jubilejnaj». Paprasiła ŭ dziaŭčyny našatyr. U vyniku adna paiła mianie vadoj, druhaja davała vatku z našatyram, uhavaryli vyklikać chutkuju. Da jaje pryjezdu zaviali ŭ pakoj milicyi, pakłali na łaŭku. I vielmi aściarožna pieradali ŭ ruki chutkaj.

«Kali ja padarožničała na ciahniku pa Hiermanii, adna pažyłaja žančyna vychodziła i ŭpała — i ŭsie prosta prachodzili (kali što, ja nie viedaju niamieckaj, anhlijskaja na bazavym uzroŭni). Ja dapamahła čym mahła. Viadoma, usie byli ŭ šoku, kali ja adkryła čamadan i dastała aptečku (zvyčka biełarusa, tak by mović). Tak voś, što zrabiła palicyja: spytała ŭ hetaj žančyny, ci nie ja jaje pabiła. Rada, što ŭ Biełarusi ŭsio nie tak».

U Minskim mietrapalitenie paćvierdzili fakt incydentu i paviedamili, što supracoŭniki dziejničali ŭ miežach paŭnamoctvaŭ i vyklikali miedycynskuju dapamohu.

— Adrazu byli abśledavanyja dźviery mietro i składzieny adpaviedny pratakoł. Dźviery i ich miechanizmy całkam spraŭnyja. Ustanoŭlena, što pasažyrka pakłała kiść ruki na tarec dźviarej, a ŭ hety momant małady čałaviek, jaki vychodziŭ z susiednich dźviarej, adkryŭ ich da kanca, što i pryviało da traŭmy, — patłumačyli śpiecyjalisty.

Darečy, na sajcie pradpryjemstva źmieščana adno z praviłaŭ biaśpieki: «Budźcie ŭvažlivyja, prachodziačy praź dźviery typu «MIETRO». Prytrymlivajcie, kali łaska, dźviery, jakija začyniajucca, kab nie traŭmavać pasažyra, jaki idzie zzadu vas. Taksama varta ŭličvać, što pasažyr napieradzie moža nie ŭtrymać dźviery, i vy možacie być traŭmavanyja imi. Nie dapuskajcie trapleńnia palcaŭ ruk u ščyliny ŭ dźviarach».

• 1
• 0
• 0
• 1
• 1
• 2
• 0
• 0