«Dzieci pili toj samy napoj». Baćki ź inšych haradoŭ pra atručeńnie daškolnikaŭ u Barysavie

Śledčy kamitet zavioŭ kryminalnuju spravu pa fakcie masavaha atručeńnia dziaciej pavodle č. 1 art. 336 («Parušeńnie sanitarnych normaŭ i praviłaŭ, hihijeničnych narmatyvaŭ, što pa nieaściarožnaści paciahnuła zachvorvańnie abo atručvańnie ludziej»). Akramia taho, u Śledčym kamitecie paviedamili jašče pra 13 paciarpiełych u roznych nasielenych punktach Minskaj vobłaści. Rasśledavańnie praciahvajecca.

Va UUS Minskaha abłvykankama zajavili, što supracoŭniki padraździaleńniaŭ pa baraćbie z ekanamičnymi złačynstvami razam sa śledčymi vyśviatlajuć usie abstaviny zdareńnia. Realizacyja pradukcyi, jakaja mahła stać krynicaj incydentu, prypyniena va ŭsich rehijonach krainy.

Bolšaść dziaciej užo vypisana z balnicy i pieraviedziena na ambułatornaje lačeńnie.

Z žurnalistami Onliner.by źviazaŭsia Alaksandr — mužčyna, jaki ź siamjoj žyvie ŭ Minskim rajonie. Padzieja, jakaja adbyłasia ŭ Barysavie, raspavioŭ jon, vielmi padobnaja na toje, što zdaryłasia ŭ dziciačym sadku, kudy chodzić jaho dzicia.

— U aŭtorak maja dačka spakojna pajšła ŭ sadok. A piataj hadzinie jaje zabrali, a prykładna a šostaj — pačatku siomaj jaje pačało vanitavać. Za viečar heta paŭtaryłasia 20 razoŭ. U 21:30 ja pryjechaŭ z raboty, na mašynie my pajechali ŭ balnicu. Žonka ŭziała z saboj tazik — dačku vanitavała navat u darozie.

Kali my pryjechali ŭ balnicu, u pryjomnym pakoi skazali, što ź Minskaha rajona my nie pieršyja. Susiedzi pisali ŭ ahulnych čatach, što ŭ ichniaha syna, jaki chodzić u staršuju hrupu, pačałosia toje ž samaje. Prosta žachliva, my pieražyli žudasnuju situacyju.

Ciapier dziaŭčynka razam z mamaj znachodzicca ŭ balnicy, joj spatrebilisia kropielnicy. Dyjahnaz, pa słovach baćki, źviazany z atručeńniem. Pry hetym mužčyna padkreślivaje, što havorka nie pra adzinočny vypadak: u adnoj pałacie ź jaho blizkimi znachodziacca dzieci z taho ž sadka i navat hrupy. Alaksandru viadoma pra čatyroch špitalizavanych dziaciej i jašče troch, chto lečycca doma.

Pa infarmacyi Alaksandra, u baćkoŭskim čacie ŭ jakaści mahčymaj pryčyny niedamahańnia dziaciej nazyvajuć peŭny kisłamałočny napoj. Žurnalisty źviazalisia z zahadčycaj dziciačaha sadka, adnak tam ad kamientaroŭ admovilisia.

Tym časam padobnymi historyjami dzielacca baćki ŭ sacyjalnych sietkach. U mnohich paviedamleńniach aŭtary pišuć, što ichnija dzieci pili toj samy napoj, pra jaki raspavioŭ Alaksandr.

Pavialičyć

U čaćvier z žurnalistami źviazalisia niekalki maci i padzialilisia tym, što zdaryłasia ź ich dziećmi. Dzicia Aleny maje 4,5 hoda, siamja žyvie ŭ Salihorsku.

— Ja mama adnaho ź dziaciej, jakoje 02.06.2026 źviartałasia za dapamohaj u pryjomny pakoj dziciačaj balnicy Salihorska ŭ suviazi z vanitami. Jany pačalisia a 19:00, praź dźvie hadziny paśla taho, jak ja zabrała dzicia sa sadka.

A 21:00 pryjechali ŭ pryjomny pakoj, tam užo była čarha dziaciej daškolnaha ŭzrostu. Pakul čakali ŭ čarzie, usich vanitavała. My čakali doktara dakładna 1,5 hadziny.

Da daktaroŭ pytańniaŭ niama, dziaciej było šmat, tamu pryjšłosia čakać. Pry nas dziaciej kłali ŭ infiekcyjnaje adździaleńnie, nam taksama rekamiendavali, ale ja napisała admovu. U mieniu na padviačorak byŭ [napoj] — dzicia kaža, što pili jaho ŭ toj dzień (ja pytałasia i ŭ dzień, kali stała drenna, i na nastupny dzień pierapytvała), — raspaviała žančyna.

Jašče adna maci taksama z Salihorska — jaje dzicia maje piać hadoŭ, jano naviedvaje adzin z sadkoŭ horada.

— [Napoj] u toj dzień davali ŭsim dzieciam u dziciačych sadkach. U majho dziciaci 2 červienia było vanitavańnie. Źviarnulisia ŭ pryjomny pakoj. Tam znachodziłasia 12 dziaciej, 7 ź ich adrazu špitalizavali ź simptomami atručeńnia. My napisali admovu ad špitalizacyi. Za noč stan palepšyŭsia, učora jašče było doma, siońnia pajšło ŭ sadok.

U čatach Salihorska vialikaja kolkaść maci pisała pra vanitavańnie ŭ dziaciej. Kažuć, što atrucilisia [napojem], — napisała saliharčanka.

Pavialičyć

Kaciaryna — šmatdzietnaja maci. Siamja žyvie ŭ Lubanskim rajonie.

— Situacyja takaja: my zabrali traich dziaciej z sadka, viarnulisia dadomu prykładna a 17:30. Adrazu ž vyrvała syna — ja padumała, što heta mahło zdarycca z-za skačkoŭ na batucie, potym pačało vanitavać dačku, a paśla — abodvuch razam. Z šostaj da vośmaj viečara ja dumała, što, moža, im palahčeje, davała leki — ale heta nie dapamahała. Adzinaje, što pryjšło ŭ hałavu, — pajechać u pryjomny pakoj. Pakul čakali, mašyny chutkaj dapamohi pryjazdžali adna za adnoj: adno dzicia pieradavali daktaram, a im užo telefanavali z paviedamleńniami pra inšych dziaciej z takimi ž simptomami — hety napłyŭ praciahvaŭsia da apoŭnačy. Potym baćki ŭžo sami pryvozili dziaciej — u toj viečar ich pastupiła vielmi šmat.

Mnie kazali pra virus, ale ž u toj dzień maje dzieci kantaktavali ź inšymi — tady i jany pavinny byli b zarazicca. Adnak takich simptomaŭ u ich niama. Da taho ž ja viedaju, što takoje ratavirus, — nieadnarazova ź im sutykałasia. Jak minimum pavinna być tempieratura, a tut było tolki vanitavańnie — nastolki mocnaje, što syn apošni raz navat źbialeŭ.

Ale samaje cikavaje toje, što ŭžo ranicaj simptomaŭ nie było, dzieci byli całkam zdarovyja. Ja napisała ŭ baćkoŭski čat — u dźviuch hrupach u dziaciej nazirałasia toje samaje. Mnie adkazali jak minimum try maci. Siońnia [u čaćvier] nas užo vypisali.

Zahadčyca sadka skazała, što pryčynaj staŭ [napoj], bo ničoha inšaha być nie moža. Ja paviedamiła pra heta ŭ sanitarnuju słužbu, ale tam adkazali, što hetaja infarmacyja pakul nie paćvierdžana.

Žurnalisty źviazalisia z vytvorcam nazvanaha napoju i paprasili prakamientavać situacyju. Adnak apieratyŭna atrymać adkaz nie ŭdałosia.

Tym časam u Śledčym kamitecie paćvierdzili: na hety momant havorka idzie tolki pra vypadki ŭ Minskaj vobłaści. Pa fakcie zdareńnia ŭžo zaviedziena kryminalnaja sprava.

— Kryminalnaja sprava daje bolš mahčymaściej dla ŭstanaŭleńnia ŭsich abstavin zdareńnia, u tym liku dla praviadzieńnia śledčych dziejańniaŭ. Jana zaviedziena z toj pryčyny, što śledčymi sapraŭdy vyjaŭleny parušeńni, jakija pryviali da hetych nastupstvaŭ.

U čaćvier udzień milicyja Minskaj vobłaści paviedamlała pra prypynieńnie pa ŭsioj krainie realizacyi pradukcyi, jakaja mahła stać pieršakrynicaj situacyi. Adnak kankretny vytvorca abo brend u aficyjnych krynicach nie ŭzhadvalisia.

• 0
• 0
• 0
• 0
• 2
• 0
• 2
• 0