«Pavisła na hetych žalaziakach». Minčancy turnikietam złamała nahu ŭ mietro
U kancy krasavika minčanka Alena złamała nahu ŭ mietro i nadoŭha vypała sa zvykłaha rytmu žyćcia. Mietrapaliten admaŭlaje ŭ kampiensacyi.
«Mama spuściłasia na stancyju «Malinaŭka», prykłała prajazny da validatara, i kali zaharełasia zialonaja strełka, pačała prachodzić. U hety momant stvorki turnikieta rezka ŭdaryli jaje pa nazie», — napisaŭ u Onliner.by Andrej, syn paciarpiełaj. — «U vyniku — pierałom vialikaj kostki nahi ŭ dvuch miescach».
Paśla incydentu žančyna źviarnułasia da kiraŭnictva mietrapalitena z prośbaj pravieści pravierku i vypłacić strachoŭku.
«Praź niekatory čas pryjšoŭ aficyjny adkaz: maŭlaŭ, mama sama vinavataja, a vypadak nie źjaŭlajecca strachavym», — kaža Andrej.
«Adčuła rezki bol — i nie mahła stajać na nahach»
Alena Ivanaŭna ličyć tydni da taho momantu, kali joj zdymuć hips z nahi. Pavodle prahnozu daktaroŭ, nasić jaho pryjdziecca vosiem tydniaŭ, zaraz idzie tolki piaty.
— Toj ranicaj ja źbirałasia jechać da śviekryvi. Joj 93 hady, i my ź inšaj niaviestkaj dziažurym pa čarzie: tydzień jana, tydzień ja. U aŭtorak, 28 krasavika, prykładna a 08:10 ja spuściłasia ŭ padziemny pierachod stancyi «Malinaŭka» z boku skryžavańnia vulicy Jasienina i praśpiekta Dziaržynskaha, — apisvaje minčanka. — U mianie byŭ prajazny na ŭsie vidy transpartu, uklučajučy mietro. Ja padyšła da pieršaha turnikieta, prykłała kartku i paśla karotkaha hukavoha sihnału i zialonaj «ptušački» zrabiła krok napierad (padkreślim, što ŭ pradpryjemstva inšaja viersija: apłata nibyta nie była zafiksavana). U hety momant, pa słovach hieraini, achoŭnyja ramki niečakana ścisnulisia i ŭdaryli jaje pa nahach.
— Usio adbyłosia imhnienna: ja adčuła rezki bol, nie mahła stajać i prosta pavisła na hetych «žalaziakach». Da mianie adrazu padbiehli supracoŭniki mietro — dvoje maładych chłopcaŭ, — padniali i pasadzili na kresła. Jany spytali prajazny, bo dumali, što dakumient praterminavany.
Ale jon byŭ dziejny da 2 maja ŭklučna, u mianie navat byŭ ček, — uspaminaje Alena Ivanaŭna. — Potym ja čuła, jak adzin z supracoŭnikaŭ kudyści telefanavaŭ, kazaŭ: «Praviercie liniju» i nazvaŭ, vidać, numar aparata.
Dalej padyšła dziaŭčyna, taksama supracoŭnica mietro, i paprasiła napisać zajavu, što ja «nie maju pretenzij». Ale ja admoviłasia. Pakolki bol u nazie ŭzmacniŭsia, vyklikali chutkuju. Da mašyny jaje nieśli ŭžo na nasiłkach. U balnicy zrabili KT: dyjahnastavali pierałom abodvuch myščałkaŭ halonkavaj kostki nohi.
— Mnie nakłali łanhietu ad ściahna da stapy. Voś siadžu i čakaju. U kancy červienia zrobiać kantrolnaje KT, i budzie bačna, ci možna chacia b stupać na nahu. Uvohule, ulipła tak ŭlipła! Ciapier mahu pierasoŭvacca tolki z dapamohaj mylicaŭ abo kresła. Daktary papiaredzili, što ŭ maim uzroście (66 hadoŭ) adnaŭleńnie zojmie šmat času.
Pa słovach Aleny Ivanaŭny, jana šmat hadoŭ karystajecca padziemkaj i nikoli nie sutykałasia z takimi prablemami.
— Ščyra kažučy, ciapier budu bajacca chadzić praz hetyja turnikiety. Budu prachodzić tolki tam, dzie dziažuryć supracoŭnik. Da hetaha vypadku i padumać nie mahła, što hetyja žaleznyja stvorki mohuć tak surjozna traŭmavać. Śviekryvi 93 hady, jaje treba dahladać, a ja sama lažu…
Mietrapaliten: «Apłata prajezdu nie zafiksavana»
Paśla incydentu paciarpiełaja napisała zvarot da kiraŭnictva Minskaha mietrapalitena z prośbaj pravieści pravierku pa fakcie zdareńnia. Taksama jana prasiła vypłacić strachoŭku i pradastavić videazapis z kamier nazirańnia za 28 krasavika — z momantu ŭvachodu ŭ viestybiul i da transpartavańnia ŭ mašynu chutkaj dapamohi.
Nahadajem, što ŭ Biełarusi dziejničaje abaviazkovaje strachavańnie hramadzianskaj adkaznaści pieravozčyka pierad pasažyrami. Paciarpieły ŭ padziemcy čałaviek moža raźličvać na kampiensacyju, ale pry šerahu ŭmoŭ. Pa-pieršaje, traŭma pavinna być atrymanaja niepasredna ŭ pracesie pieravozki (u vahonie, na eskałatary pry zachavańni pravił ci na płatformie). Pa-druhoje, incydent nie pavinien być vynikam hrubaj nieaściarožnaści abo parušeńnia pravił karystańnia mietro samim pasažyram (naprykład, sproba praskočyć «zajcam»). I, kaniešnie, paškodžańni pavinny być zafiksavany miedykami.
Adnak u vypłacie strachoŭki minčancy admovili. Heta vynikała z adkazu pradpryjemstva, atrymanaha joj u kancy maja.
U dakumiencie havaryłasia, što pa fakcie nadzvyčajnaha zdareńnia praviali słužbovaje rasśledavańnie: pravieryli turnikiet, vyvučyli archiŭ sistemy videanazirańnia i bazu danych kantrolu apłaty prajezdu za 28 krasavika. U mietrapalitenie śćviardžajuć, što turnikiet (aŭtamatyčny kantrolny punkt — AKP) byŭ całkam spraŭny, a traŭma atrymana nie pa vinie pieravozčyka.
«Pa vynikach analizu materyjałaŭ archiva sistemy videanazirańnia ŭstanoŭlena, što ŭ 08:12 vy zajšli ŭ viestybiul №1 stancyi «Malinaŭka», prajšli da AKP, prykłali da validatara prajazny dakumient i, nie pierakanaŭšysia ŭ najaŭnaści na piaredniaj paneli dazvalalnaha sihnału ŭ vyhladzie zialonaj strełki, zajšli ŭ AKP №0642, dzie adbyłosia zakryćcio stvorak», — havorycca ŭ adkazie.
Taksama ŭ dakumiencie paznačana, što, zhodna z bazaj danych kantrolu apłaty prajezdu, u toj pramiežak času «apłata prajezdu z vykarystańniem bieskantaktavaj smart-karty nie była zafiksavana».
U dadzienym vypadku, tłumačyć pieravozčyk, turnikiet adpracavaŭ u adpaviednaści sa svaim funkcyjanalnym ałharytmam: pry sprobie pasažyra prajści pry ŭklučanym čyrvonym sihnale stvorki začyniajucca.
Dalej pradpryjemstva rastłumačyła, čamu Alena Ivanaŭna nie moža raźličvać na kampiensacyju. Kali pierakłaści ź jurydyčnaj movy na prostuju: u momant atrymańnia traŭmy, pakolki apłata prajezdu nie była zafiksavana, žančyna aficyjna nie ličyłasia pasažyram.
«Pasažyr — fizičnaja asoba, jakaja ŭ adpaviednaści z damovaj pieravozki ažyćciaŭlaje pasadku ŭ transpartny srodak (u tym liku vahon) abo vysadku ź jaho. <…> Zaklučeńnie damovy paćviardžajecca apłataj prajezdu z vykarystańniem žetona, elektronnaha bileta, prajaznoha dakumienta z adznakaj u validatary abo pradjaŭleńniem dakumienta na lhoty. Dahavor pieravozki ličycca zaklučanym z momantu prachodu pasažyram kantrolnaha turnikieta (linii kantrolu). Uličvajučy nazvanaje, zadavolić vašy patrabavańni nie ŭjaŭlajecca mahčymym, pakolki fakt pryčynieńnia škody vašamu zdaroŭju nie adnosicca da strachavoha vypadku i vina dziaržpradpryjemstva «Minski mietrapaliten» adsutničaje», — havorycca ŭ aficyjnym adkazie.
«Źbirajemsia ŭ sud»
Pazicyja transpartnikaŭ Alenu Ivanaŭnu kateharyčna nie zadavoliła. Jana nastojvaje: praviłaŭ nie parušała.
— U mianie byŭ dziejny prajazny, i ja na sto pracentaŭ upeŭnienaja, što čuła charakterny sihnał i bačyła zialonuju strełku. Maja siastra raskazvała, što bačyła padobnuju situacyju na stancyi «Płošča Jakuba Kołasa»: tam taksama turnikiet spracavaŭ i traŭmavaŭ žančynu. Značyć, technika taksama moža pamylacca. Akramia taho, syn prasiŭ asabista pakazać jamu zapisy z kamier, kab ułasnymi vačyma ŭbačyć, jakoha koleru hareła strełka ŭ momant majho prachodu. Ale jamu admovili. Čamu? Bo heta adrazu źniało b usie pytańni.
Pa słovach Andreja, syna hieraini, jany majuć namier źviarnucca ŭ sud i tam adstojvać svaju pravatu. Siamja ličyć, što aŭtamatyka dała zboj, za jaki ciapier pažyły čałaviek raspłačvajecca ŭłasnym zdaroŭjem.
Kamientary
Što za karacielnaja sistema?! Jak vy dastali karacieli, karaniki, karpienkovy i pročyja padonki!
Navat u nu pahadzi mulčiku hetaja prablema abśmiejvałasia. A sistema nastolki biez zvarotnaj suviazi što dahetul narmalny kantrol nie zrabili. Niekampietentnyja miarzaŭcy z začosami! Idzicie dvary miaści!!