«Heta ŭžo nie tolki pytańnie demakratyi i pravoŭ čałavieka». Pieraabrany śpikier KR zaklikaŭ da nacyjanalnaha dyjałohu

Pierš za ŭsio chaču padziakavać členam Kaardynacyjnaj rady za akazany mnie davier i padtrymku pry abrańni na pasadu Śpikiera. Dla mianie heta vialiki honar i adnačasova vialikaja adkaznaść.

Ja pierakanany, što siońnia Kaardynacyjnaja rada ŭstupaje ŭ pieryjad, kali jaje rola moža znoŭ stać asabliva važnaj dla budučyni Biełarusi. My žyviom u čas surjoznych vyklikaŭ i vysokaj niavyznačanaści. Vajna praciahvajecca pobač z našymi miežami, raście mižnarodnaja napružanaść, a Biełaruś zastajecca ŭ situacyi hłybokaha ŭnutranaha palityčnaha kryzisu.

Padziei apošnich dzion pakazvajuć, što ryzyki dla biaśpieki i niezaležnaści našaj krainy zachoŭvajucca i mohuć uzrastać. U hetych umovach asabliva važna zrabić usio mahčymaje, kab Biełaruś nie była ŭciahnutaja ŭ dalejšuju vajennuju eskałacyju i zachavała mahčymaść samastojna vyznačać svaju budučyniu.

Na moj pohlad, pytańnie nacyjanalnaha dyjałohu siońnia vychodzić daloka za miežy palityčnych roznahałośsiaŭ. Heta ŭžo nie tolki pytańnie demakratyi, pravoŭ čałavieka abo pieraadoleńnia ŭnutranaha kryzisu. Heta pytańnie miru, biaśpieki i zachavańnia biełaruskaj dziaržaŭnaści.

Kali hramadstva padzielenaje, a palityčny kanflikt zastajecca niavyrašanym, Biełaruś stanovicca bolš uraźlivaj pierad źniešnimi vyklikami i pahrozami. Naadvarot, pošuk parazumieńnia pamiž pradstaŭnikami funkcyjanalnaj ułady, demakratyčnych sił i hramadstva zdolny ŭmacavać unutranuju ŭstojlivaść krainy, jaje suvierenitet i zdolnaść adstojvać ułasnyja nacyjanalnyja intaresy.

Mienavita tamu liču nieabchodnym raspačać u Kaardynacyjnaj radzie źmiastoŭnaje abmierkavańnie inicyjatyŭ, nakiravanych na zapusk nacyjanalnaha dyjałohu i pošuk mirnych šlachoŭ vychadu z palityčnaha kryzisu.

Biełarusi nieabchodny ŭłasny paradak dnia miru, adkaznaści i nacyjanalnaj zhody. My nie možam upłyvać na rašeńni, jakija prymajucca za miežami našaj krainy, ale možam zrabić usio mahčymaje, kab los Biełarusi vyznačaŭsia samimi biełarusami.

Siońnia Kaardynacyjnaja rada zdolnaja adyhrać važnuju rolu ŭ kansalidacyi hramadstva vakoł hałoŭnych kaštoŭnaściaŭ — niezaležnaści, miru i prava Biełarusi na ŭłasny šlach raźvićcia.

Zaklikaju členaŭ Kaardynacyjnaj rady raspačać abmierkavańnie adpaviednych inicyjatyŭ i sumiesna šukać rašeńni, jakija dapamohuć zachavać mir u Biełarusi, umacavać jaje niezaležnaść i stvaryć umovy dla nacyjanalnaha dyjałohu.

• 0
• 0
• 0
• 0
• 0
• 0
• 0
• 0