Tysiačy ludziej sabralisia na Kupalli ŭ Aziarcy i Sule. Takoj masavaści nichto nie prypomnić FOTY
U Biełarusi pačalisia kupalskija hulańni. Praciahnucca jany da pačatku lipienia, heta značyć amal dva tydni.
Čamu tak doŭha? Jak tłumačać falkłarysty, adviečna Kupalle było prymierkavana da letniaha soncastajańnia, jakoje vypadaje na 20‑ia čysły červienia. Ale paśla pierachodu na hryharyjanski kalandar śviata zrušyłasia na 6—7 lipienia. Tamu ŭvieś pieryjad času pamiž hetymi datami možna śmieła ličyć «kupalskim časam» i adznačać jaho napoŭnicu, piša «Anłajnier».
U subotu, 20 červienia, nadvorje było pa-sapraŭdnamu letnim. U muziei-skansenie ŭ Aziarcy sabrałasia šmat ludziej — pavodle słoŭ arhanizataraŭ Kupalla, bolš za 2000 čałaviek. Ale takaja masavaść zusim nie napružvała, a naadvarot, stvarała adčuvańnie supolnaści — sapraŭdnyja narodnyja hulańni! Miesca chapała ŭsim, čerhaŭ praktyčna nie było.
Na terytoryi muzieja raźmiaścilisia ramieśniki i nievialički fudkort. Tak što možna było i padsiłkavacca, i kupić sabie reč ručnoj raboty.
Na ŭvachodzie naviedvalnikaŭ muzieja adrazu ž sustrakali karahodami i tancami. Prajści mima było składana.
Ale jak adznačać Kupalle bieź vianka? U Muziei narodnaj architektury i pobytu i pra heta pakłapacilisia: na placoŭcy kala carkvy raskłali travy i kvietki, i ŭsie achvočyja zmahli spleści sabie hałoŭny simvał śviata. Taksama prachodzili tvorčyja majstar-kłasy pa stvareńni dekoru i lalečak z travy.
Na scenie vystupali falkłornyja kalektyvy, kupalskija śpievy hučali z usich bakoŭ — dziaŭčaty ŭ narodnych strojach śpiavali ich u roznych łakacyjach muzieja.
Hałoŭnaj častkaj hulańniaŭ stała vialikaje kupalskaje šeście da vohnišča niepadalok ad raki. Na placoŭcy sabralisia ŭsie hości śviata, karahody vadzili ŭ try rady, pryčym časam tancy nastolki paskaralisia, što ludzi paśpiavali zapychacca.
Nie abyšłosia, naturalna, i biez skokaŭ praz vohnišča. Zdaŭna jany ličylisia nie tolki narodnaj zabavaj, ale i abradam ačyščeńnia. A dla par — jašče i pravierkaj sajuza na tryvałaść. Prodki vieryli, što kali zakachanyja zmohuć skoknuć praz ahoń, nie rasčapiŭšy ruk, ich čakaje ščaślivaja sumiesnaja budučynia.
Zaviaršyłasia Kupalle ŭ Aziarcy jašče adnym nieadjemnym rytuałam śviata — puskańniem viankoŭ na vadu.
4 lipienia ŭ muziei architektury i pobytu ŭ Aziarcy projdzie jašče adno Kupalle. Arhanizatary abiacajuć jašče bolš maštabnyja hulańni.
Adznačyli Kupalle ŭ subotu i ŭ parku historyi «Suła». Taksama z usimi śviatočnymi tradycyjami. Nu i jak biez znakamitaha drakara.
«Stolki pryhožych ludziej było!» — pišuć biełarusy ŭ sacsietkach.
Dzie jašče adznačyć Kupalle? Voś niekalki varyjantaŭ:
Dukorski majontak (28 červienia)
U prahramie śviata — tradycyjnyja hulni i tancy pad žyvuju muzyku, batlejka, lekcyi pra biełaruskuju mifałohiju i narodny kaścium, majstar-kłasy pa stvareńni kupalskich suvieniraŭ i ŭpryhažeńniaŭ, placieńnie viankoŭ, kvesty i varažba. Kulminacyjaj viečara stanuć vybar Kupalinki i Kupališa, fakielnaje šeście, zapalvańnie kupalskaha koła, karahody kala vohnišča, puskańnie viankoŭ na vadu i skoki praz ahoń.
Park historyi «Suła» (21, 27, 28 červienia, 4—5 lipienia)
Hościeŭ «Suły» čakajuć kupalskija abrady, narodnyja pieśni i tancy, teatralizavanyja pakazy, majstar-kłasy, hulni i zabavy dla dziaciej i darosłych, pošuki «paparać-kvietki», hulańni kala vohnišča i h. d.
Biarezinski bijaśfierny zapaviednik (4 lipienia)
Kupalle ŭ Biarezinskim zapaviedniku padydzie tym, chto choča sumiaścić narodnaje śviata z adpačynkam na pryrodzie. Arhanizatary abiacajuć tradycyjnyja abrady, kancerty falkłornych kalektyvaŭ, majstar-kłasy, narodnyja hulni, karahody i inšyja tematyčnyja aktyŭnaści ŭ malaŭničaj atmaśfiery adnaho z samych viadomych pryrodnych kutkoŭ Biełarusi.
Sviata Fest (Kupalle) (27 červienia)
Fiestyval projdzie prosta ŭ centry Minska — u kulturnaj prastory «Echo». Śviata abjadnaje sučasnyja farmaty adpačynku z narodnymi tradycyjami. Naviedvalnikaŭ čakajuć kancert, lekcyi, majstar-kłasy, ramiesnyja rady, tematyčnyja fotazony, zabavy dla dziaciej i darosłych, fudkort. Arhanizatary abiacajuć nasyčanuju prahramu, jakaja dazvolić paznajomicca z kupalskimi tradycyjami ŭ haradskim farmacie.
«Kupalskija ahni» ŭ Bataničnym sadzie (4—5 lipienia)
Jašče adzin varyjant dla tych, chto płanuje adznačyć śviata ŭ Minsku. U prahramie — vystupleńni artystaŭ, narodnyja abrady, majstar-kłasy, zabavy dla ŭsioj siamji i viačerniaje vohniennaje šou.
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary