Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec
Ukrainskaja raźviedka źviarnuła ŭvahu na maštabnuju rekanstrukcyju pierapraŭ na poŭdni Biełarusi, pabačyŭšy ŭ joj pahrozu novaha ŭvarvańnia. Adnak hetaja razbudova pradyktavanaja nie intaresami rasijskaj armii, a krytyčnym znosam savieckaj infrastruktury i vyrašeńniem zastarełych łahistyčnych prablem.
Dniami prezident Ukrainy Uładzimir Zialenski spasłaŭsia na dakład vykanaŭcy abaviazkaŭ kiraŭnika Słužby zamiežnaj raźviedki Aleha Łuhaŭskoha, pavodle jakoha ŭzdoŭž ukrainskaj miažy ŭ Biełarusi viadziecca padazrona aktyŭnaja razbudova infrastruktury. Zialenski pieraličyŭ kankretnyja kirunki: Kobryn — Koviel, Janova — Manievičy, Łuniniec — Sarny, Rečyca — Koraścień i Homiel — Čarnihaŭ. Tam nibyta zaviaršajecca ŭźviadzieńnie darožnaj infrastruktury, jakaja, pa słovach ukrainskaha lidara, «nie maje nijakaha inšaha sensu, akramia vajskovaha».
Adnak žychary poŭdnia Biełarusi ličać, što pryčyna hetaha budaŭničaha bumu chavajecca nie ŭ płanach nastupu, a ŭ nazapašanych prablemach samoj infrastruktury Biełarusi.
Pieraściarohi pierad «novymi Žytkavičami»
Pryčynu, čamu ŭłady raptam pačali masava ŭkładać hrošy ŭ masty, varta šukać u minułym dziesiacihodździ. U śniežni 2017 hoda nad Prypiaćciu ŭ Žytkavickim rajonie łopnuła apornaja plita adzinaha na sotniu kiłamietraŭ mosta. Dziela biaśpieki ruch daviałosia całkam spynić, i vielizarny rehijon imhnienna apynuŭsia adrezanym ad narmalnaj łahistyki. Kab trapić z Turava ŭ Žytkavičy, miascovym žycharam i pradpryjemstvam davodziłasia rabić kruh praz Mazyr abo Pinsk daŭžynioj kala 250 kiłamietraŭ.
Hety łakalny transpartny kałaps staŭ sapraŭdnym chałodnym dušam dla ŭładaŭ: ekstrannaja dyjahnostyka pa ŭsioj krainie vyjaviła, što sotni transpartnych abjektaŭ znachodziacca za krok ad abvału.
Hałoŭnaj prablemaj staŭ saviecki defiekt kanstrukcyi. U 1960— 1980‑ch hadach u BSSR pabudavali cełuju sieryju bujnych pierapraŭ pa inavacyjnaj na toj čas technałohii zborna-skrynkavych kanstrukcyj z klejevymi stykami. Dziesiacihodździ i klimat zrabili svaju spravu: klej straciŭ ułaścivaści, unutr švoŭ trapiła vilhać, i armatura pačała ržavieć, litaralna razburajučy bieton znutry. Dakładna takimi ž «dvajniatami» žytkavickaha mosta akazalisia zbudavańni ŭ Babrujsku, Navapołacku i na trasie M8 pad Homielem. Usie jany zapatrabavali terminovaj i darahoj rekanstrukcyi.
Druhi fatalny faktar — krytyčny rost nahruzak. Bolšaść biełaruskich mastoŭ prajektavałasia paŭstahodździa tamu pad saviecki standart N-18, jaki raźličvaŭsia na ruch kałony mašyn pa 18 ton. Siońnia ž tymi samymi darohami masava iduć sučasnyja kamiercyjnyja fury vahoj pa 40—50 ton. Dvuchrazovaje pieravyšeńnie raźlikovych pakazčykaŭ pryviało da taho, što «stomlenaść» materyjałaŭ nastupiła značna raniej za zakładzienyja terminy.
Rehularnyja zdareńni, jak, naprykład, abvał mosta cieraz raku Rova pad Barysavam ci padzieńnie častki puciepravoda na Niamizie ŭ Minsku ŭ pačatku 2022 hoda, kančatkova pakazali maštab i pryjarytetnaść prablemy.
Dziela jaje vyrašeńnia jašče ŭ krasaviku 2021 hoda — amal za hod da pačatku poŭnamaštabnaj vajny va Ukrainie — urad zaćvierdziŭ dziaržaŭnuju prahramu «Darohi Biełarusi» na 2021—2025 hady. U jaje ŭklučyli 32 samyja krytyčnyja masty i puciepravody krainy, što patrabavali nieadkładnaha ŭmiašańnia.
Siarod ich, darečy, byŭ i most pamiž Vietkaj i Chalčam, jaki siońnia turbuje ŭkrainskija ŭłady.
Adnak čas pakazaŭ, što heta była tolki viaršynia ajśbierha. Vosieńniu 2024 hoda vice-premjer Anatol Sivak aficyjna pryznaŭ: kala 800 mastavych zbudavańniaŭ pa ŭsioj krainie całkam vyčarpali svoj resurs. U novuju redakcyju dziaržprahramy na 2026—2030 hady ŭnieśli ŭžo amal 468 abjektaŭ: 288 mastoŭ na respublikanskich trasach i 180 — na miascovych.
Pry hetym sa 180 miascovych mastoŭ na Homielskuju i Bresckuju vobłaści prypadaje tolki 18 i 7 abjektaŭ adpaviedna, u toj čas jak u Minskaj vobłaści płanujuć rekanstrujavać 75 pierapraŭ, a ŭ paŭnočnaj Viciebskaj — 39.
Jeŭrapiejskija inviestycyi: raźviazka pad Rečycaj
U dakładzie ŭkrainskaj raźviedki siarod inšych zhadvajecca kirunak Rečyca — Koraścień. Samym prykmietnym infrastrukturnym abjektam u hetym rajonie siońnia źjaŭlajecca maštabnaja rekanstrukcyja mahistrali M10 i budaŭnictva novaj raźviazki na jaje skryžavańni z darohaj R33.
Trasa R33 sapraŭdy viadzie ad Rečycy na poŭdzień, u bok Chojnikaŭ, praź jakija možna vyjechać da Paleskaha radyjacyjna-ekałahičnaha zapaviednika, da Brahina i Kamaryna — heta značyć i da ŭkrainskaj miažy.
Mienavita hetaj pramoj darohaj z naviadzieńniem pantonnaha mosta ŭ Paleskim zapaviedniku skarystałasia rasijskaja armija ŭ lutym 2022 hoda. Praŭda, nie jasna, jakija pieravahi dla rasijskaj armii mieła b bolš raźvitaja raźviazka ŭ hetym miescy.
Adnak pieratvareńnie zvyčajnaha kalcavoha skryžavańnia ŭ sučasnuju raźviazku typu «kaniušynny list» było zadumana jašče ŭ 2015—2016 hadach. Tady madernizacyju 85‑kiłamietrovaha ŭčastka trasy M10 ad Rečycy da Kalinkavičaŭ vybrali ŭ jakaści pieršaha ŭ historyi Biełarusi piłotnaha prajekta dziaržaŭna-pryvatnaha partniorstva. Finansavać maštabnuju budoŭlu pavinien byŭ Jeŭrapiejski bank rekanstrukcyi i raźvićcia (JEBRR).
U sakaviku 2017 hoda baki padrychtavali aficyjny infarmacyjny miemarandum. U dakumiencie navat jość dakładnaja schiema toj samaj raźviazki na 109‑m kiłamietry.
Prajekt byŭ raspracavany sumiesna ź jeŭrapiejskimi kansultantami za piać hadoŭ da taho, jak rasijskija vojski pačali ściahvacca da ŭkrainskich miežaŭ.
Realizacyja płana zamarudziłasia vyklučna z palityčnych pryčyn. Paśla kryzisu 2020 hoda i pačatku vajny ŭ 2022 hodzie zachodnija finansavyja instytuty zharnuli supracoŭnictva ź Minskam, a nieŭzabavie ad kredytavańnia admoviŭsia i Jeŭrazijski bank raźvićcia.
U vyniku biełaruskim uładam daviałosia kardynalna pierahladać prajekt i šukać hrošy va ŭłasnym biudžecie. Aktyŭnaja budaŭničaja faza pačałasia tolki ŭ 2025 hodzie. Ciapier darohu pašyrajuć da čatyroch pałos i ŭkładvajuć doŭhaviečnaje cemientabietonnaje pakryćcio, a pieršy 17‑kiłamietrovy ŭčastak płanujuć adkryć užo ŭ vieraśni 2026-ha.
Most cieraz Dniapro, jaki čakaŭ ramontu dziesiać hadoŭ
Jašče adzin abjekt, jaki źjaŭlajecca častkaj rekanstrukcyi trasy M10 i pryciahnuŭ uvahu ŭkrainskich śpiecsłužbaŭ, — heta most cieraz Dniapro ŭ Rečyckim rajonie.
Mahistral M10 prachodzić praz usio Biełaruskaje Paleśsie, tamu lubyja transpartnyja šlachi z centralnaj Biełarusi va Ukrainu abo iduć pa joj, abo jaje pierasiakajuć. Viadoma, hetuju trasu možna vykarystoŭvać i dla ahresii suprać Ukrainy, ale jość i bolš prahmatyčnaja pryčyna.
Reč u tym, što pieraprava cieraz Dniapro ŭ hetym miescy składałasia z dvuch mastoŭ. Paŭnočny ź ich (u aficyjnych dakumientach nazyvajecca pravym bokam), bolš vuzki i pabudavany jašče ŭ 1958 hodzie, pryjšoŭ u taki katastrafičny stan, što byŭ aficyjna zakryty i zakansiervavany jašče ŭ 2017 hodzie. Na spadarožnikavych zdymkach za 2018 hod možna pabačyć, što ŭ toj čas prajezdu pa hetym moście ŭžo nie było, a transpartny patok pieranakiroŭvaŭsia na paŭdniovy most praz admysłovy źjezd.
Dvuchpałosny paŭdniovy most u vyniku staŭ sapraŭdnym «vuzkim horłam» na čatyrochpałosnaj trasie M10 — tamu adnaŭleńnie paŭnočnaha mosta źjaŭlajecca daŭno naśpiełaj łahistyčnaj nieabchodnaściu.
Da taho ž u 2023 hodzie było vyjaŭlena, što i levy bok mosta maje krytyčnyja prablemy, jakija zapatrabavali rekanstrukcyi z zachavańniem ruchu tolki pa adnoj pałasie. I heta na čatyrochpałosnaj mižnarodnaj mahistrali!
U krasaviku 2025 hoda rekanstrukcyja levaha boku była skončana, što dazvoliła ŭ sakaviku 2026 hoda raspačać rekanstrukcyju pravaha boku, jaki stajaŭ zakrytym dziesiacihodździe.
Zhodna ź dziaržaŭnaj prahramaj «Darohi Biełarusi», paśla zaviaršeńnia ŭsich rabot tut pavinien źjavicca paŭnavartasny čatyrochpałosny aŭtaban ź bietonnym pakryćciom. Pieršapačatkova zdać pravy most płanavali ažno ŭ 2029 hodzie, ale padčas niadaŭnich inśpiekcyj Ministerstva transpartu pastaviła zadaču paskorycca i adkryć ruch da kanca 2027 hoda.
Kudy viadzie most u Vietcy
Zaniepakojenaść u Kijevie vyklikaje i kirunak Homiel — Čarnihaŭ. Tut idzie budaŭnictva novaha mosta cieraz raku Sož pamiž Vietkaj i vioskaj Chalč na trasie R30.
Stary most cieraz Sož pamiž Chalčam i Vietkaj. 2020 h. Fota: Google Earth
Sapraŭdy, padazreńni da hetaj budoŭli moh vyklikać toj fakt, što praz Vietku možna trapić u Branskuju vobłaść Rasii dvuma šlachami. Pieršy idzie na poŭnač pa trasie R30 da vioski Staŭbun i dalej u rasijskuju Krasnuju Haru, jakaja znachodzicca litaralna pasiarod ničoha, udalečyni ad bujnych aŭtamahistralaŭ i čyhunak. Druhi šlach bolš surjozny: na poŭdzień pa darozie R124 da Dobruša, adkul idzie čyhunačnaja vietka i mahistral M10, što pierachodzić u hałoŭnuju transpartnuju arteryju Branščyny (A-240). Zdavałasia b, voś jon — hatovy kalidor dla pierakidvańnia rasijskich vojskaŭ.
Daroha ź Vietki, jakaja prachodzić pa moście cieraz Sož, viadzie prosta na centralnyja vulicy Homiela. Nijakaha abjezdu Homiela ŭ hetym miescy nie isnuje. Fota: Openstreetmap
Ale kali hladzieć na inšy bok raki, to trasa R30 viadzie ad Vietki prosta ŭ Homiel. Kab trapić z hetaha mosta na ŭkrainskija mahistrali (naprykład, na Čarnihaŭ), branietankavym kałonam daviałosia b jechać prosta praz centralnyja vulicy abłasnoha centra abo vichlać pa viaskovych darohach biez pakryćcia.
Sprava ŭ tym, što z paŭnočna-ŭschodniaha boku Homiel nie maje anijakaha namioku na abjaznuju darohu. Vajenny sens mosta ŭ Vietcy adnosny.
Pry hetym narmalny abjezd Homiela z pramym vychadam va Ukrainu daŭno isnuje, ale z poŭdnia. Ad taho ž Dobruša trasa M10 robić vialikuju duhu, abychodziačy abłasny centr, i skryžoŭvajecca z mahistrallu M8, što viadzie akurat na Čarnihaŭ. Kali b rasijskija vojski išli z Branskaj vobłaści, jany b skarystalisia mienavita hetym paŭdniovym maršrutam. Rabić niezrazumieły kruk na poŭnač da Vietki tolki dziela taho, kab pierajechać novy most i paśla piatlać vulicami Homiela, nichto nie staŭ by.
Kudy bolš padazronym dla ŭkrainskich uładaŭ musić być budaŭnictva Uschodniaha abchodu ŭ Homieli. Ale heta sumnaviadomy daŭhabud, jaki pačali rabić jašče ŭ 2009 hodzie, zatym praź niedachop finansavańnia zamarozili i ciapier aficyjna płanujuć uvieści ŭ ekspłuatacyju tolki ŭ 2029-m.
Novy i stary masty cieraz Sož pamiž Chalčam i Vietkaj. Paśla adkryćcia novaha mosta staruju avaryjnuju pierapravu 1968 hoda pabudovy demantujuć. Maj 2026 h. Fota: BiełTA / skrynšot videa
Novy most cieraz Sož pamiž Chalčam i Vietkaj. Sakavik 2026 h. Fota: BiełTA
Realnaja pryčyna budoŭli mosta ŭ Vietcy — fizičny znos. Stary most 1968 hoda pabudovy daŭno pryjšoŭ u pieradavaryjny stan. U pačatku 2023 hoda pa im krytyčna abmiežavali ruch: puścili mašyny ŭ adnu pałasu pa śviatłafory i zabaranili prajezd transpartu, ciažejšaha za 5 ton. Furam davodziłasia rabić kruk u 50 kiłamietraŭ. Mienavita tamu novy abjekt daŭžynioj kala 540 mietraŭ i pačali ŭzvodzić u 2024 hodzie paralelna sa starym. Jak tolki novaja pieraprava budzie zdadziena (aryjencirovačna ŭ 2026 hodzie), stary most prosta demantujuć.
«Daroha žyćcia» pamiž Stolinam i Łunincam
Jašče adzin nibyta vajenny abjekt — novy most cieraz Prypiać pamiž Łunincam i Stolinam, budaŭnictva jakoha prachodzić pa prahramie raźvićcia Prypiackaha Paleśsia i pavinna zaviaršycca da 2027 hoda. Aŭtamabilny most źjavicca kala dziejučaha čyhunačnaha mosta, na tym samym miescy, dzie kaliści stajaŭ pieršy čyhunačny most, źniesieny praz staraść.
Dla ŭkrainskich vajskoŭcaŭ aŭtamabilnaja pieraprava, jakaja vyvodzić naŭprost da pryhraničnaha Stolina, vidavočna, vyhladaje jak jašče adzin patencyjny kalidor dla ŭvarvańnia. Adnak pierakinuć techniku tudy možna i biez aŭtamabilnaha mosta — dla hetaha daŭno isnuje čyhunačnaja vietka z Łuninca prosta da stancyi Rečyca pad Stolinam.
Uźviadzieńnie aŭtamabilnaha mosta — heta vyrašeńnie sacyjalna-łahistyčnaj i, jak ni dziŭna, mahčyma, abarončaj prablemy Biełarusi.
Siońnia adlehłaść pamiž Łunincam i Stolinam naŭprost składaje ŭsiaho 46 kiłamietraŭ, ale prajechać ich možna tolki praz paromnuju pierapravu ŭ vioscy Korabje, jakaja nie pracuje zimoj i ŭ niepahadź. Bieź jaje davodzicca rabić hihancki kruh u 130 kiłamietraŭ praź Pinsk abo 170 kiłamietraŭ praz Žytkavičy. Kałaps žytkavickaha mosta ŭ 2017 hodzie nahladna pakazaŭ, što ŭ vypadku nadzvyčajnaj situacyi ŭvieś Stolinski rajon imhnienna apyniecca ŭ izalacyi.
Ci moža hety most vykarystoŭvacca vajskoŭcami. Niesumnienna. Ale pieršasnaja patreba ŭ im — taksama ekanamičnaja.
Pryhraničny Stolin vyhladaje z hetaha pohladu jak adno z samych uraźlivych miescaŭ, bo horad faktyčna adrezany ad asnoŭnaj častki Biełarusi bałotami i Prypiaćciu. Biez pramoj pierapravy chutka pierakinuć tudy biełaruskuju armiju dla abarony horada abo evakujavać nasielnictva ŭ vypadku hipatetyčnaha kontrudaru budzie łahistyčna składana.
Kužaličynski most
Nastupny abjekt z ukrainskaha śpisa — heta Kužaličynski most cieraz Dniaproŭska-Buhski kanał u Ivanaŭskim rajonie, raźmieščany na 12‑m kiłamietry trasy R144. Sama daroha idzie ad mahistrali M10 naŭprost da ŭkrainskaj miažy i punkta propusku «Machro». Na paŭdniovym bierazie kanała sapraŭdy niama nivodnaha horada ci bujnoha nasielenaha punkta — tolki tuzin zvyčajnych viosak i lasy, u jakich da pačatku 1950‑ch pry padtrymcy miascovych žycharoŭ viali partyzanskuju baraćbu bajcy Ukrainskaj paŭstanckaj armii.
Sapraŭdy, vyhladaje jak amal biaźludny tranzitny kalidor dla pierakidvańnia techniki na poŭdzień. Padazreńni ŭzmacniajucca i spadarožnikavymi zdymkami, na jakich bačna źjaŭleńnie «druhoha» mosta pobač z asnoŭnym.
Most 1983 hoda pabudovy byŭ aficyjna zakryty na kapitalny ramont 11 kastryčnika 2025 hoda. Zhodna z pašpartam abjekta, staryja žalezabietonnyja praloty zamieniać na sučasnyja mietaličnyja, bo savieckija kanstrukcyi ŭžo nie vytrymlivali vahi sučasnaha transpartu.
Niahledziačy na adsutnaść haradoŭ pa toj bok raki, situacyja šmat u čym ahulnaja sa stanoviščam Stolina: most maje i stratehičnaje značeńnie, ale jon taksama i adzinaja suviaź paleskich viosak z «vialikaj ziamloj», kali nie ličyć jašče dźviuch paromnych pierapraŭ, jakija pracujuć nie zaŭsiody. U niepahadź siudy biez mosta nie zmohuć dajechać ni chutkaja, ni pažarnaja.
Na čas ramontu, kab ludzi z paŭdniovaha bieraha nie apynulisia ŭ poŭnaj izalacyi, bo na tym baku akramia viosak znachodziacca dźvie małočnatavarnyja fiermy i papularny sanatoryj «Alesia», budaŭniki ŭźviali pobač časovy napłaŭny most — mienavita jon i bačny na śviežych spadarožnikavych zdymkach. Ramont praciahniecca da lutaha 2027 hoda.
Kobrynski most
Dva masty ŭzvodziacca i ŭ centry vialikich haradoŭ na paŭnočnym zachadzie Biełarusi. Razmova idzie pra rekanstrukcyju mosta cieraz raku Muchaviec pa vulicy Lenina ŭ histaryčnym centry Kobryna. Hetaja pieraprava była pabudavanaja jašče ŭ 1946—1947 hadach i źviazvaje centr horada z zabudovaj na paŭnočnym bierazie.
Hetaja pieraprava maje vajennaje značeńnie tolki ŭ adnym vypadku — pry abaronie samoha Kobryna ad voraha. Z 2009 hoda Kobryn maje šyroki i zručny Paŭdniovy abchod, jaki naŭprost złučaje mahistral M10 z darohami da Minska, Bresta, a taksama da Małaryty i ŭkrainskaj miažy, abminajučy haradskuju zabudovu. Most u centry Kobryna nie mieŭ by pryncypovaha značeńnia pry čarhovym uvarvańni rasijskich vojskaŭ z boku Biełarusi, kali jość taki Paŭdniovy abchod.
Zajaŭlenaja pryčyna madernizacyi «staroha» mosta (tak jaho nazyvajuć miascovyja) — fizičnaja stomlenaść. Hruzapadjomnaść kanstrukcyi siaredziny XX stahodździa daŭno nie adpaviadała sučasnym patrabavańniam, a vuzkaja prajeznaja častka stvarała ŭ centry Kobryna štodzionnyja zatory. Sioleta abjekt narešcie ŭklučyli ŭ Dziaržaŭnuju inviestycyjnuju prahramu.
Staryja praloty vyrašyli całkam demantavać, a na ich miescy pastavić novyja stalažalezabietonnyja kanstrukcyi indyvidualnaha prajektavańnia. Pry hetym kolkaść pałos zastaniecca raniejšaj — darohu pašyrać tolki z 7,5 da 9 mietraŭ, dadaŭšy prastoru dla piešachodaŭ i asobnyja paŭtaramietrovyja vieładarožki.
Kab horad nie byŭ zusim paralizavany na čas rekanstrukcyi, pobač sa Spaskim manastyrom naviali časovy pantonny most dla piešachodaŭ i viełasipiedystaŭ. Hetaja pieraprava abstalavanaja śpiecyjalnymi elektryčnymi labiodkami i pieryjadyčna rassoŭvajecca, kab prapuścić pa Muchaŭcy kruizny ciepłachod «Biełaja Ruś».
Zhodna z płanam architektaraŭ, na abnoŭlenym moście abstalujuć ahladnuju placoŭku, ź jakoj budzie adkryvacca panaramny vid na raku, nabiarežnuju, abnoŭleny ZAHS i Alaksandra-Nieŭski sabor, a ŭniz da raki pojdzie zihzahapadobnaja leśvica.
Brescki most
Anałahičnaja situacyja nazirajecca i ŭ Breście. Na ŭkrainskaj hraficy paznačany most pa bulvary Šaŭčenki, jaki nibyta ŭzvodziać uzdoŭž dziejučaha dla vychadu na Varšaŭskuju šašu. Dla čałavieka, nie znajomaha z hieahrafijaj abłasnoha centra, heta moža hučać jak padrychtoŭka stratehičnaha kalidora i dublavańnie pierapraŭ. Adnak Varšaŭskaja šaša — heta daŭno ŭžo nie zaharadnaja trasa, a zvyčajnaja mahistralnaja vulica horada.
Sam ža most 1963 hoda pabudovy źjaŭlajecca žyćciova važnaj arteryjaj, što złučaje centr Bresta ź vielizarnymi spalnymi rajonami paŭdniovaha bieraha Muchaŭca — Vulkaj, Kavaloŭkaj, Puhačoŭkaj, a taksama Vałynkaj i Hieršonami.
Staraja dvuchpałosnaja kanstrukcyja šyrynioj usiaho 13,5 mietra dziesiacihodździami nie spraŭlałasia z trafikam, jaki vyras u razy, i stvarała štodzionnyja zatory. Kab nie paralizavać pałovu horada na čas ramontu, ułady vybrali składany trochetapny farmat rekanstrukcyi za kredytnyja srodki Banka raźvićcia.
Budaŭniki sapraŭdy ŭzvodziać novy most paralelna sa starym, ale vyklučna kab nie pierakryvać važnuju haradskuju arteryju. Ale jak tolki pa joj adkryjuć ruch (aryjencirovačna ŭ kancy 2026 hoda), stary avaryjny most budzie całkam źniesieny, i na jaho miescy pabudujuć druhuju pałovu.
Kali ž kazać pra realny vajenny tranzit, to jašče ŭ kancy minułaha dziesiacihodździa ŭ Breście pabudavali Zachodni abchod — vializnuju estakadu, jakaja dazvalaje pierakinuć hruzy ci techniku ad mahistrali M1 u bok ukrainskaj miažy, abminajučy centralnyja vulicy horada.
Vykarystańnie mosta na bulvary Šaŭčenki dla pierakidvańnia vojskaŭ małapraŭdapadobnaje. Na paŭnočnym bierazie bulvar pierachodzić u bulvar Kasmanaŭtaŭ, jaki faktyčna ŭpirajecca ŭ ščylnuju rehularnuju sietku vulic XIX stahodździa, zacisnutuju čyhunkami. A na paŭdniovym bierazie hetaja haradskaja mahistral ulivajecca va ŭsio toj ža Zachodni abchod.
Rendar budučaha mosta. Fota: z płanšeta, padadzienaha na XXI Respublikanski konkurs na najlepšy prajekt, pabudovu i publikacyju ŭ halinie architektury
Zhodna z zadumaj aŭtarskaha kalektyvu «Brestprajekta», novaja čatyrochpałosnaja pieraprava atrymaje šyrokija čatyrochmietrovyja tratuary dla piešachodaŭ i viełasipiedystaŭ. Architektary zaprajektavali jaho z architekturnaj padśvietkaj, jakaja budzie źmianiać koler, duhapadobnymi dekaratyŭnymi lichtarami i vialikaj stełaj u vyhladzie mietaličnaha kolca ź siłuetami słavutaściaŭ horada na skryžavańni z nabiarežnaj Franciška Skaryny.
Nie padobna, kab budaŭnictva mastoŭ śviedčyła pra ŭciahvańnie Biełarusi ŭ vajnu
Kali b nie žytkavicki kałaps i nie hihanckaja dziaržaŭnaja prahrama pa vyratavańni mastoŭ, jakaja ŭźnikła paśla jaho, takaja kancentracyja budaŭničaj techniki na poŭdni Biełarusi sapraŭdy mahła b zdacca padazronaj.
Tryvoha Kijeva była b całkam abhruntavanaj i ŭ tym vypadku, kali b hetaja dziaržprahrama vykonvałasia pa ŭsioj krainie vyklučna na papiery, a realnyja raboty išli aŭralnymi tempami tolki ŭzdoŭž biełaruska-ŭkrainskaj miažy. Ale heta nie tak. Dakładna takija ž maštabnyja infrastrukturnyja prajekty siońnia realizujucca va ŭsich abłaściach krainy.
Jak my pakazali vyšej, častka ŭkrainskaha śpisa — heta abjekty, zadumanyja abo zakrytyja praź niebiaśpiečnaść zadoŭha da vajny. Raźviazka na M10 prajektavałasia sumiesna ź jeŭrapiejcami jašče ŭ 2015 hodzie, a paŭnočny most cieraz Dniapro pad Rečycaj stajaŭ zakinutym u čakańni rekanstrukcyi cełaje dziesiacihodździe.
Inšyja ž abjekty, jak toj ža most u Vietcy, trapili ŭ prahramy rekanstrukcyi niezadoŭha da rasijskaha ŭvarvańnia va Ukrainu. Kali b jany sapraŭdy rychtavalisia da pačatku nastupu, to musili b być zdadzienyja da lutaha 2022 hoda.
Toje ž samaje tyčycca i budoŭlaŭ, raspačatych paśla 2022 hoda. Razmovy pra mahčymy paŭtorny nastup z terytoryi Biełarusi i ŭciahvańnie Minska ŭ vajnu zahučali z novaj siłaj akurat sioleta.
Adnak hrafiki zaviaršeńnia prac absalutna asinchronnyja, u ich nie vidać anijakaj honki da adzinaha dedłajnu.
Napiaredadni poŭnamaštabnaha ŭvarvańnia ŭ lutym 2022 hoda rasijskija inžyniernyja vojski ŭ režymie poŭnaj sakretnaści naviali pantonny most cieraz Prypiać prosta ŭ Čarnobylskaj zonie adčužeńnia — kala adsielenaj biełaruskaj vioski Viapry, usiaho za čatyry kiłamietry ad ukrainskaj miažy. Kali niechta i nie vieryŭ źviestkam amierykanskaj raźviedki, jakija ahučvaŭ Bajden z trybuny, to hety most na absalutna biaźludnaj terytoryi, znachodžańnie na jakoj było śmiarotna niebiaśpiečnym dla čałavieka, staŭ biassprečnym dokazam. Jon nie pakidaŭ nijakich sumnieńniaŭ u niepaźbiežnaści vajny: taja pieraprava sapraŭdy nie mieła nijakaha inšaha sensu, akramia vajennaha.
Abjekty, na jakija siońnia pakazvaje Ukraina, nijakaj sakretnaściu nie adroźnivajucca. Naadvarot, rekanstrukcyja kožnaha mosta ci raźviazki šyroka aśviatlajecca miedyja. Biełaruś žyvie pa svaim unutranym raskładzie, jaki nie padparadkoŭvajecca vyklučna łohicy vajny pad bokam.
Ukrainskaje kiraŭnictva i raźviedka majuć dastatkova kampietencyj, kab razumieć vajennaje značeńnie abo jaho adsutnaść u budoŭlach kala biełaruska-ŭkrainskaj miažy. Tamu ciapierašnija zajavy Kijeva — heta zrazumiełaja i efiektyŭnaja dypłamatyčnaja taktyka, jakaja dazvalaje Ukrainie trymać situacyju ŭ fokusie ŭvahi zachodnich partnioraŭ i zachoŭvać cisk na režym Łukašenki. Tym bolš što realnaja vajskovaja infrastruktura ŭ Biełarusi sapraŭdy razbudoŭvajecca — prosta da jaje ciažka zaličyć rekanstrukcyju savieckich puciepravodaŭ.
«Naša Niva» — bastyjon biełaruščyny
PADTRYMAĆ
Kamientary
1) Jakraz mienavita na heta i źviartajuć ŭvahu ukrainskija vajennyja : rabić treba było daŭno, ale čamuści pačali rabić ciapier. Na dzivosnaje supadzieńnie ŭ časie.
2) Nie kožny most robicca pad honki na tankach ŭ abodva baki. Tanki ŭvohule jeździać pa čyhuncy. Pa aŭtadarohach jeździać aŭtamabili. Paralelnyja masty i darohi nadzvyčaj nieabchodnyja dla ačystki i razhruzki asnoŭnych mahistralaŭ ad niepažadanaha cyvilnaha transpartu, a taksama dla zabieśpiačeńnia stabilnaha ruchu ŭ abodva baki pry paškodžańni asnoŭnaj transpartnaj mahistrali.
Naprykład situacyja z Krymam: adna daroha, adzin most dazvolili za tydzień izalavać ceły paŭvostraŭ z armijaj, fłotam i resursami. Paralelnyja "nietankavyja" aŭtadarohi majuć istotnaje značeńnie.
Vajskoŭcaŭ nie supakoiš słovami "aj, heta staraja prahrama".
2) Adzinaha dedłajnu być ŭ pryncypie nia moža. Roznyja raboty, abjomy, roznyja maštaby.
Jaki durań budzie płanavać skančeńnie ŭsich budoŭlaŭ na adzin dzień kalendara?
3) Aktyŭnaja razbudova daroh i mastoŭ heta aktyvizacyja darožna-budaŭničych resursaŭ na vypadak imhniennaj likvidacyi mahčymych paškodžańniaŭ.
Naprykład situacyja na akupavanych abšarach Ukrainy: vajna i rasijskaje panavańnie źniščyli tam ŭsio. Załatać dzirku ŭ moście, abo zasypać varonku na stratehičnaj darozie ŭžo niama kamu.
Pastajannaja aktyŭnaja razbudova paralelnych nievajennych darohaŭ zdymaje takuju niebiaśpieku dla ahresara.