Biełaruskaja dyzajnierka stvaryła modnuju sukienku dla indyjskaj madeli. A ŭ Indyi vyrašyli, što taja prosta abharnułasia ŭ ściah
U Indyi razharełasia dyskusija vakoł sukienki, stvoranaj biełaruskaj dyzajnierkaj Darjaj Čarmašencavaj. Ubor u kolerach indyjskaha trykałora nadzieła aktrysa i madel Urvašy Raŭteła. Niekatoryja karystalniki sacsietak paličyli, što takoje vykarystańnie nacyjanalnaj simvoliki moža supiarečyć praviłam abychodžańnia ź dziaržaŭnym ściaham. Sama Raŭteła nastojvaje: sukienka nie kapiruje ściah, a tolki natchnionaja im.
Urvašy Raŭteła (Urvashi Rautela) — indyjskaja aktrysa, madel i pieramožca konkursaŭ pryhažości. U 2015 hodzie jana pradstaŭlała Indyju na konkursie «Mis Suśviet». 23 žniŭnia Raŭteła była ŭ žury finału Miss Universe India 2026 u Džajpury. Tam jana i źjaviłasia ŭ sukiency biełaruskaj dyzajnierki.
Jak piša indyjskaje vydańnie Dainik Bhaskar, ubor byŭ vykanany ŭ aranžavym, biełym i zialonym kolerach, a na pojasie raźmiaščaŭsia sini kruhły elemient, padobny da čakry Ašoki — koła ŭ centry dziaržaŭnaha ściaha Indyi. Sukienka mieła doŭhi šlejf, jaki lažaŭ na padłozie.
Paśla źjaŭleńnia fatahrafij u sacsietkach častka karystalnikaŭ raskrytykavała ŭbor. Sprava ŭ tym, što ŭ Indyi dziejničajuć strohija praviły vykarystańnia dziaržaŭnaha ściaha. Pavodle indyjskaha zakanadaŭstva ab abaronie nacyjanalnaha honaru, dziaržaŭny ściah nielha vykarystoŭvać jak častku adzieńnia abo ŭniformy, a taksama vyšyvać ci drukavać jaho na materyjale dla adzieńnia. Akramia taho, nielha naŭmysna dapuskać kantaktu ściaha ź ziamloj ci padłohaj.
Tamu krytyki źviarnuli ŭvahu nie tolki na padabienstva koleraŭ i centralnaha elemienta sukienki da indyjskaha trykałora, ale i na jaje doŭhi šlejf, jaki dakranaŭsia da padłohi. Pry hetym paviedamleńniaŭ pra toje, što indyjskija ŭłady pryznali ŭbor parušeńniem zakanadaŭstva, niama.
Raŭteła ŭ adkaz zajaviła, što sukienka zadumvałasia jak pryznańnie ŭ lubovi da krainy.
«Ja našu svaju krainu z saboj nie prosta jak nacyjanalnaść, ale jak častku svajoj identyčnaści», — patłumačyła jana. Pavodle aktrysy, joj chaciełasia, kab ubor nie prosta pakazvaŭ, adkul jana, ale i pieradavaŭ, što dla jaje značyć Indyja.
Raŭteła padkreśliła, što sukienka nie źjaŭlajecca kopijaj dziaržaŭnaha ściaha. Pavodle jaje, pry stvareńni ŭboru naŭmysna źmianili adcieńni, praporcyi i raźmiaščeńnie koleraŭ: haryzantalnyja pałosy ściaha stali viertykalnymi, a čakra pieratvaryłasia ŭ dekaratyŭny elemient. Taksama byli vykarystanyja bliskaŭki i machry, a aranžavy i zialony kolery, pavodle aktrysy, adroźnivajucca ad aficyjnych adcieńniaŭ indyjskaha ściaha.
Jak raskazała Raŭteła, sukienku stvaryła biełaruskaja dyzajnierka Darja Čarmašencava (Darya Chermashentseva), jakaja pracuje pad brendam DASHA Fashion Couture, što bazujecca ŭ Dubai i śpiecyjalizujecca na luksavym žanočym adzieńni. Značnaja častka rečaŭ vyrablajecca ŭručnuju va ŭłasnym atelje brenda. Pavodle Raŭteły, praca nad sukienkaj u kolerach indyjskaha trykałora zaniała kala troch miesiacaŭ.
Ciapier čytajuć
«Na takuju ch**niu paviałasia». Rasijanka pryjechała ź Sibiry ŭ Biełaruś i ciapier z maciukami raskazvaje, jak tut składana žyć21
Kamientary