Asiatrovy Miesiac sioleta supadzie z zaćmieńniem i pačyrvanieje
U kancy žniŭnia biełarusaŭ čakajuć dva cikavyja astranamičnyja vidoviščy: apošniaja poŭnia hetaha leta supadzie z častkovym miesiacovym zaćmieńniem, piša Tochka.by.
U noč na 28 žniŭnia Miesiac projdzie praź cień Ziamli. Padčas maksimalnaj fazy ziamny cień zakryje da 96,2% jaho dyska. Tamu Miesiac moža nabyć čyrvanavataje, miednaje abo buravataje adcieńnie — tak zvany «kryvavy Miesiac».
U Biełarusi nazirać zaćmieńnie možna budzie ranicaj 28 žniŭnia. U Minsku častkovaja faza pačniecca prykładna ŭ 05:33. Miesiac u hety čas budzie znachodzicca nizka nad zachodnim haryzontam i možna budzie nazirać, jak cień Ziamli pastupova zakryvaje jaho dysk.
Najlepšyja ŭmovy dla nazirańnia buduć prykładna da 06:10. Paśla hetaha Miesiac apuścicca jašče nižej i nieŭzabavie źniknie za haryzontam. Maksimalnaja faza zaćmieńnia čakajecca kala 07:12 pa minskim časie, ale ŭ Biełarusi ŭbačyć jaje ŭžo nie atrymajecca, bo Miesiac da taho času zojdzie za haryzont.
Tamu dla nazirańnia varta zahadzia vybrać miesca z dobra adkrytym zachodnim abo paŭdniova-zachodnim haryzontam, dzie ahlad nie zakryvajuć damy, drevy dy inšyja pieraškody. Najbolš poŭna zaćmieńnie zmohuć ubačyć žychary Paŭnočnaj, Centralnaj i Paŭdniovaj Amieryki.
Čyrvonaje adcieńnie Miesiaca ŭźnikaje tamu, što padčas zaćmieńnia Ziamla pierakryvaje pramyja soniečnyja pramiani. Častka śviatła prachodzić praź ziamnuju atmaśfieru. Sinija adcieńni raśsiejvajucca macniej, a čyrvonyja i aranžavyja pramiani dasiahajuć pavierchni Miesiaca. Mienavita tamu jon moža vyhladać čyrvonym abo miednym.
U adroźnieńnie ad soniečnaha zaćmieńnia, na miesiacovaje možna hladzieć niaŭzbrojenym vokam — śpiecyjalnyja achoŭnyja akulary nie patrebnyja. Binokl ci nievialiki teleskop dazvolać lepš razhledzieć miažu ziamnoha cieniu.
Nastupnaje poŭnaje miesiacovaje zaćmieńnie adbudziecca tolki 31 śniežnia 2028 hoda.
Nazva «Asiatrovy Miesiac» pachodzić z tradycyj niekatorych karennych narodaŭ Paŭnočnaj Amieryki. U kancy leta ŭ rekach i Vialikich aziorach pačynaŭsia aktyŭny vyłaŭ asiatroŭ, tamu žnivieńskuju poŭniu stali nazyvać Asiatrovaj. Vykarystoŭvajucca taksama nazvy Kukuruzny, Zbožžavy i Čyrvony Miesiac.
Samu poŭniu možna budzie nazirać ź viečara 27 žniŭnia da ranicy 29 žniŭnia.
35 maładych biełarusaŭ i biełarusak, za jakimi varta sačyć: apublikavany pieršy śpis Next 3532
Kamientary