Hetaja biełaruska tak udała paradziruje biełaruskich prapahandystaŭ i ruskich libierałaŭ, što jaje videa ŭsprymajuć za čystuju manietu VIDEA
Natalli Žukoŭskaj — 27. Jana biez zadniaj dumki sparadziravała «Ninel iz Maaskvy», paśla «Žannu Amapaŭnu» i sama nie zaŭvažyła, jak sabrała sotni tysiač prahladaŭ. Vialikaja hutarka i šmat rolikaŭ.
Sa svaich 27 hadoŭ Natalla Žukoŭskaja šeść — u vymušanaj emihracyi, kudy, jak i mnohich biełarusaŭ, jaje zakinuli padziei 2020 hoda. Tady dziaŭčyna dakumientavała parušeńni na vybarčych učastkach, vałancioryła, była adnym z tvaraŭ prajekta Girls Power Belarus i dapamahała palitźniavolenym. Paśla była praca na Mižnarodny kamitet pa rasśledavańni katavańniaŭ, «Bajsoł», «Biełyja chałaty» i šmat inšaha, što łukašenkaŭcy nazyvajuć «ekstremizmam».
«Ja padumała, što mnie varta siabie niejak viesialić — tak ja zapisała pieršy rolik», — kaža Natalla.
I raptam hetyja ryłsy ŭ instahramie pačali źbirać sotni tysiač prahladaŭ.
Daviedalisia, z čaho pačałosia Natalčyna zachapleńnie parodyjami, jak adreahavała na jaje praniknieńnie na kanfierencyju «Novaja Biełaruś» Śviatłana Cichanoŭskaja i jakich novych piersanažaŭ hledačy nieŭzabavie pabačać u vykanańni dziaŭčyny.
«Kali baču pierad saboj vielmi śmiešnaha čałavieka, amal na 100% upeŭnienaja, što ŭ jaho było niaprostaje dziacinstva»
Natalla naradziłasia ŭ Barysavie.
«Maci ŭ mianie biełaruska. A tata sa Słavianska (Danieckaja vobłaść). Častka našaj siamji znachodzicca ŭ Maryupali, ale suviazi ŭ mianie ź imi ciapier niama».
U dziacinstvie dziaŭčyna vymušana źmianiła čatyry škoły — dźvie ŭ Barysavie i jašče dźvie ŭ Minsku. U pieršaj navučalnaj ustanovie Nata padpała pad biaźlitasny bulinh adnakłaśnikaŭ i kłasnaj kiraŭnicy.
«Ja zaŭsiody była takim zabitym dziciem — moža tamu. Ja stała ŭ pramym sensie izhojem i rasła voś z hetaj traŭmaj adčužeńnia. Dumaju, kali b ja raskazała pra bulinh maci, jana b tam z usimi razabrałasia, ale ja pramaŭčała. Mahčyma, mnie nie chaciełasia pryznavać, što sa mnoj «niešta nie tak». Mahčyma, heta było žadańnie abaranić baćkoŭ ad pieražyvańniaŭ.
Mnie zdajecca, ja intuityŭna znajšła dla siabie vyjście być śmiešnaj, bo zaŭvažyła, što, kali duraśliviš, adrazu robišsia dušoj kampanii.
Tak i zdaryłasia ŭ novaj škole. Ja błaznavała, usie śmiajalisia, dobryja emocyi ŭsie lubiać. Tak i sfarmavała sabie biaśpiečnaje asiarodździe. Na žal, koštam pahoršanych adznak, bo ŭvieś resurs sychodziŭ na toje, kab uvieś čas być častkaj sacyjalnaha žyćcia kłasa. Viadoma, dumaju, uva mnie jość i štości pryrodnaje humarnoje. Ale ahułam
kali ja baču pierad saboj nu vielmi śmiešnaha čałavieka, ja amal na 100% upeŭnienaja, što ŭ jaho było niaprostaje dziacinstva».
U emihracyi Nata praciahnuła navučańnie ŭ EHU na miedyjakamunikacyi. Z toj tolki roźnicaj, što paśla 2020‑ha ŭžo nie mahła pryjazdžać dadomu kožnyja vychodnyja. Tradycyi nie zastałosia, jak i ŭsioj biełaruskaj častki žyćcia:
«Nikoli nie dumała, što bolš nie pabaču Biełarusi tak doŭha».
Kali pačaŭsia ŭvieś žach z hvałtam i aryštami paśla vybaraŭ-2020, Nata dapamahała dakumientavać fakty katavańniaŭ dla pieradačy materyjałaŭ u Haahu.
«Z taho pieryjadu ŭ mianie dahetul zastaŭsia niervovy cik», — pryznajecca jana.
«U drennym stanie padumała, što mnie varta siabie niejak viesialić — tak ja zapisała pieršy rolik»
U emihracyi pa vyniku ŭsich padziej i napružanaj pracy Natu nakryła mocnaja depresija.
«Ja amal dva hady znachodziłasia ŭ žudasnym stanie, nie mahła sama zhatavać sabie pajeści, žyła na ježy z dastavak — pakietami ad jaje ŭ mianie była zavalenaja ŭsia maleńkaja arendnaja kvatera, ja mahła praspać 20 hadzin na sutki. U niejki momant ja adčuła, što prosta nie mahu z saboj žyć, ale i pamirać nie chaciełasia. Ja nabrała 30 kiłahramaŭ.
I stajaŭ vybar, ci dałučycca da «kłubu 27», ci pačać adnaŭlacca i vykaraskacca. Niejak zmahła ŭziacca za rozum — znajšła novaha psichijatra zamiest psichołaha, jakaja tolki mnie naškodziła, zapisałasia da endakrynołaha. Mnie vypisali «Azempik». I ŭ hetym drennym stanie ja padumała, što mnie varta siabie niejak viesialić — tak ja zapisała pieršy rolik».
«Kali pa Dubai pačało prylatać ad Irana, u Emiratach zrabili vialiki zakaz na błohieraŭ, jakija rabili byccam pad kapirku adny i tyja ž roliki kštałtu «ja nie bajusia, ja viedaju, chto nas abaraniaje», majučy na ŭvazie arabskich šejchaŭ. Mnie heta padałosia vielmi śmiešnym, i ja zrabiła taki ž rolik, tolki z Łukašenkam».
Paśla byŭ rolik z ruskim turystam u Jeŭropie, jaki ličyŭ, što Varšava — heta spradviečna ruski horad i što ŭ Rastovie piva tańniejšaje. Vyjšła taksama parodyja na biełaruskaha aktyvista ŭ emihracyi, zacyklenaha na ličbavaj biaśpiecy, i navat na prapahandysta Ryhora Azaronka.
Siońnia ŭ Natalli ŭžo ceły nabor piersanažaŭ, jakija majuć svaju bijahrafiju. Naprykład, Žanna Amapaŭna, jakaja pieražyvaje za ŭščamleńnie ruskaj movy i savieckich artystaŭ i imkniecca praduchilić u Biełarusi kalarovyja revalucyi. Ci maskvička Ninel, aburanaja smakam bulbianych pankiejkaŭ i adsutnaściu biarozavaha małaka ŭ kaviarniach «Biełoruśsii».
Pieršyja tysiačy prahladaŭ Nata ŭsprymała jak vypadkovaść, ale ciapier jaje roliki lohka źbirajuć pa sotni tysiač i bolš. Asabliva publicy zachodziać vypuski pra ruskich turystaŭ i libierałaŭ.
«Biełarusy nibyta spakojnyja, ale varta ich začapić «Biełoruśsijej», i jany samymi ahresiŭnymi robiacca»
Paśla taho, jak roliki pačali zalatać, ich łahičnym atrybutam stali chiejtarskija kamientary — najpierš ad tych, chto ŭsprymaje piersanažaŭ Naty za čystuju manietu.
«Na dniach mianie pierapościŭ adzin ruskamoŭny pablik. Nibyta voś pa-surjoznamu durnaja maskvička nie moža ŭ Minsku biezłaktoznaje małako znajści. Nu i tam praciahvajuć sypacca kamientary, «kab ja jechała dadomu ŭ Maskvu», tam užo ich pad šeść tysiač.
Jašče cikavaje nazirańnie: biełarusy nibyta spakojnyja, ale varta ich začapić «Biełoruśsijej», i jany samymi ahresiŭnymi robiacca. Pychlivyja pavodziny ruskich u krainie biełarusaŭ vielmi razdražniajuć. I ja mahu ich zrazumieć. Biełarusy, jakija mnie tam pad rolikam biazhłuździcu niejkuju pisali i abražali, ja vas usich vydatna razumieju, ja z vami zhodnaja! Chacia jość i tyja, chto piša, što ja nibyta čarhovy zachodni prajekt dla taho, kab raźjadnać ruskich i biełarusaŭ».
Nata padkreślivaje, što robić videa vyklučna pa kajfie. Chacia niekatoryja arhanizacyi ŭžo zaprašali jaje zdymać parodyi za hrošy i na zakaz.
«Kaniečnie, u mianie pry takim raskładzie było b bolš resursaŭ — na toj ža rekvizit. Ale tady ŭ mianie ŭžo nie budzie tvorčaj niezaležnaści. Heta była b zdrada majoj isnaj aŭdytoryi i zdrada samoj sabie. Ja, kaniečnie, dziakuju za prapanovy, ale vietliva admaŭlajusia.
U mianie pazicyja takaja: kali vy ličycie moj kantent važnym, možacie prosta dać mnie hrošaj, biez vystaŭleńnia KPI. Abo možacie padtrymać mianie adrazu praktyčna — voś, naprykład, mnie patrebnaja novaja mabiłka dla zdymak, leapardavyja abcasy. A jašče čałaviek, u jakoha jość savieckaja mašyna i jaki moža dać mahčymaść źniacca ź joj».
Bolšaść kamientataraŭ, tolki razumiejučy, što pierad imi humarystyčnyja roliki, chiejtarskuju intanacyju adrazu pieraklučajuć na reśpiektavańnie. Vyklučeńniem tut chiba što źjaŭlajucca vajskoŭcy z Rasii, jakija takoha humaru nie razumiejuć.
«Mnie niejak pisaŭ adzin ruski SVAšnik, što jon, maŭlaŭ, pakazvaje maje roliki svajoj dačce i pužaje mnoj, kštałtu ja pačvara, a ja jamu adkazała, što mnie škada jaho dačku, i zabłakavała. Papraŭdzie, chiejt daŭno na mianie nijak nie ŭpłyvaje, usio ž školny bulinh mianie zahartavaŭ».
«Kamanda Piatruchina pasłała mianie na*uj i abazvała sukaj»
Toje, što hladač bačyć na videa, — amal zaŭsiody stoadsotkavaja impravizacyja.
«U mianie prosta dosyć vialikaja nahledžanaść. Psichijatr kaža, što ja zvyšadčuvalny čałaviek. I z adnaho boku praz heta ja vielmi pakutuju, ale z druhoha — mahu zaŭvažać rečy, padteksty, na jakija niechta nie źviarnuŭ by ŭvahi»
Pa svajoj inicyjatyvie Nata ŭ vobrazie Žanny Amapaŭny naviedała apošniuju kanfierencyju «Novaj Biełarusi», dzie jaje nahledžanaść jakraz padkazvała joj, jak udała padkałoć i Śviatłanu Cichanoŭskuju, i pradstaŭnika «Biełpoła», i eks-palitviaźnia Mikołu Dziadka, i błohiera Siarhieja Piatruchina.
Hetamu repartažu ŭžo paśpieła reśpiektnuć Śviatłana Cichanoŭskaja
«Praŭda, kamanda apošniaha pa vyniku pasłała mianie na*uj i abazvała sukaj. Jany stajali na vulicy i śpiecyjalna zdymali ŭsich, chto prychodziŭ na kanfierencyju. Nu i ja vyrašyła, što budu zdymać Piatruchina ŭ adkaz u vobrazie Žanny Amapaŭny. Maŭlaŭ, jon moj čałaviečak, biedny, na kanfu nie puścili, ale ja kamu treba dała na łapu i prajdu… Ale adzin z členaŭ ich kamandy schapiŭ mianie za ruku i chacieŭ advieści da palicyi».
Nata kaža, što rolik ź Piatruchinym i Žannaj Amapaŭnaj jašče źjavicca na jaje staroncy.
U budučyni dziaŭčyna chacieła b realizavać šmat piersanažaŭ — naprykład, biełaruskuju sudździu, a taksama razbavić partfolia inšymi prapahandystami.
Azaronak ža pakul na stopie.
«Jon mnie prosta ahidny. Tolki časam ź jaho śmiešna. Mnie cikavyja kanfliktnyja piersanažy. Z Azaronkam ža ŭsio zrazumieła».
Nata ličyć, što sakret taho, što jaje roliki zalatajuć — u ich praŭdzivaści. Bo ŭsie situacyi jana padhladaje ŭ žyćci, paznačajučy sabie ŭ natatnik nastupnuju «achviaru».
«Hetyja videa — heta moj sposab davać rady našaj žudasnaj realnaści. Tamu kašmaru, jaki atačaje mianie. Tak, kantekst i babł mohuć mianiacca, ale ŭ cełym naša realnaść sapraŭdy žudasnaja», — pryznajecca surazmoŭca.
Natalli pryjemna, što vialikaja kolkaść aŭdytoryi hladzić jaje znutry Biełarusi.
«Naprykład, u rolika pra prajd u Vilni, jaki ja ahladała ŭ vobrazie prapahandystki, bolšaja častka aŭdytoryi biełaruskaja».
Ciapier čytajuć
«Na takuju ch**niu paviałasia». Rasijanka pryjechała ź Sibiry ŭ Biełaruś i ciapier z maciukami raskazvaje, jak tut składana žyć32
Kamientary