Maładaja minskaja hrumierka pakinuła dziaciej u babuli i pajechała ŭ Čalabinsk u łabaratoryju pa vyrabie narkotykaŭ
Nastaśsia Hierasimovič spačatku sama bałavałasia narkotykami, a paśla atrymała prapanovu, ad jakoj nie zmahła admovicca.
Čalabinski abłasny sud vynies prysud pa spravie ab stvareńni bujnoj narkałabaratoryi. Siarod asudžanych — biełaruska Nastaśsia Hierasimovič, jakaja raniej pracavała hrumierkaj (stryhła chatnich žyvioł). Na «Anłajniery» ŭ jaje vysoki bał — 4,8 — za dziasiatki vykananych zakazaŭ.
Ad kursaŭ hruminhu da narkałabaratoryi
36‑hadovaja Nastaśsia Hierasimovič była zarehistravanaja ŭ Baranavickim rajonie, a faktyčna žyła ŭ Minsku. U jaje vyšejšaja adukacyja, jana ŭ razvodzie, z dvaimi małymi dziećmi. Pierad adjezdam ź Biełarusi Nastaśsia pakinuła dziaciej svajoj maci — u svaich pakazańniach u sudzie jana śćviardžała, što pajechała ŭ Maskvu na kursy hruminhu, jakija joj nibyta paabiacaŭ apłacić znajomy.
Pavodle viersii abarony, mienavita hety znajomy i jaho siabar paśla padmanam i pad pahrozami prymusili Nastaśsiu pracavać u padpolnaj łabaratoryi pa vyrabie narkotyku miefiedronu ŭ Čalabinskaj vobłaści. Hierasimovič zapeŭnivała sud, što śpiecyjalna psavała abstalavańnie i paviedamiła kaardynaty łabaratoryi znajomamu apieratyŭniku ŭ Biełarusi, kab dapamahčy raskryć złačynstva.
Sud hetuju viersiju adchiliŭ jak niepraŭdzivuju. U pryhavory adznačajecca, što Hierasimovič dobraachvotna i śviadoma ŭvajšła ŭ skład arhanizavanaj hrupy dziela zarobku, volna pieramiaščałasia pa horadzie (jaje bačyli ŭ handlovym centry), pastajanna atrymlivała na bankaŭskija karty pieravody ad nieviadomych asob, aktyŭna pierapisvałasia z kalehami pra chod «varki» narkotyku i navat prapanoŭvała ŭdaskanaleńnie abstalavańnia.
Schiema i łabaratoryja
Adnym z kiraŭnikoŭ hrupy byŭ rasijanin Alaksiej Stupin, jon padbiraŭ kadry na vytvorčaść. Mienavita Stupin u kancy 2023 hoda ŭ Minsku zavierbavaŭ Hierasimovič i jašče dvaich biełarusaŭ (u prysudzie ich imiony zasakrečanyja) dla pracy «łabarantami» — za abiacanyja $500 za kožny vyrableny kiłahram miefiedronu, a paźniej Hierasimovič piersanalna prapanavali $2000 za adzin cykł «varki». Stupin apłaciŭ im avijabilety z Maskvy ŭ Čalabinsk i pieradaŭ hrošy na bytavyja vydatki.
U studzieni 2024 hoda troje biełarusaŭ pryjechali ŭ horad Mias Čalabinskaj vobłaści, dzie źniali kvateru. Chimičnyja reaktyvy dla vytvorčaści zabrali z haraža ŭ susiednim horadzie, a samu łabaratoryju raźmiaścili ŭ damku na sadovym učastku — z reaktaram, vientylacyjaj i śpiecyjalnym abstalavańniem, zamaskiravanym pad zvyčajnuju haspadarčuju pabudovu. Hierasimovič i jaje saŭdzielniki vyrabili miefiedron ahulnaj masaj nie mienš za 18,3 kiłahrama.
28 lutaha 2024 hoda palicyja praviała ŭ łabaratoryi pieratrus i aryštavała Hierasimovič razam z dvuma saŭdzielnikami, kanfiskavaŭšy hatovy narkotyk, reaktar i chimičnaje abstalavańnie.
Stupin, jaki da taho času kaardynavaŭ pracu łabaratoryi na adlehłaści, znachodziačysia na Bali, byŭ zatrymany tolki praź miesiac, kali viarnuŭsia ŭ Rasiju rejsam z Dubaja.
Prysud
Vyśvietliłasia taksama, što raniej, jašče ŭ Biełarusi, Hierasimovič karali za nabyćcio i zachoŭvańnie narkotykaŭ. Tady jana atrymała dva hady kałonii, ale z adterminoŭkaj vykanańnia — praz najaŭnaść małych dziaciej.
Čalabinski abłasny sud pryznaŭ Stupina i Hierasimovič vinavatymi pavodle častki 5 artykuła 228.1 Kryminalnaha kodeksa Rasii (niezakonnaja vytvorčaść narkotykaŭ arhanizavanaj hrupaj, u asabliva bujnym pamiery).
Jon atrymaŭ 16 hadoŭ źniavoleńnia ŭ kałonii strohaha režymu, biełaruscy dali 10 hadoŭ u kałonii ahulnaha režymu.
Kamientary
>36‑hadovaja
Da ładna vam