Na Biełaruskim radyjo biez papiaredžańnia pierastali tranślavać katalickuju imšu

Pra heta raskazali ŭ sacsietkach vierniki napiaredadni minułaj niadzieli — pavodle ich, tranślacyi nie było ŭžo dva tydni. I sapraŭdy, u niadzielu 12 lipienia ŭ efiry radyjo imša znoŭ nie hučała, zamiest jaje hrała kłasičnaja muzyka.

Heta paćviardžaje infarmacyja na sajcie radyjo, dzie pieraličvajecca ŭsio, što było ŭ efiry pa chvilinach. U prahramie pieradač u 8.15 była paznačanaja prahrama «Katalickaja propaviedź», a pa fakcie ŭ efiry była «Tematyčnaja rubryka».

Pavialičyć

Adna ź viernic patłumačyła, čamu tranślacyja imšy pa radyjo vielmi važnaja, a inšyja vierniki pasprabavali daviedacca, što zdaryłasia i ci čakać adnaŭleńnia tranślacyi.

Pavodle žycharki nievialikaha horada, jana maje lažačuju svajačku, jakaja słuchaje radyjo i ŭžo šmat hadoŭ molicca dziakujučy tranślacyi śviatoj imšy. Ciapier jana adčuvaje vialiki stres praz toje, što ŭžo try tydni nie moža dałučacca da nabaženstva.

Taki vypadak — nie adziny. Mnohija pažyłyja vierniki nie majuć mahčymaści rehularna byvać u chramie na imšy, tamu dystancyjna z dapamohaj radyjo dałučajucca da malitvy. Ź minskaha archikatedralnaha i inšych kaściołaŭ Biełarusi viadziecca videa-tranślacyja ŭ internecie, ale znoŭ ža mnohija pažyłyja ludzi nie majuć hadžetaŭ i dostupu ŭ internet. Akramia taho, tranślacyja imšy pa radyjo maje važnaje jevanhielizacyjnaje značeńnie.

Pavialičyć

Pry hetym pravasłaŭnaja pieradača «Duchoŭnaje słova» pa-raniejšamu hučyć na radyjo, a katalickaja pieradača — nie.

Jak daviedalisia vierniki, u parafii archikatedralnaha kaścioła nie mieli infarmacyi pra toje, što tranślacyja imšy nie viadziecca. Parafijanie nazirali, jak dziela efiru słužbu ŭ 8.15 pravodziać litaralna pa siekundamiery — śpiecyjalna dla taho, kab ukłaścisia ŭ adviedzieny na radyjo čas.

Tak imšu i praciahvali adpraŭlać ŭvieś hety čas. Atrymlivajecca, parafiju nie papiaredzili pra toje, što tranślacyja spynienaja.

U prahramie pieradač radyjo na biahučy tydzień «Katalickaja propaviedź» znoŭ značycca ŭ niadzielu ŭ 8.15. Vierniki spadziajucca, što hetym razam imša prahučyć i što pryčyny prypynieńnia tranślacyi byli techničnymi.

Katalickaja imša tranślujecca apošnija piać hadoŭ paśla adnaŭleńnia pieradačy ŭ 2021 hodzie, kali na adras uładaŭ i kiraŭnictva Biełteleradyjokampanii źviarnuŭsia tahačasny Apostalski administratar Minska-Mahiloŭskaj archidyjacezii Kazimir Vielikasielec.

• 0
• 0
• 0
• 0
• 0
• 0
• 0
• 0