Zabojcu ŭ Buda-Kašaloŭskim rajonie znajšli praz 17 hadoŭ. Jon adbyvaje pakarańnie za zabojstva inšaj siamji z čatyroch čałaviek
Hetaja historyja pačałasia 25 sakavika 2009 hoda.
Pasažyr dyziel-ciahnika Žłobin — Homiel padčas prajezdu pad mostam kala vioski Kalinina zaŭvažyŭ kala čyhunki mužčynu, jaki lažaŭ na ziamli.
Padumaŭšy, što niećviarozy čałaviek upaŭ z mosta i maje patrebu ŭ dapamozie, jon patelefanavaŭ u milicyju. Vyśvietliłasia, što mužčyna miortvy. Na ciele byli vidavočnyja prykmiety hvałtoŭnaj śmierci, piša BiełTA.
Vyśvietliłasia, što zahinuły — raniej sudzimy 42‑hadovy žychar Branskaj vobłaści Rasii, jaki złoŭžyvaŭ ałkaholem. Pryčynaj śmierci stała tupaja traŭma cieła. Niahledziačy na pryniatyja miery, raskryć złačynstva pa haračych śladach nie ŭdałosia.
Sioleta była atrymana ad rasijskich kaleh važnaja infarmacyja, i byŭ ustanoŭleny padazravany ŭ zabojstvie. Im staŭ 58‑hadovy nieadnarazova sudzimy žychar Branskaj vobłaści.
Jon byŭ znajomy z achviaraj i napiaredadni zdareńnia dapamahaŭ jamu ŭ prodažy doma, atrymaŭšy častku prybytku ad ździełki. Zatym jon paabiacaŭ dapamahčy paciarpiełamu z pracaŭładkavańniem u Biełarusi. Pa darozie pamiž imi ŭźnik kanflikt, jaki pryvioŭ da trahiedyi.
Pryčym budakašaloŭski zabojca ŭtrymlivajecca pad vartaj u siabie na radzimie pa abvinavačańni ŭ zabojstvie siamji z čatyroch čałaviek, učynienym u 1997 hodzie.
Vyśviatlajucca inšyja fakty złačynnaj dziejnaści padazravanaha ŭ Biełarusi.
Kamientary