Kryścina Cimanoŭskaja raskazała pra Niedasiekava, jaki nie moža na jaje zabycca, i pracu na «Biełsat» pa-biełarusku

Padčas efiru ŭ Marata Markava Niedasiekaŭ užo nie ŭpieršyniu na publiku raskazaŭ historyju, jakaja byccam by adbyłasia padčas sumiesnaha navučańnia ŭ Respublikanskaj vučelni alimpijskaha reziervu. Pa ŭspaminach skakuna, Cimanoŭskaja nibyta tady vykanała narmatyŭ majstra sportu (u bolšaści byŭ tolki pieršy razrad), paśla čaho skazała, što ŭsie, chto nižej za kandydata ŭ majstry, nie majuć prava na jaje hladzieć. Maŭlaŭ, užo tady jana «nadzieła karonu». 

— Vierahodna, vy ŭžo čuli, što kazaŭ pra vas Niedasiekaŭ. Što dumajecie z hetaj nahody?

— Ščyra, ja pra heta navat nie viedała, pakul u mianie nie pačali pytacca siabry i znajomyja. I heta, napeŭna, najlepš pakazvaje, nakolki mnie heta abyjakava. U mianie dastatkova svaich zadač i metaŭ, kab marnavać čas na padobnyja rečy.

Zvyčajna ja nie kamientuju prydumanyja historyi ź minułaha. Ale zaŭsiody cikava nazirać, jak ludzi ŭspaminajuć «maładość», kali skazać niešta pa spravie ŭžo nie atrymlivajecca. Historyi z razradu «mnie kaliści padałosia» — słaby arhumient. Pra «karonu» — heta subjektyŭna. A voś vykazvańni pra vajnu, jakija, jak ja bačyła, taksama byli z boku Niedasiekava, maŭlaŭ, jon ździŭlajecca, čamu ŭkrainskija spartsmieny nie razmaŭlajuć, — heta fakt. I pierš čym ździŭlacca, čamu z taboj jany nie razmaŭlajuć, varta ŭspomnić nie čužyja słovy dziesiacihadovaj daŭniny, a svaje — zusim niadaŭnija. Jak ty vykazvaŭsia pra vajnu.

Časam prablema nie ŭ tych, chto ciabie atačaje, a ŭ niazdolnaści źviazać ułasnyja słovy ź ich nastupstvami. Bo pavaha stračvajecca nie praz čyjuści «karonu», a praz adsutnaść razumieńnia, dzie prachodziać miežy. Časam dastatkova prosta pieračytać, što ty kazaŭ u 2022 hodzie. Pamiać — karysnaja funkcyja. Jak i łohika. Ale, zdajecca, nie va ŭsich jana ŭ profili.

— Jak ličycie, čamu jon znoŭ pra vas zhadaŭ, dy jašče takim čynam?

— Mahčyma, sprava ŭ tym, što ja praciahvaju vystupać na mižnarodnaj arenie i pakazvać vyniki. U takim vypadku ty mižvoli pačynaješ čaściej źjaŭlacca ŭ poli zroku. A dalej užo kožny spraŭlajecca z hetym pa-svojmu. Niedasiekaŭ vyrašyŭ uspomnić mianie ŭ takim kantekście.

— A ŭvohule, ci była takaja historyja, pra jakuju jon uspaminaje?

— Nie, viadoma. Heta historyja z razradu «mnie kaliści padałosia». Prablema takich historyj u tym, što jany nie patrabujuć nijakich dokazaŭ — možna skazać usio, što zaŭhodna. Pytańnie tolki ŭ tym, navošta čałaviek heta robić.

— A čamu Niedasiekaŭ tak «niaroŭna» da vas stavicca? U 2021 hodzie, kali vas vysyłali ź Japonii, jon chacieŭ, kab vas pakarali.

— Nu, tady jon tak kazaŭ, tamu što łukašyst. Što tut jašče dadać? Navat nie ŭjaŭlaju, čamu ad jaho da mianie stolki ŭvahi.

— Jon uspaminaje, jakoj vy nibyta byli ŭ Respublikanskaj vučelni alimpijskaha reziervu. A sam jon jakim byŭ?

— Nie mahu adkazać, bo ź im nie kamunikavała. Nijak nie acharaktaryzuju jaho ni jak spartsmiena, ni jak čałavieka. I ŭvohule nie chaču raźvivać hetuju temu, bo heta ŭžo padobna da vyśviatleńnia ŭ piasočnicy — chto ŭ kaho rydlovačku skraŭ.

— Ciapier vy pracujecie i na «Biełsacie», raskazvajecie, jak pravilna zajmacca sportam. Jak pačałasia hetaja supraca?

— Z pradstaŭnikami telekanała paznajomilisia, kali davała im intervju jašče da zimovaha vyjezdu ŭ Amieryku. Tady ŭ razmovie źjaviłasia ideja, što było b cikava rabić rubryku pra bieh. Redaktarka skazała, što joj padabajucca maje videa ŭ Instagram, i heta možna adaptavać pad farmat kanała. Ja padtrymała hetuju ideju, i my damovilisia viarnucca da jaje paźniej. Kali ja viarnułasia ŭ Polšču, prosta realizavali toje, što ŭžo abmierkavali.

Ja pajšła na «Biełsat», bo jak spartsmienka maju što dać ludziam. Heta mahčymaść dzialicca dośviedam, pakazvać, jak pravilna treniravacca, jak rychtavacca, jak pracavać nad saboj. Dla mianie heta nie prosta «rubryka», a sposab praz sport prynosić realnuju karyść i natchniać ludziej ruchacca i zajmacca saboj.

— Abmiarkoŭvałasia, na jakoj movie vieści rubryku?

— Tak, abmiarkoŭvałasia, bo kanał biełaruskamoŭny. U mianie była mahčymaść vieści pa-rusku, ale vybrać biełaruskuju — heta było majo rašeńnie.

Dla mianie važna, jakija kaštoŭnaści ja tranśluju, u tym liku praz movu. Biełaruskaja — heta častka majoj identyčnaści, i ja chaču jaje raźvivać, a nie ihnaravać. Tamu ŭ prahramie havaru na biełaruskaj movie, a ŭ siabie ŭ błohu — pa-rusku, bo ŭ mianie tam roznaja aŭdytoryja i ja vybrała adzinuju dla ŭsich movu. Ale pry hetym atrymała šmat stanoŭčych vodhukaŭ za toje, što viadu rubryku pa-biełarusku.

Rychtujusia da kožnaha vypusku, u tym liku ŭ moŭnym płanie. Dla mianie važna, kab usio hučała naturalna i zrazumieła. Jak rychtujusia? U pieršuju čarhu, viadoma, čytaju scenar. Starajusia jaho zapomnić, ale časta padčas zdymak padhladvaju. Viadoma ž, čytaju z telefona zakadravuju častku — tuju, dzie prosta hučyć moj hołas. Padčas zdymak redaktarka časam vypraŭlaje majo vymaŭleńnie i naciski — ja ŭsio ž mahu pamylacca. Časta praskokvajuć polski akcent i polskija słovy. Ale ahułam vieści rubryku pa-biełarusku mnie dastatkova kamfortna i lohka.

Płanujem pracavać z «Biełsatam» usio leta, a dalej pahladzim. Kali farmat budzie adhukacca, dumaju, heta moža stać bolš doŭhaj historyjaj.

— I skončym sportam. Jakija ŭ vas najbližejšyja spabornictvy?

— 25 i 26 lipienia ŭ Biełastoku projdzie čempijanat Polščy pa lohkaj atletycy, ja biahu 100 i 200 mietraŭ. I vielmi prašu padtrymki i biełarusaŭ, i palakaŭ. Vielmi chaču vykanać narmatyŭ, kab trapić na čempijanat Jeŭropy. Tamu padtrymka adnaznačna patrebna.

• 24
• 0
• 0
• 0
• 0
• 0
• 0
• 5