Minčanka źniała kanflikt pamiž padletkami, paśla čaho ich vyklikali ŭ milicyju

U roliku jana adznačyła, što «kraina pavinna viedać svaich hierojaŭ», i zaklikała baćkoŭ kryŭdziciela «dać jamu papružki», piša Onliner.by.

Incydent adbyŭsia kala vaśmi hadzin viečara. Marharyta razam sa svaim trochhadovym synam siadzieli na łaŭcy kala doma, jeli maroziva i zdymali pra heta rolik.

— U niejki momant ja pačuła svarku pamiž padletkami, jakija byli niepadalok: dvoje abražali svajho pryjaciela, jaki, vidać, byŭ maładziejšy za ich. Pačuŭšy niecenzurnyja słovy, ja zrabiła tym dvum zaŭvahu, ale ŭ adkaz atrymała poŭnaje ihnaravańnie.

Pavodle surazmoŭcy, kanflikt praciahvaŭsia kala paŭhadziny. U niejki momant jana pačuła kryk i ŭklučyła kamieru.

— Sam udar i momant padzieńnia ja źniać nie paśpieła. Ale kali padyšła bližej, ubačyła padletka, jaki lažaŭ na asfalcie, i dvuch kryŭdzicielaŭ pobač ź im. Liču, što tak być nie pavinna, tamu i apublikavała ŭ svaim Instagram hety rolik z prośbaj maksimalnaha raspaŭsiudžvańnia. Chłopčyk, jakoha źbili, prasiŭ nie raskazvać pra zdareńnie jaho baćkam i admoviŭsia ad dapamohi. U toj ža čas ja paličyła nieabchodnym nadać hetaj historyi ahałosku, bo liču, što heta najlepšy sposab pakarańnia za takija ŭčynki.

Rolik Marharyty, u jakim jana zaklikała baćkoŭ kryŭdziciela dać jamu ramnia i kazała, što «kraina pavinna viedać svaich hierojaŭ», ubačyli nie tolki bolš za 50 tysiač padpisčykaŭ, ale i supracoŭniki milicyi.

U aŭtorak, 14 lipienia, vypadak prakamientavali ŭ MUS. U viedamstvie paviedamili, što abodvuch udzielnikaŭ kanfliktu chutka ŭstanavili. Imi byli školniki z Frunzienskaha rajona Minska. Kryŭdzicielu — 13 hadoŭ, paciarpiełamu chłopčyku — 12.

«Padletkaŭ razam z baćkami zaprasili ŭ RUUS dla raźbiralnictva. Padčas hutarki vyśvietliłasia, što chłopcy siabrujuć i razam trenirujucca ŭ adnym sa staličnych futbolnych kłubaŭ. U dzień kanfliktu jany razam ź inšymi znajomymi pajšli hulać paśla naviedvańnia letniaha školnaha łahiera. Padčas sumiesnaha adpačynku pamiž padletkami ŭźnikła nieparazumieńnie, jakoje i pryviało da incydentu», — paviedamili ŭ MUS.

Pa fakcie zdareńnia pravodzicca pravierka. Taksama ŭ viedamstvie adznačyli, što baćki paciarpiełaha školnika admovilisia pisać zajavu ab pryciahnieńni vinavataha da adkaznaści. Ź niepaŭnaletnimi i ich zakonnymi pradstaŭnikami supracoŭniki milicyi praviali prafiłaktyčnuju hutarku.

• 0
• 0
• 4
• 3
• 1
• 0
• 1
• 0