Mihranty z Uźbiekistana, jakija tolki pryjechali, paprasili viarnuć ich ź Biełarusi: abiacanych zarobkaŭ niama
«Za 500 dalaraŭ pracavać nie budziem. Čym tak, lepš by vy nas nazad va Uźbiekistan adpravili».
9 lipienia padčas vizitu ŭ Biełaruś prezidenta Uźbiekistana Šaŭkata Mirzijojeva Minsk i Taškient padpisali mižuradavaje pahadnieńnie ab arhanizavanym nabory i pracaŭładkavańni hramadzian Uźbiekistana dla časovaj pracy ŭ Biełarusi.
Užo na hetym tydni ŭ Biełaruś prybyła delehacyja z Andyžanskaj vobłaści na čale ź jaje kiraŭnikom (chakimam) Šuchratbiekam Abdurachmanavym. Amal adnačasova ŭ krainu vylecieła i pieršaja hrupa z 255 žycharoŭ vobłaści, jakija vykazali žadańnie pracavać u Biełarusi.
«Hetyja hramadzianie ŭ Biełarusi buduć zabiaśpiečany vysokaapłatnymi pracoŭnymi miescami, adpaviednymi ŭmovami pracy i sacyjalnymi harantyjami», — paviedamlaŭ telehram-kanał chakima.
Adnak, kali vieryć videazvarotu, apublikavanamu siońnia ŭ sacyjalnych sietkach, realnaść akazałasia inšaj.
Na zapisie, zroblenym, imavierna, u Viciebsku, vialikaja hrupa mužčyn źviartajecca da Šuchratbieka Abdurachmanava i skardzicca na ŭmovy, jakija im prapanavali paśla pryjezdu.
Pavodle ich słoŭ, padčas sustrečy z pradstaŭnikom pracadaŭcy im paviedamili, što zarobak składzie kala 500 dołaraŭ na miesiac, a vydatki na charčavańnie i pražyvańnie jany pavinny buduć nieści samastojna.
«Jon skazaŭ: kali jość praca bolš čym na 500 dalaraŭ, dyk idzicie, ja bolš hrošaj nie dam. Zarobak — 500 dalaraŭ, charčavańnie za tvoj košt, za žyllo sam płaciš», — raskazvajuć mihranty.
Jany śćviardžajuć, što na takija ŭmovy nie pahadziŭsia nichto.
«Usie astatnija my — nie, za 500 dalaraŭ pracavać nie budziem», — kažuć jany.
Adzin z mužčyn tłumačyć, što paśla apłaty asnoŭnych vydatkaŭ ad zarobku amal ničoha nie zastaniecca.
«Kali my tut budziem pracavać za 500 dalaraŭ, kali 200 dalaraŭ pojdzie na ježu, jašče kala 100 — na myła, myćcio i inšyja bytavyja patreby, to niama nijakaha sensu pracavać tut za 200 dalaraŭ, marnavać čas i pakutavać», — kaža jon.
Paśla hetaha aŭtar zvarotu źviartajecca da kiraŭnika vobłaści z prośbaj dapamahčy:
«Čym tak, lepš by vy nas nazad va Uźbiekistan adpravili».
Inšy ŭdzielnik videa śćviardžaje, što na radzimie jany mohuć zarabić bolš.
«Va Uźbiekistanie my bolš za heta zarablajem. Nam kažuć: «Idzicie». Ale abiacali, što da viečara ŭsio vyrašać. Voś my i prosim vas heta vyrašyć».
Na momant publikacyi Ahienctva mihracyi Uźbiekistana i inšyja adkaznyja viedamstvy situacyju aficyjna nie prakamientavali.
Nahadajem, napiaredadni Alaksandr Łukašenka sustrakaŭsia z chakimam Andyžanskaj vobłaści Šuchratbiekam Abdurachmanavym i prapanavaŭ jamu nie abmiažoŭvacca supracoŭnictvam ź Viciebskaj vobłaściu, a razhledzieć mahčymaść nakiroŭvać pracoŭnych mihrantaŭ taksama ŭ Mahiloŭskuju.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary