Kanada ŭvodzić vysokija myty na amierykanskija tavary. Heta adkaz na takija ž kroki Trampa
Kanada vyrašyła adkazać na novyja handlovyja abmiežavańni ZŠA pavyšeńniem mytaŭ na šerah tavaraŭ z Amieryki. Pra heta zajaviŭ ministr finansaŭ Kanady Fransua-Filip Šampań.
Novyja taryfy składuć ad 15% da 50% i pačnuć dziejničać apoŭnačy 8 vieraśnia. Pad ich trapiać, u pryvatnaści, amierykanskija stal i aluminij, małočnaja pradukcyja, bytavaja technika, ryba i morapradukty, mebla, adzieńnie, instrumienty i abstalavańnie.
Najvyšejšaja staŭka — 50% — budzie dziejničać dla vyrabaŭ sa stali i aluminiju. Raniej dla ich prymianiałasia pošlina ŭ pamiery 25%. Takaja ž staŭka zakranie niekatoryja inšyja katehoryi tavaraŭ, u tym liku naturalny miod, meblu i adzieńnie.
Pošlina ŭ 25% budzie ŭviedzienaja na bytavuju techniku, małočnuju pradukcyju, u tym liku syr, rybu i morapradukty, a taksama niekatoryja tavary sa stali i aluminiju.
Dla asobnych vidaŭ instrumientaŭ i abstalavańnia, u tym liku sistem kandycyjanavańnia pavietra, staŭka składzie 15%.
Adnačasova kanadskija ŭłady abviaścili pakiet padtrymki na 5,4 miljarda dalaraŭ ZŠA, abo 7,5 miljarda kanadskich dalaraŭ. Hetyja srodki pryznačanyja dla dapamohi pradpryjemstvam i rabotnikam, jakija pacierpiać ad handlovaha kanfliktu.
Kanada pajšła na takija miery paśla taho, jak ZŠA abviaścili pra ŭviadzieńnie 50‑pracentnych pošlin na častku kanadskaha impartu. Pieramovy pamiž dźviuma krainami ab novym handlovym pahadnieńni na minułym tydni zaviaršylisia biezvynikova.
Premjer-ministr Kanady Mark Karni nazvaŭ rašeńnie Vašynhtona pamyłkovym i zajaviŭ, što Kanada budzie dziejničać simietryčna. Pavodle jaho słoŭ, padčas pieramoŭ Atava prajaŭlała «prahmatyzm, ciarpieńnie i nastojlivaść».
Karni taksama zajaviŭ, što Donald Tramp choča nanieści surjozny ŭdar pa bujnych halinach kanadskaj pramysłovaści, u tym liku pa aŭtamabilnaj. Tramp abviaściŭ, što sa studzienia amierykanskija pošliny na kanadskija lehkavyja i hruzavyja aŭtamabili, a taksama aŭtazapčastki buduć padvojenyja — da 50%.
U aŭtorak Tramp znoŭ raskrytykavaŭ Kanadu, nazvaŭšy jaje samaj «niesastuplivaj» krainaj. Jon zajaviŭ, što kanadskija pošliny na niekatoryja amierykanskija sielskahaspadarčyja tavary dasiahajuć 400% i bolš, i abvinavaciŭ Kanadu ŭ tym, što jana na praciahu dziesiacihodździaŭ karystałasia ZŠA.
Kamientary