Litva budzie praviarać usio tranzitnaje zbožža, jakoje idzie ź Biełarusi i Rasii
Litva budzie praviarać pachodžańnie ŭsiaho tranzitnaha zbožža, jakoje pastupaje z Rasii i Biełarusi. Takoje rašeńnie pryniaŭ ministr sielskaj haspadarki Litvy Kiastucis Mažejka, kab nie dapuścić vykarystańnia litoŭskaj transpartnaj infrastruktury dla pieravozki zbožža, jakoje moža być skradzienaje na akupavanych terytoryjach Ukrainy.
Mažejka źviarnuŭsia ŭ Dziaržaŭnuju charčova-vieterynarnuju słužbu z daručeńniem nieadkładna pačać pravierku pachodžańnia ŭsich partyj zbožža z Rasii i Biełarusi. Pravierka pavinna tyčycca jak furažnaha, tak i charčovaha zbožža, niezaležna ad jaho pryznačeńnia.
Pavodle słoŭ ministra, adzinaja sistema kantrolu nieabchodnaja dla taho, kab Litva mahła svoječasova vyjaŭlać padazronyja hruzy i nie dapuskać tranzitu ŭkrainskaha zbožža, jakoje mahło być niezakonna vyvieziena z akupavanych terytoryj.
Z maja minułaha hoda Litva razam z Ukrainaj i Vialikabrytanijaj vykarystoŭvaje śpiecyjalnuju schiemu pravierki zbožža. U jaje ramkach furažnaje zbožža, jakoje zachoŭvajecca na mytnych składach, prachodzić abaviazkovyja łabaratornyja daśledavańni.
Adnak litoŭskija ŭłady zaŭvažyli, što maršruty i sposaby afarmleńnia niekatorych hruzaŭ źmianiajucca. Častka zbožža moža pieravozicca pavodle sproščanaj pracedury pramoha tranzitu abo afarmlacca jak charčovaje, što dazvalaje paźbiehnuć pravierak.
Tamu ministr zaklikaŭ uzmacnić supracoŭnictva pamiž Dziaržaŭnaj charčova-vieterynarnaj słužbaj i Mytnym departamientam. Infarmacyja pra tranzitnyja hruzy pavinna pastupać słužbam svoječasova, kab jany mahli vyznačać patencyjna ryzykoŭnyja partyi i praviarać ich jašče da taho, jak jany pakinuć terytoryju Litvy.
Napiaredadni litoŭskaja słužba ŭžo ŭziała ŭ porcie ŭzory adnoj z partyj zbožža. Jość padazreńni, što jano pachodzić nie z Rasii, jak paznačana ŭ dakumientach, a z Ukrainy, i mahło być niezakonna vyvieziena z akupavanaj terytoryi, paśla čaho dastaŭlena praz Kalininhrad.
Uzory zbožža ŭziali z mytnaha składa ŭ Kłajpiedzie i adpravili dla daśledavańnia ŭ łabaratoryju ŭ Francyi. Vyznačeńnie krainy pachodžańnia moža zaniać ad dvuch da troch tydniaŭ.
Raniej Kiastucis Mažejka zajaŭlaŭ, što Rasija moža pasprabavać vyvozić ukrainskaje zbožža praz party Łatvii i Litvy. Tamu litoŭskija ŭłady ciapier chočuć uzmacnić kantrol za ŭsimi takimi tranzitnymi pastaŭkami.
Polskija fiermiery ŭziali ŭ arendu 26 tysiač hiektaraŭ pad Słonimam. Za piać hadoŭ karovy stali davać u 6 razoŭ bolš małaka
U Novarasijsku spyniŭ pracu apošni z troch zbožžavych terminałaŭ
Rasija atakuje Čornaje mora, pad udaram ukrainskija party i sudny. Nakolki heta krytyčna?
10 čałaviek zahinuli ŭ porcie Adesy ŭ vyniku ŭdaru pa sudnie, jakoje pieravoziła zbožža
Kamientary
Dy jašče skradzienaha ŭ ŭkraincaŭ?
Oteta pavarot!