Kitaj zachapiŭ sakretnyja detali ad amierykanskich źniščalnikaŭ F-35
Abiedźvie detali byli pakrytyja radyjołakacyjna-pahłynalnym materyjałam, jaki vykarystoŭvajecca dla pavyšeńnia małaprykmietnaści samalota.
Urad Kitaja atrymaŭ sakretnyja detali amierykanskaha źniščalnika-nievidzimki F-35, jakija padčas adpraŭki z Aŭstralii ŭ ZŠA ź niezrazumiełych pryčyn apynulisia ŭ Hankonhu. Pra heta Bloomberg paviedamili krynicy, znajomyja ź incydentam.
Pavodle źviestak ahienctva, u kancy maja kampanija UPS pieravoziła lichtar kabiny i dźviery zbrojevaha adsieka ad F-35. Abiedźvie detali vytvorčaści Lockheed Martin byli pakrytyja radyjołakacyjna-pahłynalnym materyjałam, jaki vykarystoŭvajecca dla pavyšeńnia małaprykmietnaści samalota.
Pa darozie ŭ ZŠA samalot, jaki pieravoziŭ detali, sieŭ u Paŭdniovaj Karei, paśla čaho jaho nakiravali ŭ Hankonh. Čamu adbyłasia hetaja pasadka i pieranakiravańnie, nieviadoma. Taksama niezrazumieła, ci było heta zroblena naŭmysna, ci adbyłosia pamyłkova. Adnak paśla hetaha, jak raspaviali dźvie krynicy, kitajskija ŭłady atrymali detali i pakul ich nie viarnuli.
Zaraz jak minimum dva kamitety Kanhresa ZŠA rasśledujuć toje, što adbyłosia.
Pientahon zajaviŭ, što zajmajecca viartańniem detalaŭ. Pradstaŭnik Lockheed Martin u Aŭstralii paviedamiŭ, što detali byli niaspraŭnymi i «ličacca małaryzykoŭnymi z punktu hledžańnia ich ekspłuatacyjnaha vykarystańnia». Ministr abarony Aŭstralii Ryčard Marłz raspavioŭ, što Kanbiera vyvučaje ŭsie abstaviny incydentu.
ZŠA i ich sajuźniki razhladajuć mahčymaść dostupu Kitaja da technałohij F-35 jak adčuvalnaje pytańnie.
Sienatar-demakrat ad Mičyhana Elisa Słotkin zajaviła Bloomberg, što Kitaj pastajanna sprabuje atrymać infarmacyju pra amierykanskuju vajskovuju techniku. Były analityk Daśledčaj słužby Kanhresa Džej Džej Hiertler adznačyŭ, što ZŠA nie pavinny davać patencyjnym praciŭnikam mahčymaść vyvučać svajo ŭzbrajeńnie, piša Moscow Times.
F-35 — adzin z asnoŭnych sučasnych amierykanskich źniščalnikaŭ. Samaloty hetaha typu zakupili kala 20 krain, u tym liku Aŭstralija, Paŭdniovaja Kareja, Japonija i Sinhapur.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž20
Kamientary