Radasłaŭ Sikorski cpasyłaŭsia na krynicy, jakim «daviaraje».
Spasyłajučysia na krynicy, jakim «daviaraje», Radasłaŭ Sikorski zajaviŭ, što Alaksandr Łukašenka nie pieramoh na prezidenckich vybarach u Biełarusi.
«Isnuje vierahodnaść taho, što Łukašenka hetych vybaraŭ nie vyjhraŭ. Pavodle źviestak, atrymanych nami ŭ pačatkovaj fazie vybaraŭ [ad aŭtorka da suboty – Red.] było 30% hałasoŭ, a ŭ niadzielu hety vynik dasiahnuŭ 40%. Heta byŭ najlepšy vynik siarod usich kandydataŭ, ale nie pieramoha ŭ pieršym tury. Čałaviek, jaki pieramoh na vybarach, pavodle aficyjnych źviestak, z takim vialikim adryvam [79%, pavodle CVK], nie prymaŭ by rašeńnia ab takim žorstkim razhonie apazicyi, aryšcie praciŭnikaŭ», skazaŭ Sikorski ŭ intervju «Haziecie Vyborčaj».
U televizijnaj prahramie «Kropka nad i» ministr zamiežnych spraŭ vykazaŭsia jašče bolš rezka: «Pavodle źviestak z krynic, jakim my daviarajem, prezident Łukašenka hetych vybaraŭ nie vyjhraŭ».
Ministr zamiežnych spravaŭ Polščy zajaviŭ, što jana maje namier pravodzić tuju ž palityku ŭ dačynieńni da Biełarusi, jak raniej. — Palityka ŭ dačynieńni da Minska była palitykaj abumoŭlenaści. Adkazaŭ na žesty i kroki Łukašenki ŭ kirunku libieralizacyi. Heta nie my źmianili našu palityku, heta Łukašenka źmianiŭ praviły hulni, rastłumačyŭ Sikorski.
Pres-sakratar polskaha MZS paviedamiŭ taksama, što ŭčora ŭranku Sikorski mieŭ «žorstkuju» telefonnuju razmovu ź ministram zamiežnych spraŭ Biełarusi Martynavym. U časie jaje jon zapatrabavaŭ nieadkładnaha vyzvaleńnia ŭsich zatrymanych i aryštavanych. U tym liku i tych, jakija nie ŭdzielničali ŭ manifiestacyi, a byli zatrymany jak dziejačy apazicyi 20 śniežnia. Pres-sakratar polskaha MZS adznačyŭ, što Sikorski pravioŭ kansultacyi pa Biełarusi ź ministrami zamiežnych spraŭ Šviecyi, Niamieččyny, z šefam dypłamatyi ES Ketryn Eštan, a taksama z Radaj nacyjanalnaj biaśpieki ZŠA. Paśla hetaha jon abmiarkoŭvaŭ biełaruskaje pytańnie z prezidentam Polščy Branisłavam Kamaroŭskim.
Učora ž źjaviŭsia zvarot vieteranaŭ «Salidarnaści», u jakim tyja zaklikajuć śviet być ź biełarusami ŭ hety ciažki dla biełaruskaha naroda momant. Zvarot padpisali eks-premjer Mazaviecki, žurnalist Michnik i inšyja znakavyja dla Polščy postaci.
Ciapier čytajuć
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ15
Kamientary