Pieršymi z postsavieckich krain budziem na Alimpijadzie! Biełarusy pieramahli čechaŭ 1:0

Vyrašalny hoł zabiŭ abaronca Jahor Filipienka.

U Olbarhu ŭ matčy za 3-je miesca i pucioŭku na letniuju Alimpijadu 2012 hoda zbornaja Biełarusi vyjhrała ŭ kamandy Čechii ź likam 1:0. Biełaruś pieršaj z postsavieckich krain trapić na Alimpijadu. Ni Rasija, ni Ukraina takoha honaru nie dabivalisia. Kamanda SSSR udzielničała ŭ Alimpijadzie ŭ Sieule ŭ 1988 hodzie, tady jašče pad kiraŭnictvam pamiatnaha šmat kamu treniera Anatola Byšaŭca. Tady ŭ paŭfinale savieckaja kamanda pierajhrała italjancaŭ, a ŭ finale — brazilcaŭ.

Za hety čas źmianiŭsia rehłamient spabornictvaŭ. Siońnia alimpijskija ŭznaharody asprečvajuć moładzievyja kamandy, jakija atrymlivajuć ŭzmacnieńnie ŭ vyhladzie troch vopytnych majstroŭ. Pucioŭki ž u finał razyhryvajucca na moładzievych kantynientalnych turnirach. Jeŭropie adviedziena ŭsiaho čatyry alimpijskija licenzii. Voś tamu postsavieckija krainy i nie prachodzili hustaha sita adboru.

Čechija — Biełaruś — 0:1 (0:0).

Čechija: Vaclik; Lećjaks (Kavaržyk, 13), Mazuch, Čelustka, Vacha, Horžava, Dočkał, Hiecaŭ, Suchi, Chramasta, Hłoŭšak (Kozak, 46);

Biełaruś: Hutar; Maćviejčyk (Palakoŭ, 76), Palicievič, Filipienka, Vieraciła, Pierapiečka (Baha, 34), Sivakoŭ, Drahun, Niachajčyk, Varankoŭ, Skavyš (Rekiš, 87).

Hoł — Filipienka, 88.

Papiaredžańni: Vacha, Kozak, Vieraciła, Varankoŭ, Skavyš. Hutar.

Vydaleńnie — Vacha.

Matč vyjšaŭ davoli nudnym — zavialikaja adkaznaść lažała na jašče maładych spartoŭcach. U pieršaj pałovie hulni inicyjatyvaj vałodali češskija futbalisty, a biełarusy ŭ asnoŭnym adbivalisia i vielmi redka pahražali bramie supiernikaŭ. Paśla pierapynku chod hulni źmianiŭsia i ŭžo kamanda Hieorhija Kandraćjeva stała nasiadać. Paśla ž vydaleńnia češskaha futbalista Vachi — jon padyhraŭ sabie ŭ atacy rukoj, a ŭžo mieŭ adno papiaredžańnie ŭ hetaj sustrečy raniej — biełarusy zachapili inicyjatyvu całkam. U vyniku biełarusy damahlisia svajho — na 89-j chvilinie hulni Jahor Filipienka zabiŭ pieramožny hoł, jaki vyvieŭ našu kamandu na Alimpijadu ŭ Łondanie-2012.

Darečy, pavodle praviłaŭ čempijanatu, bronzavyja miedali dastanucca i biełarusam, i čecham. A voś pucioŭka na Alimpijadu była tolki adna.

Da hetaha z pradstaŭnikoŭ hulniavych vidaŭ sportu tolki baskietbalistki žanočaj zbornaj Biełarusi damahalisia prava vystupać na Alimpijskich hulniach. Jany zaniali 6-je miesca ŭ Piekinie-2008.

Siońnia pozna viečaram u Orchusie ŭ hulni za zołata čempijanatu Jeŭropy sustrenucca kamandy Ispanii i Šviejcaryi. Biełaruskija amatary futboła mohuć ubačyć pajadynak u žyvym efiry Pieršaha telekanała, a 21.35. Šviejcarcy, nahadajem, u vyjhrali ŭ biełarusaŭ u hrupie, a ispancy — u paŭfinale.

Biełaruskaja fiederacyja futboła paviedamlaje, što nacyjanalnaja moładzievaja — budučaja alimpijskaja — zbornaja Biełarusi vierniecca ŭ Biełaruś zaŭtra 26 červienia, u niadzielu, u Nacyjanalny aeraport «Minsk-2». Rejs V2-848 z Frankfurta prylataje, a 18.05.

Varta adznačyć, što biełaruskija fany na trybunach u Olbarhu vyviesili hihancki bieł-čyrvona-bieły ściah.

• 0
• 0
• 0
• 0
• 0
• 0
• 0
• 0