Беларусь казённая: саламяны брыль, дранікі і «язык» замест мовы
З нагоды запуску абноўленай версіі афіцыйнага сайта Рэспублікі Беларусь з чыноўніцкіх вуснаў прагучала шмат патэтычных слоў — пра патрыятызм і ўсё такое. Але тых, хто клікне на беларускамоўную версію, чакае аблом. Піша ў сваім блогу на НН Аляксандр Класкоўскі.
26 чэрвеня ў «алмазе ведаў» прэзентаваны праект Belarus.by. З нагоды запуску абноўленай версіі афіцыйнага сайта Рэспублікі Беларусь прагучала шмат патэтычных слоў — пра патрыятызм і ўсё такое. Але тых, хто клікне на беларускамоўны варыянт, чакае аблом.
«Распрацоўшчыкі пастараліся зрабіць новую версію максімальна прывабнай і зручнай для замежных карыстальнікаў: на сайце з'явіліся відэаролікі і флэш-анімацыя, пры падрыхтоўцы тэкставай інфармацыі рэдактары пастараліся адысці ад афіцыйнага стылю, падаваць яе сцісла і проста», — рэкламуе новы прадукт ўрадавае агенцтва.
Першая намесніца кіраўніка прэзідэнцкай адміністрацыі Наталля Пяткевіч на прэзентацыі пашкадавала, што асобныя інтэрнет-рэсурсы даюць «суб’ектыўны погляд» на падзеі ў краіне. «Прааналізаваўшы праз пошукавік па слове “Беларусь” інтэрнет-рэсурсы, часам складваецца ўражанне, што Беларусь — гэта толькі мітынгі, дэманстрацыі і нічога станоўчага тут не адбываецца», — зазначыла чыноўніца.
Ох ужо гэтая нязбыўная мара афіцыйных дзеячаў пра нейкія рафінавана «аб’ектыўныя» СМІ! Напэўна, трэба, каб іх рабілі робаты.
Вядома ж, чыноўнікаў бянтэжыць, што непадкантрольны Байнет паказвае Беларусь не так прыгожа, як хацелася б. Ачарняльнікі, што з іх возьмеш! Таму перыядычна агучваецца ідэя нейкага «правільнага» супермегапартала, які пераплюнуў бы ўсе «нячэсныя» сайты. На прэзентацыі ў «алмазе ведаў» рэфрэнам гучала, што афіцыйны сайт РБ мусіць стаць сапраўдным «тварам краіны».
Не абышлося без традыцыйнага маралізатарства на адрас прэсы ды патрыятычнай патэтыкі. Паводле Пяткевіч, медыі, інтэрнет-рэсурсы «мусяць усведамляць сваю адказнасць, бо яны паказваюць сваю радзіму, краіну, дзе жывуць яны і іх бацькі». Патрыятызм жа, маўляў, гэта «не ідэалагічнае паняцце, а маральны аспект кожнага чалавека».
Усё добра, вось толькі да беларускамоўнай версіі прэзентаванага супермегапартала нашы дзяржаўныя патрыёты падышлі чакана — паводле астаткавага прынцыпу. Паведамляецца, што беларускамоўны кантэнт з’явіцца толькі з 4 верасня.
Скажуць: дык гэта ж найперш на замежнікаў разлічана! Таму спачатку па-англійску і па-руску.
Ну, па-першае, не шкодзіла б паважаць нашу шматлікую дыяспару. Ды і суайчыннікаў таксама. Не ўсе ж выракліся мовы.
Што ж да заходніх дзелавых людзей, то наўрад ці яны будуць пралічваць рызыкі для інвестыцый, арыентуючыся на казённы супермегапартал з дзядзькам у саламяным брылі і выявай дранікаў на галоўнай старонцы.
Ды і калі пайсці ўглыб, то, напрыклад, раздзел «Бізнэс-асяроддзе Беларусі» адкрываецца здымкам тэхнікі МТЗ на чыгуначных платформах з бадзёрай тэкстоўкай «Адпраўка мінскіх трактароў спажыўцам».
Між тым днямі сеціва абышоў іншы здымак: доўгі ланцуг «Беларусаў» віецца вакол завода, бо іх няма куды збываць.
Так што замежнікі, якія захочуць атрымаць адэкватную інфу пра сінявокую рэспубліку, хутчэй праскануюць «нячэсныя» рэсурсы. Яны ж умеюць лічыць грошы. Ну а прапагандысцкая жуйка ім і дарма не патрэбная.
Канечне, парталы з агульнай інфармацыяй аб краіне — рэч не лішняя. Асабліва калі не грузіць іх таннай прапагандай. Вось толькі паменей бы непатрэбнага чыноўніцкага пафасу. У эпоху твітэр-рэвалюцый пражэкты, як пашыхтаваць сеціўную публіку ці навязаць у інтэрнеце манаполію афіцыёзу, проста смеху вартыя. Гэта ж вам не падпіска на дзяржпрэсу :)
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін3
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1616
Каментары