Зяленскі: Расія тройчы здымала авіябазы ЗША ў Саудаўскай Аравіі перад ударам Ірана
У выніку ўдару па авіябазе былі параненыя 12 амерыканскіх вайскоўцаў і знішчаны дарагі амерыканскі самалёт далёкага радыёлакацыйнага выяўлення і кіравання AWACS.
Прэзідэнт Украіны Уладзімір Зяленскі заявіў, што Расія тройчы ажыццяўляла спадарожнікавую здымку авіябазы ЗША ў Саудаўскай Аравіі за некалькі дзён да таго, як Іран нанёс удар па гэтым аб’екце і параніў амерыканскіх вайскоўцаў, піша «Украінская праўда».
Падчас інтэрв’ю NBC News Зяленскі падзяліўся вытрымкай з штодзённай справаздачы, якую ён атрымлівае ад украінскіх спецслужбаў.
У справаздачы адзначалася, што расійскія спадарожнікі зрабілі здымкі авіябазы «Прынц Султан» у Саудаўскай Аравіі 20, 23 і 25 сакавіка.
27 сакавіка Іран нанёс удар па базе, на якой дыслакуюцца амерыканскія і саудаўскія войскі. Паводле звестак амерыканскіх чыноўнікаў, у выніку ўдару былі параненыя 12 амерыканскіх вайскоўцаў. СМі паведамілі таксама, што быў знішчаны дарагі амерыканскі самалёт далёкага радыёлакацыйнага выяўлення і кіравання AWACS.
Зеленскі адзначыў, што, зыходзячы з вопыту Украіны, неаднаразовае фатаграфаванне аб’ектаў Расіяй на працягу некалькіх дзён з’яўляецца прыкметай падрыхтоўкі да нападу.
«Мы ведаем, што калі яны робяць здымкі адзін раз, то рыхтуюцца. Калі робяць здымкі другі раз, гэта падобна на сімуляцыю. У трэці раз гэта азначае, што праз адзін-два дні яны атакуюць», — сказаў ён.
У той жа час NBC News адзначае, што Зяленскі не прывёў доказаў адносна расійскіх спадарожнікавых здымкаў, а таксама не паведаміў, як Украіна пра гэта даведалася.
Зяленскі заявіў, што «на 100%» упэўнены: Расія перадае такую разведывальную інфармацыю Ірану, каб дапамагчы яму наносіць удары па амерыканскіх войсках на Блізкім Усходзе.
«Я лічу, што Расія зацікаўленая ў тым, каб дапамагаць іранцам. І я не веру — я ведаю — што яны абменьваюцца інфармацыяй… Ці дапамагаюць яны іранцам? Вядома. На колькі працэнтаў? На сто працэнтаў», — сказаў украінскі прэзідэнт.
Ён таксама выказаў меркаванне, што кіраўнік Расіі Уладзімір Пуцін спадзяецца на «доўгую вайну на Блізкім Усходзе».
«[Пуцін] атрымлівае выгаду, немалую выгаду, ад гэтай вайны», — сказаў Зяленскі, паказаўшы на рост цэн на нафту і часовую адмену некаторых амерыканскіх санкцый у дачыненні да расійскай нафты, што азначае дадатковыя даходы для Крамля.
Каментары