Вядомая расійская спявачка і яе беларускі муж, дарадца Кадырава, перавялі на лячэнне трохгадовай Ксюшы з СМА больш за 100 тысяч еўра
Літаральна за дзень дабрачынны рахунак у расійскіх рублях, адкрыты для збору на ратавальны ўкол для трохгадовай Ксюшы з Магілёва, папоўніўся амаль на 100 тысяч еўра — прычым адной транзакцыяй.
За такі магутны рывок у зборы валанцёры падзякавалі спявачцы Кэці Тапурыя, салістцы гурта «А-Студыё», і кампаніі яе мужа. Гаворка ідзе пра Льва Дзяньгова (Паўла Гузбанда) — ураджэнца Мінска, бізнэсмена, які пры гэтым з’яўляецца дарадцам кіраўніка Чачні Рамзана Кадырава і дзяржсакратара Саюзнай дзяржавы Дзмітрыя Мезенцава.
«Мы хочам выказаць бязмежную, велізарную падзяку нашым галоўным чараўнікам за гэты магутны рывок — Кэці Тапурыя, яе мужу, іх кампаніі і супрацоўнікам! Вы падарылі нам крылы і веру ў тое, што ўсё магчыма. Дзякуй вам за ваша добрае сэрца, за неабыякавасць і за тое, што вы з намі ў гэтым нялёгкім змаганні», — напісалі валанцёры ў акаўнце, у якім дзеляцца навінамі па зборы.
Леў Дзяньгоў — вядомая фігура ў палітычным і грамадскім жыцці Расіі, а з нядаўніх часоў — і ў біятэхналагічнай галіне. Ён скончыў школу ў Мінску, але вышэйшую адукацыю атрымаў у Расіі і Нямеччыне. Яго прозвішча стала шырока вядомае ў другой палове 2010‑х у сувязі з асабістым удзелам у працэсе вызвалення з-за крат у Лівіі расійскіх і беларускіх грамадзян.
У канцы 2022 года Леў Дзяньгоў стварыў кампанію «Адам бія». Па паведамленнях СМІ, у пачатку 2023‑га яна заключыла кантракт на рэалізацыю прадукцыі БНБК на расійскім рынку на суму 11,82 млрд расійскіх рублёў (каля $150 млн). У пачатку гэтага ж года Леў Дзяньгоў стаў дарадцам кампаній CITIC International Investments і CITIC Construction у Расіі і Беларусі. Адна з іх, СІТІС International Investments, з'яўляецца адным з заснавальнікаў і ключавых акцыянераў БНБК. У стварэнні карпарацыі бралі таксама ўдзел беларуская дзяржава і група кампаній з Вялікабрытаніі і ААЭ (пазней іх склад зведаў змены).
Афіцыйна комплекс вытворчасці кармоў, прэміксаў і амінакіслот, размешчаны ў Пухавіцкім раёне, быў запушчаны ў лістападзе 2022 года. Для забеспячэння яго сыравінай БНБК былі перададзеныя гаспадаркі ў пяці раёнах краіны з агульным зямельным фондам звыш 100 тыс. га.
Таксама Дзяньгоў увайшоў у раду дырэктараў Беларускай нацыянальнай біятэхналагічнай карпарацыі.
У тым ліку дзякуючы пераводу Дзяньгова і Тапурыі, на сёння на ўкол для Ксюшы засталося сабраць 30% ад агульнай сумы — крыху больш за 510 тысяч даляраў.
Каментары
2) і чаму так званая "Саюзнай дзяржавы" не ў косках ?