Biełaruś kazionnaja: sałamiany bryl, draniki i «jazyk» zamiest movy
Z nahody zapusku abnoŭlenaj viersii aficyjnaha sajta Respubliki Biełaruś z čynoŭnickich vusnaŭ prahučała šmat patetyčnych słoŭ — pra patryjatyzm i ŭsio takoje. Ale tych, chto kliknie na biełaruskamoŭnuju viersiju, čakaje abłom. Piša ŭ svaim błohu na NN Alaksandr Kłaskoŭski.
26 červienia ŭ «ałmazie viedaŭ» prezientavany prajekt Belarus.by. Z nahody zapusku abnoŭlenaj viersii aficyjnaha sajta Respubliki Biełaruś prahučała šmat patetyčnych słoŭ — pra patryjatyzm i ŭsio takoje. Ale tych, chto kliknie na biełaruskamoŭny varyjant, čakaje abłom.
«Raspracoŭščyki pastaralisia zrabić novuju viersiju maksimalna pryvabnaj i zručnaj dla zamiežnych karystalnikaŭ: na sajcie źjavilisia videaroliki i fłeš-animacyja, pry padrychtoŭcy tekstavaj infarmacyi redaktary pastaralisia adyści ad aficyjnaha stylu, padavać jaje ścisła i prosta», — rekłamuje novy pradukt ŭradavaje ahienctva.
Pieršaja namieśnica kiraŭnika prezidenckaj administracyi Natalla Piatkievič na prezientacyi paškadavała, što asobnyja interniet-resursy dajuć «subjektyŭny pohlad» na padziei ŭ krainie. «Praanalizavaŭšy praz pošukavik pa słovie “Biełaruś” interniet-resursy, časam składvajecca ŭražańnie, što Biełaruś — heta tolki mitynhi, demanstracyi i ničoha stanoŭčaha tut nie adbyvajecca», — zaznačyła čynoŭnica.
Och užo hetaja niazbyŭnaja mara aficyjnych dziejačaŭ pra niejkija rafinavana «abjektyŭnyja» ŚMI! Napeŭna, treba, kab ich rabili robaty.
Viadoma ž, čynoŭnikaŭ biantežyć, što niepadkantrolny Bajniet pakazvaje Biełaruś nie tak pryhoža, jak chaciełasia b. Ačarnialniki, što ź ich voźmieš! Tamu pieryjadyčna ahučvajecca ideja niejkaha «pravilnaha» supiermiehapartała, jaki pieraplunuŭ by ŭsie «niačesnyja» sajty. Na prezientacyi ŭ «ałmazie viedaŭ» refrenam hučała, što aficyjny sajt RB musić stać sapraŭdnym «tvaram krainy».
Nie abyšłosia biez tradycyjnaha maralizatarstva na adras presy dy patryjatyčnaj patetyki. Pavodle Piatkievič, miedyi, interniet-resursy «musiać uśviedamlać svaju adkaznaść, bo jany pakazvajuć svaju radzimu, krainu, dzie žyvuć jany i ich baćki». Patryjatyzm ža, maŭlaŭ, heta «nie ideałahičnaje paniaćcie, a maralny aśpiekt kožnaha čałavieka».
Usio dobra, voś tolki da biełaruskamoŭnaj viersii prezientavanaha supiermiehapartała našy dziaržaŭnyja patryjoty padyšli čakana — pavodle astatkavaha pryncypu. Paviedamlajecca, što biełaruskamoŭny kantent źjavicca tolki z 4 vieraśnia.
Skažuć: dyk heta ž najpierš na zamiežnikaŭ raźličana! Tamu spačatku pa-anhlijsku i pa-rusku.
Nu, pa-pieršaje, nie škodziła b pavažać našu šmatlikuju dyjasparu. Dy i suajčyńnikaŭ taksama. Nie ŭsie ž vyraklisia movy.
Što ž da zachodnich dziełavych ludziej, to naŭrad ci jany buduć praličvać ryzyki dla inviestycyj, aryjentujučysia na kazionny supiermiehapartał ź dziadźkam u sałamianym bryli i vyjavaj dranikaŭ na hałoŭnaj staroncy.
Dy i kali pajści ŭhłyb, to, naprykład, raździeł «Biznes-asiarodździe Biełarusi» adkryvajecca zdymkam techniki MTZ na čyhunačnych płatformach z badzioraj tekstoŭkaj «Adpraŭka minskich traktaroŭ spažyŭcam».
Miž tym dniami sieciva abyšoŭ inšy zdymak: doŭhi łancuh «Biełarusaŭ» vijecca vakoł zavoda, bo ich niama kudy zbyvać.
Tak što zamiežniki, jakija zachočuć atrymać adekvatnuju infu pra siniavokuju respubliku, chutčej praskanujuć «niačesnyja» resursy. Jany ž umiejuć ličyć hrošy. Nu a prapahandysckaja žujka im i darma nie patrebnaja.
Kaniečnie, partały z ahulnaj infarmacyjaj ab krainie — reč nie lišniaja. Asabliva kali nie hruzić ich tannaj prapahandaj. Voś tolki pamieniej by niepatrebnaha čynoŭnickaha pafasu. U epochu tviter-revalucyj pražekty, jak pašychtavać sieciŭnuju publiku ci naviazać u interniecie manapoliju aficyjozu, prosta śmiechu vartyja. Heta ž vam nie padpiska na dziaržpresu :)
Kamientary