Кітайскі тэрмаядзерны рэактар устанавіў новы сусветны рэкорд
На працягу ста секунд ён працаваў на тэмпературы амаль у 120 мільёнаў градусаў Цэльсія. Ранейшы сусветны рэкорд належаў гэтай самай устаноўцы — падтрыманне тэмпературы плазмы на ўзроўні 100 мільёнаў градусаў, зноў жа, на працягу ста секунд.
Як паведамляюць дзяржаўныя кітайскія СМІ, тэрмаядзерны рэактар «штучнае сонца», што працуе ў лабараторыі ў правінцыі Аньхой, прапрацаваў на тэмпературы амаль 120 мільёнаў градусаў Цэльсія на працягу ста секунд. Падчас працы рэактар таксама дасягнуў тэмпературы 160 мільёнаў градусаў, што ў дзесяць разоў больш, чым тэмпература Сонца.
Кітайскія навукоўцы спадзяюцца, што рэактар пад назвай EAST (Experimental Advanced Superconducting Tokamak — эксперыментальны удасканалены звышправодны такамак) дапаможа кітайскаму ўраду зрабіць крок наперад у пошуках бясконцай крыніцы экалагічна чыстай энергіі, піша Daily Mail.
Наступная мэта супрацоўнікаў рэактара — дамагчыся таго, каб устаноўка працавала на стабільна высокай тэмпературы на працягу тыдня.
Рэактар EAST знаходзіцца ў горадзе Хэфэй і працуе на тэрыторыі Інстытута фізікі плазмы кітайскай Акадэміі навук. Праз тое, што ўстаноўка падчас працы стварае вялікую колькасць цяпла і энергіі, яе называюць «штучнае сонца». Асноўная мэта стваральнікаў EAST — паўтарыць натуральны працэс тэрмаядзернага сінтэзу, які адбываецца на Сонцы і ў іншых зорках, і атрымаць такім чынам крыніцу амаль бясконцай чыстай энергіі.
Тэрмаядзерная рэакцыя — працэс, калі ядры атамаў зліваюцца, у выніку чаго ствараецца велізарная колькасць энергіі. Лічыцца, што паўтарэнне такой рэакцыі ў штучных умовах — выключна цяжкая, але пры гэтым вельмі жаданая мэта ў развіцці энергетыкі.
Цяпер чытаюць
Зяленскі ў Вільні: Пакуль шпіц Лукашэнкі мае больш правоў, чым народ Беларусі27
Каментары