Kitajski termajadzierny reaktar ustanaviŭ novy suśvietny rekord
Na praciahu sta siekund jon pracavaŭ na tempieratury amal u 120 miljonaŭ hradusaŭ Celsija. Raniejšy suśvietny rekord naležaŭ hetaj samaj ustanoŭcy — padtrymańnie tempieratury płazmy na ŭzroŭni 100 miljonaŭ hradusaŭ, znoŭ ža, na praciahu sta siekund.
Jak paviedamlajuć dziaržaŭnyja kitajskija ŚMI, termajadzierny reaktar «štučnaje sonca», što pracuje ŭ łabaratoryi ŭ pravincyi Ańchoj, prapracavaŭ na tempieratury amal 120 miljonaŭ hradusaŭ Celsija na praciahu sta siekund. Padčas pracy reaktar taksama dasiahnuŭ tempieratury 160 miljonaŭ hradusaŭ, što ŭ dziesiać razoŭ bolš, čym tempieratura Sonca.
Kitajskija navukoŭcy spadziajucca, što reaktar pad nazvaj EAST (Experimental Advanced Superconducting Tokamak — ekśpierymientalny udaskanaleny zvyšpravodny takamak) dapamoža kitajskamu ŭradu zrabić krok napierad u pošukach biaskoncaj krynicy ekałahična čystaj enierhii, piša Daily Mail.
Nastupnaja meta supracoŭnikaŭ reaktara — damahčysia taho, kab ustanoŭka pracavała na stabilna vysokaj tempieratury na praciahu tydnia.
Reaktar EAST znachodzicca ŭ horadzie Chefej i pracuje na terytoryi Instytuta fiziki płazmy kitajskaj Akademii navuk. Praz toje, što ŭstanoŭka padčas pracy stvaraje vialikuju kolkaść ciapła i enierhii, jaje nazyvajuć «štučnaje sonca». Asnoŭnaja meta stvaralnikaŭ EAST — paŭtaryć naturalny praces termajadziernaha sintezu, jaki adbyvajecca na Soncy i ŭ inšych zorkach, i atrymać takim čynam krynicu amal biaskoncaj čystaj enierhii.
Termajadziernaja reakcyja — praces, kali jadry atamaŭ źlivajucca, u vyniku čaho stvarajecca vielizarnaja kolkaść enierhii. Ličycca, što paŭtareńnie takoj reakcyi ŭ štučnych umovach — vyklučna ciažkaja, ale pry hetym vielmi žadanaja meta ŭ raźvićci enierhietyki.
Ciapier čytajuć
«Kali b nie «Viasna-1996, my b byli Tatarstanam». 30 hadoŭ tamu biełarusy ŭžo pratestavali suprać Łukašenki i Rasii — jak heta było1
Kamientary