Як перасякаць украінскую мяжу ў новых умовах? Парады ад Беларускага дома ва Украіне
Некаторых беларусаў дадаткова правяраюць, некаторых проста не прапускаюць. Беларусь упусціла на сваю тэрыторыю расійскія войскі, таму Украіна ўвяла спецыяльны кантроль для беларусаў, што прыязджаюць у краіну. Колькі будзе дзейнічаць кантроль, не паведамляецца. Беларускі дом ва Украіне тлумачыць, як можна павялічыць свае шанцы на перасячэнне мяжы.
«Для любога замежніка абавязковы ПЛР-тэст альбо сертыфікат аб вакцынацыі [расійская вакцына «Спутнік» не пасуе — НН] і страхоўка з пакрыццём выпадкаў захворвання на каранавірус», — рэкамендуе Беларускі дом.
Ёсць яшчэ спіс дадатковых дакументаў. Гэта:
1. Дакументы, якія пацвярджаюць мэту ўезду (самае асноўнае).
2. Пацверджанне наяўнасці фінансаў для здзяйснення паездкі (наяўныя або выпіска з банка).
3. Наяўнасць зваротнага квітка з Украіны.
«Акрамя дакументаў, важна быць гатовым да адказаў на пытанні пагранічнікаў. Важна правільна заявіць мэту ўезду ва Украіну, — гаворыцца ў рэкамендацыі. — Прыклад: калі для выезду з Беларусі вы дэкларавалі, што едзеце ў санаторый, а на самай справе ўцякаеце ад рэпрэсій, то на ўкраінскай мяжы трэба казаць як ёсць.
Украіна зараз знаходзіцца ў перадваенным стане. Калі вы едзеце з краін ЕС альбо плануеце турыстычную паездку, раім устрымацца ад візіту да разрадкі сітуацыі на мяжы з Расіяй і Беларуссю. У іншым выпадку патрэбна падрыхтаваць максімальны пакет дакументаў для ўезду і быць маральна гатовымі да адмовы.
Калі вы заязджаеце з Беларусі ці Расіі і вам пагражае небяспека, то рэкамендуем аб планаваным перасячэнні мяжы паведаміць праваабаронцам альбо нам у бот: @bdu_infobot. Пры сабе пажадана мець дакументы, якія пацвярджаюць рэпрэсіі з боку ўладаў РБ, і быць маральна гатовымі папрасіць палітычны прытулак у пункце пропуску. Пры магчымасці, раім выбраць іншую краіну для хуткага выезду з Беларусі (напрыклад, Грузія ці краіны ЕС).
Калі вы ўжо знаходзіцеся на тэрыторыі Украіны, але патрапілі сюды нелегальна (у абыход пункта пропуску) і плануеце «здавацца», то рабіце гэта ў суправаджэнні праваабаронцаў і паведаміўшы прадстаўнікам беларускай дыяспары.
Сачыце за навінамі і ацэньвайце ўсе магчымыя рызыкі пры планаванні візітаў».
Чытайце яшчэ:
«Не пусцілі мяне і двух расіян». Беларусаў строга правяраюць украінскія памежнікі, некаторым забараняюць уезд
Аўтара YouTube-канала «Жыццё-Маліна» Мікіту Мелказёрава не ўпусцілі ва Украіну
А мы вам казалі: «не думайце, што гэта капейкі»! Сталі вядомыя звесткі, колькі падаходнага беларусы Літвы пералічылі розным грамадскім структурам24
Каментары