Самыя дарагія кватэры Мінска істотна праселі ў цане. Вось як выглядаюць варыянты за мільён даляраў і больш
Хамам, мэбля Versace, чатыры санвузлы… Паглядзелі, колькі каштуюць і як выглядаюць самыя дарагія кватэры Мінска. І як змяніліся цэны на іх.
Летась у маі ў Мінску прадавалася крыху больш за 20 кватэр па цане ад мільёна даляраў. Цяпер такіх засталося толькі 11.
«Раскошны хамам з зорным небам»
Самая дарагая кватэра ў Мінску ацэнена ў 1,8 мільёна даляраў. За апошнія восем месяцаў яна патаннела на 150 тысяч. Столькі просяць за 4-пакаёвую кватэру ў доме каля Траецкага прадмесця, які ў народзе называюць «домам Чыжа».
Кватэра агульнай плошчай 260 м² месціцца на 15 паверсе 24-павярховага каркасна-блочнага дома 2011 года пабудовы, вышыня столяў у кватэры — 3 метры.
«Раскошная 4-пакаёвая кватэра з надзвычайным відам на набярэжную Свіслачы і цэнтр горада», — гаворыцца ў апісанні.
У кватэры зроблены вытанчаны дызайнерскі рамонт, у аздобе толькі натуральныя матэрыялы. Жыллё прадаецца разам з мэбляй італьянскай вытворчасці і нямецкай тэхнікай Siemens і Liebher. У кватэры два санвузлы.
«Разыначка аднаго з санвузлоў — раскошны хамам з зорным небам», — гаворыцца ў апісанні.
«Унікальны праект у цэнтры Мінска»
Усяго на 3 540 даляраў танней прадаецца двухузроўневы пентхаус у ЖК «Графіт», што знаходзіцца па адрасе Мяснікова, 27. Агульная плошча аб'екта — 528 м², жылая — 107,5 м². Амаль 200 «квадратаў» прыходзіцца на дах з азеляненнем.
У кватэры зроблены рамонт, але прадаецца яна без мэблі і тэхнікі, таму адразу засяліцца ў жытло за амаль 1,8 мільёна даляраў не атрымаецца.
Жытло прадаўцы апісваюць як «унікальны праект у цэнтры Мінска». Восем месяцаў таму гэты аб'ект таксама быў у продажы. У маі 2022 года за яго прасілі $1 834 280.
Апроч гэтага аб'екта, у ЖК «Графіт» прадаецца яшчэ некалькі кватэр па цэнах ад 1,36 да 1,67 мільёна даляраў.
«Новае адчуванне якасці жыцця»
Наступная па дарагоўлі кватэра ацэнена ў 1,3 мільёна даляраў. За восем месяцаў яна патаннела на паўмільёна. Знаходзіцца жыллё па адрасе праспект Пераможцаў, 135Б (комплекс — D3).
Шасціпакаёўка мае агульную плошчу 270,2 м². Апартаменты месцяцца на 26-м паверсе. Фактычна за гэтыя грошы вы набываеце цэлы паверх, бо ваша кватэра будзе адзінай на ім. У ёй тры санвузлы, чатыры балконы і гардэробная.
З вокнаў кватэры адкрываецца від на вадасховішча Дразды.
Кватэра са свежым рамонтам, цалкам мэбляваная. Маецца закрыты паркінг з ацяпленнем. Жытло прадаецца разам з мэбляй і тэхнікай.
«Набываючы кватэру ў D3, вы атрымліваеце не проста квадратныя метры, а цэлы спектр памяшканняў і рашэнняў для новага адчування якасці жыцця: клуб жыхароў, вытанчаныя ўваходныя лобі з кансьержам, калясачныя, веласіпедныя, індывідуальныя кладоўкі і якасны, камфортны паркінг. Пентхаус размешчаны ў адным з найлепшых дамоў комплексу», — гаворыцца ў апісанні.
Чатыры лоджыі, два балконы і чатыры санвузлы
Чацвёртая па дарагоўлі кватэра сталіцы, як і самая дарагая, месціцца ў «доме Чыжа». Цяпер за яе просяць $1 150 000. З вясны яна патаннела на 450 тысяч даляраў. У маі яе ацэньвалі ў 1,5 мільёна.
Шасціпакаёўка месціцца на 11 паверсе. Агульная плошча — 309,5 м², жылая — 204,9 м². Тут ёсць чатыры лоджыі, два балконы і чатыры санвузлы.
«Кватэра выканана ў класічным стылі па індывідуальным дызайн-праекце», — напісана ў аб'яве.
Рамонт 2019 года. У апісанні пазначана, што перад правядзеннем рамонтных работ поўнасцю дэмантавалі старую тынкоўку і сцяжку.
Маецца сістэма рэкуперацыі паветра з ачысткай і падагрэвам да пакаёвай тэмпературы, а таксама шасцізонная сістэма кандыцыянавання Hisense з прытокам свежага паветра. Зроблены столевы роспіс.
«Мяккая мэбля выканана з масіву азіяцкіх парод дрэва. Усталяваны ўбудаваныя шафы з фасадамі з масіву дубу. Пунктавае асвятленне, а таксама люстры і бра з крышталю вытворчасці Чэхіі», — гаворыцца ў аб'яве.
У кошт кватэры з панарамнымі вокнамі і відам на цэнтр уваходзяць два машына-месцы.
Кватэра з мэбляй ад Versace
Гэта двухузроўневая кватэра прадаецца па адрасе Грыбаедава, 4. За 9-пакаёўку просяць 1,08 мільёна даляраў. Агульная плошча кватэры — 360 метраў квадратных, жылая — 205 м².
Дом пабудаваны ў 1996 годзе. Кватэра месціцца на сёмым і восьмым паверхах. У ёй ёсць гасцёўня з камінам, чатыры спальні, кабінет, два бытавыя пакоі, пакой для заняткаў спортам. Маецца саўна і джакузі.
Кватэра прадаецца з усёй мэбляй і бытавой тэхнікай. Дызайнерская мэбля Versace рабілася па індывідуальнай замове.
У цану ўваходзяць два машына-месцы на падземным паркінгу і адно месца ў двары.
У параўнанні з вясной мінулага года колькасць кватэр, выстаўленых на продаж па цэнах ад 1 мільёна даляраў, скарацілася ўдвая. Выглядае, што адбылося гэта ў першую чаргу за кошт зніжэння цэн, а не за кошт продажу кватэр.
Чытайце таксама:
Што адкрыюць на месцы даўгабуда «Магніт Мінска»
Ад 30 квадратаў. Якія сучасныя мікрадамы прадаюць у ваколіцах Мінска
Ад БНФ да ГРУ. Хто такая Наталля Судлянкова, якой чэхі загадалі пакінуць краіну27
Каментары
Остальные в качестве ресурса.
Людоедская власть скоро начнёт пожирать своих прикорытников поэтому те и продают наворованное за любые деньги.