Такую думку ў інтэрв'ю БелаПАН выказала загадчык эпідэміялагічнага аддзела Мінскага гарадскога цэнтра гігіены і эпідэміялогіі Алена Фісенка.
Большая частка насельніцтва сутыкнецца з вірусам грыпу A(H1N1). Такую думку ў інтэрв'ю БелаПАН выказала загадчык эпідэміялагічнага аддзела Мінскага гарадскога цэнтра гігіены і эпідэміялогіі Алена Фісенка.
Паводле слоў спецыяліста, гэта новы варыянт віруса грыпу, ад якога людзі пакуль не абаронены імунітэтам. «Кожны арганізм адкажа на вірус па-свойму: у кагосьці гэта можа быць лёгкі галаўны боль, хтосьці наогул не заўважыць віруса, але пры гэтым у яго з'явіцца імунітэт. А ў кагосьці, на жаль, выявіцца выражаная форма інфекцыі, у некаторых яна будзе працякаць з ускладненнямі», — сказала Фісенка.
Пра шырокае распаўсюджванне грыпу A(H1N1) сведчыць агульнасусветная статыстыка. «І мы гэтага не пазбегнем», — канстатавала загадчыца эпідэміялагічнага аддзела.
Пры гэтым Фісенка падкрэсліла, што новы вірус грыпу не трэба разглядаць асобна ад іншых формаў грыпу і ВРВІ: распаўсюджванне гэтых інфекцый — агульны працэс.
Паводле яе слоў, сёння ў задачы эпідэміялагічнага маніторынгу не ўваходзіць улік усіх выпадкаў новага віруса, што было б вельмі дарагім мерапрыемствам.
«Нават адзінкавага вылучэння выпадкаў A(H1N1) дастаткова эпідэміёлагам для заключэння, што ў Беларусі ёсць гэты вірус і што ён цыркулюе сярод людзей», — адзначыла спецыяліст.
Паводле яе слоў, сімптомы і меры прафілактыкі віруса грыпу A(H1N1) і сезоннага грыпу адны і тыя ж.
Найперш медыкі рэкамендуюць зрабіць прышчэпку супраць грыпу: у вакцыну ўваходзіць і варыянт сезоннага грыпу А, які вельмі блізкі да новага віруса і здольны ад яго абараніць. Акрамя таго, рэкамендуецца прымаць беларускі прэпарат «Арпетол» ці яго расійскі аналаг «Арбідол», імунастымулюючыя і імунамадулюючыя сродкі, карыстацца аксалінавай маззю. Спецыяліст таксама раіць па магчымасці пазбягаць месцаў з вялікай колькасцю людзей, часцей бываць на свежым паветры і праветрываць памяшканні. Хворым на грып і ВРВІ рэкамендуецца заставацца дома, а пры высокай тэмпературы выклікаць урача.
Як адзначыла Алена Фісенка, хворыя на новы вірус грыпу не патрабуюць спецыяльнага лячэння. Тым, хто знаходзіцца на амбулаторным рэжыме, прызначаюць супрацьвірусныя сродкі. Шпіталяваным хворым лячэнне прызначае ўрач. Іх, як і ўсіх астатніх інфекцыйных хворых, ізалююць у асобныя палаты.
Нагадаем, паводле слоў галоўнага дзяржаўнага санітарнага ўрача Валянціны Качан, на 1 лістапада ў Беларусі было лабараторна пацверджана 59 выпадкаў захворвання на грып А(H1N1), 30 кастрычніка іх было 39.
Цяпер чытаюць
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі1616
Каментары