У кожным раёне Мінска сёлета зробяць зоны адпачынку. Дзе іх размесцяць і што там будзе
За папярэднія гады ў сталіцы абсталявана 28 месцаў для правядзення вольнага часу жыхароў. Як правіла, іх імкнуцца ствараць паблізу рэк і вадаёмаў. У працэсе тэрыторыі чысцяць ад зараснікаў і смецця, укамплектоўваюць малымі архітэктурнымі формамі, у некаторых зонах адпачынку ўладкоўваюць экалагічныя сцежкі. Вось якія куткі прыроды горада будуць зробленыя сёлета, пішуць «Мінск-навіны».
Заводскі
Тут запланаванае ўладкаванне цэлых трох зон адпачынку. Першая — на тэрыторыі парку 50-годдзя Вялікага Кастрычніка. Яе намечана прэзентаваць да 3 ліпеня. Там ужо адрамантавалі сцежкі, замянілі апоры асвятлення, усталявалі абмежавальнікі заезду аўтатранспарту, працягваюць расчышчаць тэрыторыю. У парку плануецца ўладкаванне ўваходнай групы, святлафорнага дрэва, устаноўка нестандартных дарожных знакаў, кветачніцы-свістка, а таксама вулічных трэнажораў.
Другая зона адпачынку размесціцца паміж паліклінікай і школай на вул. Бачылы. Яе трэба будзе зрабіць да 1 жніўня. Там ужо дэмантавалі старое дарожнае пакрыццё. На тэрыторыі зробяць новыя пешаходныя сцежкі, усталююць архітэктурныя формы, выканаюць дадатковае азеляненне насаджэннямі.
Яшчэ адна зона адпачынку з'явіцца ў перспектыўным скверы ў раёне вул. Арцёма і завулку Брацкага. Яе падрыхтуюць да прыёму гасцей да канца мая. З заяўленай інфраструктуры-дзіцячая і спартыўная пляцоўкі, скрыні і лаўкі, дарожна-сцежкавая сетка. У гэтай лакацыі плануюць правесці раённы конкурс лавак, дзякуючы чаму тут з'явяцца крэатыўныя лавачкі.
Ленінскі
Сілы і сродкі накіруюць на ўладкаванне ў два этапы зоны адпачынку ў скверы Вілкаўшчына ў межах вул. Сыракомлі, вул. Я. Лучыны і вул. Гашкевіча. Там зрабілі дарожкі. Сквер стаў зелянейшым: тут высадзілі 95 дрэў. У планах паставіць малыя архітэктурныя формы, дзіцячы комплекс. Крэатыўнымі лаўкамі зону адпачынку напоўняць удзельнікі раённага конкурсу «Найлепшая лаўка». Другі этап уладкавання зоны адпачынку мае на ўвазе будаўніцтва лесвіцы і пляцоўкі для выгулу хатніх жывёл.
Маскоўскі
Да 3 ліпеня зону адпачынку ўладкуюць у садзе на вул. Сапегі. Там ужо ачысцілі тэрыторыю ад ламачча, прыбралі раслінныя адходы, выканалі санітарнае абразанне дрэў і пасадзілі кусты. Наперадзе ўстаноўка альтанак, малых архітэктурных формаў, уладкаванне дзіцячай гульнявой пляцоўкі. Да Дня горада акультураць частку зялёнага масіву, абмежаванага вул. Уманскай, вул. Чыгуначнай і пр. Дзяржынскага. Тэрыторыю рыхтуюць да абнаўлення. Тут плануецца ўстаноўка альтанак, спартыўнай пляцоўкі.
Кастрычніцкі
Першая зона адпачынку размесціцца ў парку «Курасоўшчына» з боку вул. Брэсцкай. Плануецца стварэнне дзіцячага гульнявога гарадка з бярвення. Ацаніць вынік працы мясцовыя жыхары змогуць да 3 ліпеня. А да 9 верасня зменяць тэрыторыю, прылеглую да вул. Казінца. Тут хочуць зрабіць дарожна-сцежкавую сетку, паставіць інфармацыйныя стэнды.
Партызанскі
Тут не сталі чакаць Дня Рэспублікі і ўладкавалі зону адпачынку «Ля воднай роўнядзі» ў скверы Сляпянскай воднай сістэмы ў межах вул. Філімонава і дзіцячай чыгункі да Дня Перамогі. Падчас суботніка ачысцілі тэрыторыю ад ламачча, леташняй лістоты, адрамантавалі пешаходныя сувязі. Затым усталявалі чатыры вулічныя трэнажоры для заняткаў спортам, арэлі-альтанку, два гамакі для адпачынку, а таксама дзіцячы гульнявы комплекс. Да Дня горада перамены прыйдуць у Антонаўскі парк. Там з'явяцца спартыўная і сямейная зоны, дзіцячая гульнявая пляцоўка.
Першамайскі
Працягваецца добраўпарадкаванне асобных лакацый Севастопальскага парку. Многае там ужо зроблена: пасаджана 186 дрэў, з'явіліся пешаходныя дарожкі, паставілі інфармацыйныя стэнды, указальнікі, домік для вавёрак. Наперадзе афармленне тэматычных стаянак, устаноўка лавак, скрыняў, дзіцячай пляцоўкі. Тут запланаванае правядзенне конкурсу «Найлепшы арт-аб'ект». Другі этап уключае ў сябе ўладкаванне дарожна-сцежкавай сеткі, а таксама некалькіх спартыўных пляцовак.
Савецкі
Да Дня Рэспублікі на тэрыторыі сквера Сляпянскай воднай сістэмы абяцаюць усталяваць дзіцячую і спартыўную пляцоўкі, лавачкі, уладкуюць вогнішчы, а на Цнянскім вадасховішчы падоўжаць экасцежку, абсталяваўшы новую частку краявіднымі пляцоўкамі, інфармацыйнымі стэндамі, навесамі, альтанкамі і іншай мэбляй з прыродных матэрыялаў.
Падарункам на Дзень горада для жыхароў стане дадатковае добраўпарадкаванне ў парку Дружбы народаў. З'явіцца лабірынт з кустоў, альтанкі і малыя архітэктурныя формы.
Фрунзенскі
Месцам прыцягнення мясцовых жыхароў да 3 ліпеня павінна стаць тэрыторыя каля дома №17/2 на вуліцы Фёдарава. Увосень там пасадзілі дрэвы. Далейшыя дзеянні — уладкаванне пешаходных сувязяў і ўстаноўка малых архітэктурных формаў. Узбагаціць інфраструктуру плануюць за кошт конкурсных работ прадпрыемстваў — удзельнікаў раённага агляду-конкурсу «Найлепшая лаўка». Да 9 верасня маюць намер змяніць тэрыторыю каля дома №3 на вул. Гарэцкага. Прыродны ландшафт прывялі ў парадак, цяпер на парадку дня ўладкаванне дарожна-сцежкавай сеткі з вылучэннем некалькіх тэматычных зон: мангальнай, дзіцячай і ціхага адпачынку.
Цэнтральны
У вадаёме па вуліцы Камайскай да Дня рэспублікі чакаецца ўладкаванне пешаходных сувязяў з бутавага каменю, драўлянай лесвіцы, драўлянай агляднай пляцоўкі, устаноўка дзіцячага гульнявога комплексу, лавак з навесамі-перголамі, шэзлонгаў. А да Дня горада жыхары ўбачаць працяг экасцежкі «Акно ў прыроду», размешчанай у межах ракі Свіслач, РНПЦ «Маці і дзіцяці», вул. Нававіленскай. Яе, як і іншыя зоны адпачынку, ачысцілі і дадаткова азелянілі вясной. Цяпер тэрыторыю плануюць падзяліць на некалькі лакацый з арт-аб'ектамі і інсталяцымі, драўлянымі насціламі, перголамі з раслінамі, альтанкамі.
Цяпер чытаюць
Лукашэнка абмеркаваў з Рыжанковым «крокі па аднаўленні даверу з заходнімі краінамі»7
Каментары