У выступе на ўрачыстым сходзе Лукашэнка кляйміў Захад з пазіцый панславізму, палез і ў лінгвістыку
Выступаючы ўвечары 30 чэрвеня на ўрачыстым сходзе з нагоды афіцыйнага «Дня незалежнасці», што адзначаецца 3 ліпеня, Лукашэнка тлумачыў цяперашнюю кансалідаваную пазіцыю заходняга свету супраць беларускага рэжыму і расійскага імперыялізму тым, што на Захадзе, маўляў, «вірус нянавісці да ўсяго славянскага перадаецца з пакалення ў пакаленне».
Спічрайтары гэтым разам увялі ў тэкст лукашэнкаўскага даклада нават лінгвістычныя матывы. Так, паводле слоў Лукашэнкі, які, як вядома, сам ніводнай з заходнееўрапейскіх моў не валодае, «вірус нянавісці» перадаецца заходнікам
«разам са словамі «раб» і «славянін», якія ў мовах ад англійскай і нямецкай да шведскай і французскай гучаць практычна ідэнтычна, аднолькава».
Пры гэтым са славянства, якому ёсць небяспека ад «вірусу нянавісці», не выключаецца і Польшча, якая, нягледзячы на моцнае саюзніцтва з Захадам, нібыта ўспрымаецца апошнім гэтак жа сама, як і Беларусь з Расіяй выключна дзеля славянскасці мовы, на якой палякі размаўляюць:
«Польскаму ўраду варта падумаць сваёй галавой. І найперш пра свой народ. Для Захаду палякі былі і застаюцца славянамі. А гэта — расходны матэрыял».
Пры гэтым такая панславісцкая рыторыка не нейкае ноу-хау лукашэнкаўскіх спічрайтараў, бо фактычна тое самае сёння казаў і міністр замежных спраў Расіі Сяргей Лаўроў на ўрачыстым прыёме ў беларускай амбасадзе ў Маскве з нагоды афіцыёзнага свята:
«У нашым агульным, як некалі здавалася, еўрапейскім доме пасеяна зерне нянавісці, зерне расавай перавагі, зерне адмены культуры, у тым ліку і славянскай культуры».
Чытайце таксама:
Пяскоў нічога не ведае пра планы ўзнагародзіць Лукашэнку
Лукашэнка загадаў усе дзяржорганы і арганізацыі перасадзіць на «Джылі». Не абышлося без выключэнняў
Цяпер чытаюць
Чаго чакае Польшча ад Мінска і ці закрые зноў мяжу на гэтым тыдні?16
Каментары