У КНДР збег амерыканскі салдат. Ён уцякаў смеючыся, але яго адразу арыштавалі
Гэта шараговец Трэвіс Кінг. Раней ён знаходзіўся ў дысцыплінарнай часці Кэмп Хамфрыс у Паўднёвай Карэі і накіроўваўся ў ЗША для звальнення з Узброеных сіл.
Пхеньян. Помнік Працоўнай партыі КНДР. Помнік багаты сімволікай: серп, молат і каліграфічны пэндзаль сімвалізуюць рабочых, сялян і інтэлігенцыю. Фота: ak_phuong / Getty Images
Амерыканскі салдат быў затрыманы ў Паўночнай Карэі пасля таго, як без дазволу перасёк яе мяжу, піша Бі-бі-сі.
Як пацвердзіў прадстаўнік арміі ЗША, а да таго паведамлялі ананімныя крыніцы амерыканскіх медыя, затрыманы — радавы Трэвіс Кінг. Са слоў крыніц, раней ён знаходзіўся ў дысцыплінарнай часці Кэмп Хамфрыс у Паўднёвай Карэі і накіроўваўся ў ЗША для звальнення з Узброеных сіл.
Прайшоўшы пашпартны кантроль, ён нейкім чынам здолеў вярнуцца і далучыўся да экскурсійнага туру ў памежную з Паўночнай Карэяй дэмілітарызаваную зону, якая ў жыхароў Паўднёвай Карэі і турыстаў ужо даўно стала славутасцю, нягледзячы на складаныя адносіны з Паўночнай Карэяй.
Дзяржаўны дэпартамент і Міністэрства абароны ЗША заявілі, што падчас экскурсіі ён «наўмысна, па ўласнай волі» перасёк мяжу. Аднак пакуль што ніводнае ведамства яшчэ не сказала, што ён дэзерціраваў.
Па словах аднаго з удзельнікаў гэтай экскурсіі, салдат уцякаў у Паўночную Карэю смеючыся.
«Спачатку я падумаў, што гэта проста благі жарт, але калі ён не вярнуўся, то я зразумеў, што ўсё сур'ёзна», — сказаў сведка ў інтэрв'ю амерыканскай тэлекампаніі CBS.
Прадстаўнік Дзярждэпартамента ЗША Мэцью Мілер сказаў, што яго ведамства падтрымлівае сувязь з Пентагонам і гатова аказаць любую дапамогу, калі такая спатрэбіцца.
Спачатку імя салдата з меркаванняў прыватнасці трымалася ў сакрэце, бо Белы дом хацеў паведаміць пра тое, што здарылася, яго сваякам. Аднак неўзабаве адразу некалькі агенцтваў навін заявіла, што гэтага чалавека завуць Трэвіс Кінг, ён радавы другога класа арміі ЗША.
На пытанне журналістаў, ці звязваўся Дзяржаўны дэпартамент з Паўночнай ці Паўднёвай Карэяй, Мілер сказаў, што «ўпэўнены, што мы падтрымліваем сувязь з паўднёвакарэйцамі». Ён дадаў, што Дзярждэпартамент прадстаўнікам Паўночнай Карэі не тэлефанаваў, але, наколькі яму вядома, нейкія кантакты з Пхеньянам у Пентагона мелі месца.
У 2017 годзе розгалас атрымаў факт смерці студэнта Ота Уормбіра, якога ў Пхеньяне асудзілі на 15 гадоў за плакат. Бацькі сказалі, што сына моцна збівалі. Уормбіра вызвалілі, і ён з'ехаў у ЗША, дзе вельмі хутка памёр.
Цяпер чытаюць
Праз дзевяць месяцаў пасля вызвалення памёр палітвязень Валерый Богдан4
Каментары