Навукоўцы стварылі сінтэтычныя чалавечыя эмбрыёны, якія могуць выявіць прычыну выкідышаў і прадухіліць гібель людзей
Хоць у гэтага эмбрыёна няма ні мозга, ні сэрцабіцця, даследчыкі спадзяюцца, што гэта праліе святло на прычыны выкідышаў і генетычных захворванняў.
Навукоўцы з Вялікабрытаніі і ЗША стварылі сінтэтычныя чалавекападобныя эмбрыёны без патрэбы ў яйцаклетках і сперме. Даследчая група выкарыстоўвае іх, каб высветліць, чаму некаторыя цяжарнасці не трываюць пасля першых 14 дзён пасля апладнення. Навукоўцам не вельмі шмат вядома пра гэты этап у развіцці чалавека, а гэта той час, калі многія цяжарнасці абрываюцца, асабліва пры метадзе ЭКА.
Сінтэтычныя эмбрыёны значна адрозніваюцца ад натуральных эмбрыёнаў, якіх навукоўцы спрабавалі вывучаць, падтрымліваючы ЭКА-эмбрыёны жывымі ў лабараторных умовах на працягу 14 дзён. Даследчыкі кажуць, што яны змаглі стварыць асяроддзе, якое імітуе першыя 14 дзён развіцця плода па-за ўлоннем маці, хоць праца яшчэ не прайшла экспертнай праверкі.
У гэты ж час сінтэтычныя эмбрыёны выклікаюць занепакоенасць навуковай супольнасці і ўрада як у Вялікабрытаніі, так і ў ЗША, паколькі гэтая вынаходка занадта шырока рассоўвае межы навуковай этыкі. Але прафесарка Магдалена Жэрніцка-Гёц (Magdalena Żernicka-Goetz), якая з'яўляецца вядучай даследчыцай у праекце, сказала CNN, што эмбрыёны былі распрацаваныя не для стварэння новага жыцця, а ў надзеі прадухіліць гібель людзей.
Цяпер сінтэтычныя эмбрыёны захоўваюцца ў прабірках і не могуць быць імплантаваныя ва ўлонне маці, але даследчыкі праводзілі падобныя эксперыменты на мышах і малпах, распавядае Gizmodo. Аднак кожны раз, калі яны спрабавалі, сінтэтычныя эмбрыёны не выжывалі. Брытанскія юрысты, спецыялісты па этыцы і навукоўцы распрацоўваюць тым часам набор рэкамендацый, які дапамог бы рэгуляваць падобныя даследаванні.
Па словах навукоўцаў, распрацоўка ўсё яшчэ паказвае патэнцыял і можа даць фундаментальнае ўяўленне аб крытычных этапах развіцця чалавека. Гэтыя этапы вельмі цяжка вывучаць, таму свежы падыход можа прывесці да лепшага разумення прычын ранніх выкідышаў.
Цяпер чытаюць
Што кажуць Мацкевіч, Карпаў, Чарняўская і іншыя пра прэс-канферэнцыю Бабарыкі і Калеснікавай31
Што кажуць Мацкевіч, Карпаў, Чарняўская і іншыя пра прэс-канферэнцыю Бабарыкі і Калеснікавай
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»2828
Каментары