Фінская тэлекампанія апублікавала рэдкія відэа Пуціна з пачатку 1990-х
Фінская тэлерадыёкампанія Yle ў нядзелю апублікавала некалькі кароткіх відэа з удзелам цяперашняга расійскага прэзідэнта Уладзіміра Пуціна. На іх ён — у адпачынку ў Фінляндыі ў пачатку 1990-х гадоў, калі займаў пасаду кіраўніка Камітэта знешніх сувязяў мэрыі Санкт-Пецярбурга, піша «Свабода».
«Унікальнае хатняе відэа паказвае, як Пуцін праводзіў вольны час на раскошнай віле на поўдні Фінляндыі ў час распаду Савецкага Саюза», — анансуе выданне сваю публікацыю.
Yle звяртае ўвагу на адзенне Пуціна — «светлую майку і сінія спартовыя штаны Adidas», а таксама на яго растрапаныя валасы.
Поглядывающий украдкой в камеру и одетый в спортивный костюм Владимир Путин запечатлен на домашнем видео – Yle публикует съемки непубличной поездки в Финляндию https://t.co/0Kc4lyz3dJ
«Такім быў Пуцін да таго, як разбагацеў: дрэнная вятроўка, дрэнная прычоска, дрэнная кашуля без рукавоў», — цытуе выданне Люка Хардынга, эксперта па Расіі, журналіста The Guardian.
Відэа, якое патрапіла ў распараджэнне Yle, было знята ў Фінляндыі падчас першамайскіх выхадных у пачатку 1990-х гадоў. Дакладны год не называецца.
На відэа паказана, як Пуцін у майцы і спартыўных штанах гуляе ў пінг-понг у пары са сваім начальнікам, тагачасным мэрам Пецярбурга Анатолем Сабчаком супраць двух меркаваных ахоўнікаў. На відэа таксама патрапіў момант, калі Пуцін, Сабчак і яшчэ некалькі людзей абедаюць на тэрасе.
Відэа, як піша Yle, было знята на прадстаўніцкай віле кампаніі Thomesto Group, якая вяла бізнэс у Расіі. Месца дзеяння — востраў на паўднёвым узбярэжжы Фінляндыі.
Фінская кампанія Thomesto імпартавала неапрацаваную драўніну з Расіі, «таму сувязі з кіраўнікамі яе ўсходняга суседа былі для яе жыццёва важныя», — піша выданне.
Yle не называе крыніцу відэа, «бо рэакцыя Пуціна на выкрыццё яго асабістага жыцця можа быць непрадказальнай». Урывак раней быў апублікаваны ў Youtube, але яго хутка адтуль выдалілі.
Выданне таксама паразмаўляла з адным з фінскіх бізнэсменаў, які быў на віле падчас візіту Сабчака і Пуціна. Ён расказаў, што гуляў з Пуціным у пінг-понг. Таксама падчас візіту госці лавілі рыбу. На адным з відэа Пуцін і Сабчак разам з топ-менеджарам Thomesto едуць на лодцы. У адпачынку, мяркуючы па ўсім, прысутнічалі тагачасная жонка Пуціна Людміла і яго дочкі.
На відэа, дзе Сабчак з Пуціным абедаюць, мэр Пецярбурга рэжа вялікі кавалак мяса. «Гэта трэба пусціць на тэлебачанне, паказаць, як сілкуецца мэр, косці грызе», — жартуе ў кадры Пуцін. «Група есць смажаніну і жартуе аб сваім абжорстве, у той час як людзі ў іх родным горадзе пакутуюць ад недахопу ежы», — піша Yle. Пры гэтым фінскі ўдзельнік сустрэчы адзначае, што Пуцін трымаўся стрымана, не казаў нічога пра «жанчын і жыццё» і амаль не піў спіртнога.
«Гулец у пінг-понг, які меў злёгку растрапаныя валасы і свабодныя спартыўныя штаны, з таго часу змог палепшыць свой імідж дзякуючы вялікай колькасці грошай і неабмежаванай уладзе.
Канчатковы вынік выглядае змрочна», — канстатуе Yle, адзначаючы, што цяпер 71-гадовы Пуцін «купляе самае дарагое моднае адзенне, якое толькі можна купіць за грошы, і нават не робіць выгляду, што ідэнтыфікуе сябе з простымі людзьмі».
Пуцін узначальваў Камітэт знешніх сувязяў у адміністрацыі Пецярбурга з 1991 па 1994 год, да 1996 быў намеснікам мэра горада. Шматлікія сведкі падзей у горадзе ў тыя гады, у тым ліку знаёмыя Пуціна, лічаць, што ён быў датычны да незаконных схем, меў сувязі з арганізаванай злачыннасцю. Ніводнае з гэтых абвінавачванняў не разглядалася ў судзе і не было даказана. У атачэнне Пуціна па-ранейшаму ўваходзіць шэраг асоб, што працавалі з ім у Пецярбургу ў 1990-я гады.
Цяпер чытаюць
Шэсць фактаў пра Андрэя Шведа — былога генпракурора, які цяпер стаў старшынёй Вярхоўнага суда4
Каментары