«Правільныя выканаўцы з правільным пасылам». Перад прэзідэнцкімі выбарамі ў Расіі ў рэгіёнах пройдуць канцэрты праўладных зорак

Палітычны блок Адміністрацыі прэзідэнта Расіі мае намер арганізаваць у рэгіёнах канцэрты лаяльных да расійскай улады зорак. Пра гэта «Медузе» распавялі дзве крыніцы, блізкія да Крамля.

Паводле іх слоў, неафіцыйна турнэ стане часткай перадвыбарнай кампаніі Уладзіміра Пуціна на прэзідэнцкіх выбарах 2024 года, аднак, хутчэй за ўсё, не будзе аб'яднана агульным брэндам у духу «Галасуй або прайграеш» (пад ім праходзіў знакаміты музычны тур у падтрымку Барыса Ельцына на выбарах 1996 года). Удзел самога Пуціна ў рэгіянальных мерапрыемствах не плануецца.

«Гэта падтрыманне патрыятызму, ну а значыць, і рэйтынгу прэзідэнта. [Будуць выступаць] правільныя выканаўцы з правільным патрыятычным пасылам. Ва Уладзіміра Пуціна пасыл такі ж, гэта як бы яго каманда. Яна кажа — падтрымліваеш Расію, значыць падтрымліваеш прэзідэнта. Плюс сігнал [жыхарам рэгіёнаў]: вас не забываюць, да вас адпраўляюць культбрыгады», — патлумачыла крыніца «Медузы», блізкая да АП.

Паводле слоў іншага суразмоўцы, блізкага да Крамля, цяпер АП вядзе перамовы «з усімі, хто лаяльны і хоць неяк варушыцца: поп-, рок-зоркі, дзяржаўныя тэатры». У якасці прыкладу ён прывёў пастаянных удзельнікаў праўладных канцэртаў — Грыгорыя Лепса, Шамана, групу «Любэ» і Паліну Гагарыну. Летась Крэмль ужо ладзіў такі тур праўладных расійскіх зорак — у падтрымку вайны, пад назвай «Za Расію». Ён абышоўся прыкладна ў 100 мільёнаў рублёў (1,2 млн даляраў), канцэрты адбыліся ў 31 горадзе.

Курыруе арганізацыю канцэртаў Упраўленне Крамля па грамадскіх праектах на чале з Сяргеем Новікавым — паплечнікам намесніка кіраўніка АП Сяргея Кірыенкі. Суразмоўцы «Медузы» называюць Новікава «галоўным цэнзарам кіно, тэатра і музыкі» і кажуць, што менавіта ў яго ўпраўленні цяпер прымаюцца ключавыя рашэнні наконт культурнай палітыкі.

Акрамя таго, як паведамляў РБК, Крэмль ужо пачаў рыхтаваць спіс «давераных асоб» Пуціна да выбараў 2024 года. Па словах дзвюх крыніц «Медузы», блізкіх да АП, у яго таксама павінны ўвайсці артысты, якія паедуць з» патрыятычнымі» гастролямі па расійскіх рэгіёнах.

У цэлым палітычны блок АП плануе ператварыць чарговае абранне Пуціна ў «чараду святаў» — напрыклад, фонам для кампаніі стане Усерасійскі конкурс «Гэта ў нас сямейнае», у якім расейцы могуць выйграць кватэру ці падарожжа па краіне. Ён, як і гастролі праўладных зорак, па задумцы Крамля, павінен «павысіць сацыяльны аптымізм» і паказаць, што ў краіне, нягледзячы на вайну, «усё стабільна і нармальна».

Прэзідэнцкія выбары пройдуць у Расіі ў сакавіку 2024 года. Пуцін фактычна кіруе Расіяй з 2000 года (у 2008—2012 гадах прэзідэнтам быў Дзмітрый Мядзведзеў).

• 0
• 0
• 8
• 6
• 0
• 0
• 4
• 0