Страляніну ў Празе, у выніку якой загінулі ўжо як мінімум 15 чалавек, а 24 параненыя, зладзіў 24-гадовы студэнт філасофскага факультэта Давід Козак, паведаміла чэшскае выданне Novinky.cz. Перад гэтым паліцыя аб'явіла яго ў вышук.
Козак скончыў універсітэт са ступенню бакалаўра па гісторыі і еўрапейскіх даследаваннях, а затым атрымаў ступень магістра па гісторыі. Ён займаўся гісторыяй Польшчы.
У чацвер днём паліцыя абвясціла ў вышук Давіда Козака, бо яго звязваюць са справай аб гвалтоўнай смерці ў вёсцы ў Кладненскім раёне. Неўзабаве пасля 12-й гадзіны паліцыя атрымала інфармацыю пра тое, што 24-гадовы мужчына з вёскі Гостунь збіраецца паехаць у Прагу, заявіўшы, што хоча пакончыць з сабой. Пазней бацька падазраванага ў стральбе быў знойдзены мёртвым у вёсцы.
У паліцыі была інфармацыя, што Давід Козак збіраецца нібыта чытаць лекцыю на вуліцы Цэлетна. Яны эвакуявалі адтуль людзей, але страляніна адбылася ў іншым будынку.
Пра матывы страляніны пакуль нічога не вядома. Кіраўнік пражскай паліцыі Марцін Вондрашак заявіў, што стралок быў натхнёны інцыдэнтамі, якія адбыліся ў мінулым за мяжой.
У тэлеграме, дарэчы, знайшоўся канал David Kozak, у якім у снежні з'яўляліся запісы чамусьці на рускай мове аб планах «зрабіць скулшутынг і, магчыма, суіцыд». Ці звязаны ён з меркаваным чэшскім стралком, пакуль незразумела. У адным з допісаў згадваецца пра расіянку Аліну, якая 7 снежня ўчыніла страляніну з ахвярамі ў расійскім Бранску.
Мужчына нібыта здзейсніў самагубства, але паліцыя таксама ўжыла супраць яго зброю.
Цяпер чытаюць
Чацвёртую лінію мінскага метро павядуць у Дражню. А «Сляпянка» і «Даўгабродская» змянілі сваё месца5
Каментары