Набірае абароты петыцыя за тое, каб на платформе Duolingo стварыць курс вывучэння беларускай мовы
Аўтар заклікае распрацоўшчыкаў дадатку Duolingo дапамагчы як беларусам, якія зразумелі важнасць сваёй мовы для нацыянальнай ідэнтычнасці, так і ўсім ахвотным вывучыць беларускую мову.
У інтэрнэце зʼявілася петыцыя за стварэнне курсу па вывучэнні беларускай мовы на Duolingo — часткова бясплатнай платформе для вывучэння моваў, якая ў верасні гэтага года была самым папулярным дадаткам такога кшталту ў свеце. Згодна са статыстыкай, яго загрузілі звыш 16,3 мільёна разоў.
Нядаўна на Duolingo зʼявілася ўкраінская мова. Аўтар петыцыі за зʼяўленне курсу па вывучэнні беларускай мовы звяртае ўвагу на тое, што наша мова «ўсяго некалькі стагоддзяў назад была адной з асноўных еўрапейскіх моваў», а цяпер знаходзіцца на небяспечнай стадыі, бо яе носьбітаў не так шмат.
Аўтар адзначае, што Duolingo як адзін з самых папулярных дадаткаў для вывучэння моваў можа ўнесці значны ўклад не толькі ў адну краіну, але і сусветную спадчыну.
Па словах аўтара, пасля поўнамаштабнага ўварвання Расіі ва Украіну шмат хто з беларусаў усвядоміў важнасць нацыянальнай ідэнтычнасці і мовы як яе часткі. Але ва ўмовах дыктатуры карыстацца беларускай мовай не толькі складана, але і небяспечна, бо яна дэманструе нязгоду з палітыкай русіфікацыі.
Ва ўмовах, калі людзі не маюць магчымасці вывучыць родную мову, піша аўтар, самым бяспечным і даступным спосабам можа стаць выкарыстанне анлайн-дадатку для вывучэння моваў. Акрамя гэтага, на думку аўтара, магчымасць вывучэння беларускай мовы дапаможа зрабіць яе больш даступнай для замежнікаў.
Петыцыя зʼявілася 20 снежня. Неабходна, каб яе падпісала 5 тысяч чалавек. Зрабіць гэта можна тут.
Чытайце яшчэ:
«Лепш за ўсё мова вучыцца праз смех». Эстонка, паляк і расеец — пра тое, як вывучаюць беларускую
Сто беларусаў агучылі кнігу пра дыскрымінацыю роднай мовы
«Калі мне прыляціць, я гатовая». Наста Рагатко — пра сэкс-сцэну ў сваёй кнізе, прарасійскіх сваякоў, Гаюн і Матольку32
Каментары