Кампаніі падманваюць пенсіянераў на ЖКГ-паслугах, але чыноўнікі не могуць даць рады — такі закон
Рэч у хітрых лазейках у законах.
Упраўленне аператыўных мерапрыемстваў інспекцыі Міністэрства па падатках і зборах расказала пра тое, як неназванае ІП падманула пенсіянераў у Мінску.
Справа была такая — нейкія людзі прыйшлі ў кватэру да пары пенсіянераў, прадставіўшыся супрацоўнікамі кампаніі, якая супрацоўнічае з ЖКГ. Яны сказалі, што, маўляў, ім трэба тэрмінова замяніць рэле ў электралічыльніку праз тое, што яны жывуць у старым доме. І гэта бясплатна.
У выніку яны пераканалі іх падпісаць дамову. Тут і выявілася, што заплаціць трэба за процьму іншых дадатковых паслугаў. Суму спачатку назвалі ў 620 рублёў, але пасля праз тое, што пацярпелы пенсіянер — інвалід II групы, суму знізілі да 298 рублёў.
Пенсіянера ўгаварылі заплаціць, адразу ж выбіўшы чэк на непатрэбную паслугу. У пары засталося 120 рублёў на жыццё.
Выявілася, што такіх пенсіянераў вельмі шмат. Але дапамагчы падатковая ім нічым не можа, бо фірма робіць усё цалкам легальна, не завышае рынкавы кошт паслуг і сапраўды мае ліцэнзію на тое, каб аказваць такія паслугі, а таксама плаціць падаткі. З усімі дакументамі ў іх парадак. Такім чынам, у падатковай прызнаюць, што гэта фактычна падман, але юрыдычна прэтэнзіяў да фірмы яны не маюць.
Міністэрства па падатках і зборах дало чатыры парады, як абараніцца ад такіх махляроў:
- Не вядзіцеся на аб'явы ў псеўдаафіцыёзным стылі пра бясплатныя паслугі, якія расклейваюць ля пад'ездаў. Звычайна гэта «бясплатная праверка вокнаў», «якасці вады» і іншыя рэчы такога кшталту.
- Не пускайце абы-каго ў хату, калі візіт не быў запланаваны загадзя. Дзяржаўныя арганізацыі звычайна не ходзяць па кватэрах, каб адшукаць сабе кліентаў.
- Калі такія людзі да вас зайшлі, то дасканала распытвайце пра тое, якую арганізацыю яны прадстаўляюць і перапытваць у самой арганізацыі, ці маюць яны да яе дачыненне. Да гэтага не дазваляць выконваць аніякія працы ў доме.
- Не падпісвайце з такімі людзьмі аніякіх дамоваў і не пераводзьце ім грошы, пакуль вы не ўпэўніліся ў тым, што вам сапраўды патрэбная паслуга, якую вам прапануюць. Пасля падпісання дамовы і ўнясення аплаты давесці вашу правату будзе складана.
Падсумоўваючы, міністэрства раіць быць пільнымі і не верыць тым, хто прыходзіць да вас дадому, каб нешта прадаць. Бо звычайна гэта спробы падмануць даверлівых жыхароў.
«Наша Нiва» — бастыён беларушчыны
ПАДТРЫМАЦЬЦяпер чытаюць
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго8
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго
«У мяне толькі адна мара — вярнуць свайго Дзімку». Маці былога палітвязня Дзмітрыя Гопты расказвае пра новую бяду сына. І просіць замаўляць у яе больш тортаў, каб справіцца1010
Каментары