Жонку раптоўна памерлага 35-гадовага сына Ігара Сечына называюць «сіняй барадой у спадніцы» — і не проста так
Нявестка кіраўніка «Раснафты» Крысціна Сечына да змены дакументаў была Таццянай Султанавай.
Як паведамлялася, у лютым раптоўна памёр 35-гадовы Іван Сечын, сын кіраўніка «Раснафты» Ігара Сечына. Цяпер сталі вядомы некаторыя факты пра яго жонку. Тэлеграм-канал ВЧК-ОГПУ, які займаецца раскрыццём таямніц расійскіх чыноўнікаў, алігархаў і сілавікоў сцвярджае, што перад вяселлем з Іванам Сечыным жанчына цалкам змяніла сваё імя, прозвішча і імя па бацьку.
Сапраўднае імя 36-гадовай нявесткі Ігара Сечына — Таццяна Султанава. Да шлюбу з Іванам яна была замужам за вядомым у Расіі ўдзельнікам вулічных гонак Сяргеем Варабʼёвым, які пазней стаў дырэктарам этапа Формулы 1 у Сочы.
Сяргей Варабʼёў быў добра знаёмы з Ігарам Сечыным. Кіраўнік «Раснафты» нават хрысціў дачку Сяргея Вараб'ёва і Таццяны Султанавай.
Сечын-старэйшы папрасіў Варабʼёва ўзяць апеку над сваім сынам, які захапляўся аўтагонкамі. У выніку Іван Сечын стаў наведвацца ў дом дырэктара этапа «Формулы-1» у Сочы, а калі выступаў на спаборніцтвах, для канспірацыі выкарыстоўваў прозвішча «Вараб'ёў».
Журналісты звяртаюць увагу на той факт, што Сяргей Варабʼёў і Таццяна Султанава пажаніліся толькі праз некалькі гадоў пасля знаёмства. А праз чатыры месяцы пасля вяселля Варабʼёў раптоўна памёр ва ўзросце 43 гадоў. Таццяна ў спадчыну атрымала ўсю маёмасць мужа.
Праз некалькі месяцаў яна пачала сустракацца з Іванам Сечыным.
Як сцвярджаецца, Ігар Сечын быў супраць такога выбару свайго сына. Але калі Таццяна пражыла з Іванам некалькі гадоў і зацяжарыла, Сечын-старэйшы ўсё ж даў згоду на шлюб, але з умовай.
Жанчына цалкам зменіць сваё імя, прозвішча і імя па бацьку, каб ніяк нельга было вызначыць яе асобу. У чэрвені 2018 года Таццяна Міхайлаўна Султанава атрымала дакументы на імя Крысціны Уладзіміраўны Шчадрыной. А праз некалькі месяцаў адбылося вяселле. Пасля яго жанчына ўзяла прозвішча мужа і стала Крысцінай Сечынай.
Пражыўшы ў шлюбе з Крысцінай-Таццянай пяць гадоў, у лютым 2024 года Іван Сечын раптоўна памёр. Абставіны былі сапраўды дзіўныя — калі мужу стала дрэнна, жонка адправіла ахоўніка ў аптэку і толькі ён вярнуўся, выклікала хуткую дапамогу. Прычым не платную ці «крамлёўскую», як прынята ў маскоўскай эліты, а звычайную. Калі дактары даехалі да пацыента, то змаглі толькі канстатаваць яго смерць.
Такі лёс мужоў стварыў Султанавай у пэўных колах рэпутацыю «сіняй барады ў спадніцы».
Чытайце яшчэ:
Раптоўна памёр 35-гадовы сын Ігара Сечына — кіраўніка «Раснафты»
Кіраўнік «Раснафты» Ігар Сечын падаў позву супраць «Новай газеты» за артыкул пра яхту за $100 млн
Пуцін узнагародзіў 25-гадовага сына Сечына за «шматгадовую працу»
Цяпер чытаюць
«Дзеці са мной». Журналісты дазваніліся да былога мужа Анжалікі Мельнікавай і спыталі, дзе можа быць спікерка КР15
Каментары