Пад Вільняй загінуў былы беларускі добраахвотнік «Туз». Яго збіў цягнік
21 сакавіка пад Вільняй трагічна загінуў былы беларускі добраахвотнік «Туз», паведаміла добраахвотніцкае аб’яднанне беларусаў у Літве «Ліцвіны». Інфармацыю пра яго смерць пацвярджаюць крыніцы «Радыё Свабода».
Паліцыя высвятляе абставіны трагедыі. Імя і прозвішча добраахвотніка не агалошваецца ў мэтах бяспекі.
На вайну ва Украіну «Туз» прыехаў яшчэ ў сакавіку 2022 года. Ён браў удзел у баявых дзеяннях на поўдні Украіны ў складзе беларускага батальёна «Тэрор». У канцы 2022-га звольніўся са службы. У верасні 2023 года вярнуўся на фронт, ваяваў у 79-й асобнай дэсантна-штурмавой брыгадзе.
У Вільню «Туз» вярнуўся з фронту напрыканцы лютага 2024. Свабода запісвала ягоныя развагі пра вайну і сябе да другой гадавіны поўнамаштабнага ўварвання ва Украіну.
«Можа, гэта песімізм, а можа, рэалізм. Мне хочацца верыць, што я не моцна змяніўся. У нейкіх пытаннях я стаў больш упэўнены ў сабе, чым гэта было ў 2020 годзе падчас пратэстаў. Тады я, як і большасць, хаваўся, уцякаў. Сёння я бачу шмат непрыемных і жудасных рэчаў, і нейкі АМАП цяпер ужо не такі страшны, як раней.
Я стаў больш патрабавальным. Людзі, якія вакол мяне сёння, павінны быць адказнымі нават у дробных пытаннях. Бо ад гэтага можа залежаць жыццё тваё і тваіх пабрацімаў.
Хочацца верыць, што больш жорсткім я не стаў. Я разумею, што ёсць нейкае размежаванне між вайной і цывільным жыццём. І гэта зусім розныя рэчы», — казаў ён.
Паводле інфармацыі «Нашай Нівы» менавіта «Туза» збіў учора пад Вільняй цягнік.
Малады чалавек ішоў па рэйках.
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве8
Каментары