Мінскі метрапалітэн распавёў, колькі чалавек у ім можа схавацца
Лічаныя працэнты ад насельніцтва сталіцы.
Многае, што знаходзіцца ніжэй за ўзровень зямлі і надзейна абаронена зверху, напрыклад, падвалы, паркінгі, падземныя паверхі, падпадае пад вызначэнне хованкі пры надзвычайнай сітуацыі. Але найвялікшым часовым сховішчам у Беларусі з'яўляецца сістэма мінскага метрапалітэна.
«Пры ўзнікненні надзвычайнай сітуацыі мы хаваем пасажыраў, якія знаходзяцца на станцыі, а таксама людзей, якія жывуць у межах 500 м ад гэтай станцыі або працуюць. Вядома, калі адбываецца нейкая сітуацыя, тут ніхто не будзе асабліва разбірацца, але, тым не менш, людзі мусяць ведаць, што ў межах 500 метраў ёсць такая станцыя, на ёй можна схавацца ў выпадку надзвычайнай сітуацыі», — патлумачыў афіцыйны прадстаўнік метрапалітэна Андрэй Дроб тэлеканалу «Беларусь 1».
У падземцы могуць схавацца звыш 100 тыс. чалавек (некалькі працэнтаў ад насельніцтва сталіцы), а з адкрыццём новых станцый умяшчальнасць значна павялічыцца.
Саставы таксама падвойнага прызначэння. У асаблівых выпадках вагоны ператвараюцца ў шпіталь, а на станцыі абавязкова з'явяцца медыкі.
Метро гэта толькі часовы прытулак, але і яно можа забяспечыць гараджан самым неабходным.
Гермазасаўкі здольныя абараніць станцыю ад знешняга ўздзеяння — ударнай хвалі, радыяцыі, хімічнай атакі.
А вось дзе знаходзяцца іншыя хованкі, на думку намесніка міністра па надзвычайных сітуацыях Беларусі Аляксандра Худалеева, беларусам ведаць не варта.
«Цяпер гэтая інфармацыя недаступная, да таго ж аб'екты зачыненыя, але правераныя на прыдатнасць. У выпадку надзвычайнага здарэння карты хованак з'явяцца адразу. З прычыны пэўнай сакрэтнасці здымкі на такіх аб'ектах непажаданыя».
Ахоўныя збудаванні з ложкамі, сістэмамі вентыляцыі і фільтрацыі паветра, якія дапамогуць перажыць любую тэхнагенную катастрофу і надзвычайную сітуацыю, у тым ліку і радыёактыўнае забруджванне, ёсць на ўсіх буйных прадпрыемствах.
Сюды ж загадзя завозяць генератары, ваду, ежу, пасцельныя прыналежнасці і медыкаменты.
У малых гарадах і тым больш у вёсках такіх хованак няма. У выпадку асаблівага становішча ў рэгіёне ўводзіцца план адсялення або эвакуацыі. У месцы часовага пражывання перасяленцаў ператвораць школы, стадыёны і лагеры.
Чытайце таксама:
Сталі вядомыя падрабязнасці ДТЗ на Нямізе. Пацярпелі 4 чалавекі
Ва Уфе правядуць конкурс бамбасховішчаў
Пасля тэракту ў Падмаскоўі ў гандлёвых цэнтрах Мінска паставілі аўтаматчыкаў
Арыштавалі прадстаўнікоў кампаніі Bayer у Беларусі15
Каментары