На пратэст у Тбілісі супраць «закона аб іншагентах» выйшла 200 тысяч чалавек
Суботнюю акцыю пратэсту ў Тбілісі супраць «закона аб замежных агентах» называюць рэкорднай за гэты месяц.
У ноч з 11 на 12 мая ў сталіцы Грузіі прайшла самая масавая акцыя пратэсту супраць прыняцця законапраекта «Аб празрыстасці замежнага ўплыву», які называюць аналагам расійскага закона аб «замежных агентах», паведамляе Euronews.
Маніфестанты з некалькіх кірункаў прайшлі маршам па цэнтры горада да плошчы Еўропы, дзе адбылася асноўная частка пратэснай акцыі. Паводле ацэнак мясцовых СМІ, на ёй сабраліся да 200 тысяч чалавек. Прысутныя запатрабавалі ад урада краіны адклікаць законапраект, які, як лічаць яго крытыкі, дазволіць ураду душыць галасы незалежных НКА і апазіцыі.
Яго абаронцы, наадварот, настойваюць, што дакумент не ўтрымлівае рэпрэсіўных мер, і прызначаны для павелічэння празрыстасці арганізацый у некамерцыйным сектары. Яны таксама сцвярджаюць, што закон паўтарае нормы не з расійскага, а з амерыканскага заканадаўства.
Згодна з дакументам, СМІ, няўрадавыя арганізацыі і іншыя некамерцыйныя арганізацыі павінны будуць зарэгістравацца як «тыя, што пераследуюць інтарэсы замежнай дзяржавы», калі яны атрымліваюць больш за 20% фінансавання з-за мяжы.
Наступную акцыю супраць гэтага закона апазіцыя анансавала ў ноч з 12 на 13 мая ля будынка парламента Грузіі.
13 мая павінна прайсці пасяджэнне юрыдычнага камітэта парламента, на якім скандальную ініцыятыву абмяркуюць у трэцім чытанні, піша «Эха Каўказа». Пасяджэнне сесіі і галасаванне ў трэцім, фінальным, чытанні ў парламенце павінна адбыцца 14 мая.
Цяпер чытаюць
Круты прызнаўся Лукашэнку, што акупнасць Беларусьфільма — 3%1
Каментары