Датэрміновыя парламенцкія выбары ў Вялікабрытаніі пройдуць 4 ліпеня, заявіў прэм'ер-міністр Рышы Сунак па выніках пасяджэння ўрада 22 мая.
«Цяпер час для Вялікабрытаніі выбіраць сваю будучыню — вырашыць, ці хочам мы абапірацца на дасягнуты прагрэс ці рызыкнуць і апынуцца зноў у самым пачатку, без плана, без яснасці.
Раней сёння ў размове з Яго Вялікасцю каралём я папрасіў распусціць парламент. Кароль задаволіў гэтую просьбу, і ў нас будуць усеагульныя выбары 4 ліпеня».
Рышы Сунак адзначыў, што выбары ў Вялікабрытаніі пройдуць у той час, калі «свет стаў больш небяспечным, чым ён быў з часоў заканчэння халоднай вайны». Пагрозу глабальнай бяспецы і стабільнасці, з ягоных слоў, уяўляюць баявыя дзеянні ва Украіне і ўзмацненне «ісламісцкага экстрэмізму» на Блізкім Усходзе.
На ўсеагульных выбарах у Вялікабрытаніі фармуецца новы склад Палаты абшчын — ніжняй палаты парламента Вялікабрытаніі. Выбары праходзяць у 650 аднамандатных выбарчых акругах. У кожнай акрузе праходзіць галасаванне за кандыдатаў ад гэтай акругі.
Кіраўнік Кансерватыўнай партыі Рышы Сунак займае пасаду прэм'ер-міністрам Вялікабрытаніі з 25 кастрычніка 2022 года. Ён заняў яе пасля адстаўкі Ліз Трас, якая ўзначальвала ўрад усяго 44 дні. Наступныя планавыя выбары павінны былі б адбыцца да 28 студзеня 2025 года, папярэдні раз брытанцы галасавалі ў 2019-м.
Каментары