«Некаторыя зорку злавілі. Выйсці на экран, лаючы ўсё…». На каго з прапагандыстаў намякаў Лукашэнка?
На медыяфоруме, дзе сабраліся супрацоўнікі дзяржаўных СМІ, Аляксандр Лукашэнка раскрытыкаваў некаторых прапагандыстаў.
«Ведаеце, да мяне даходзяць адгалоскі нейкіх спрэчак, што некаторыя нашы журналісты, не крыўдзіцеся, зорку злавілі і давай аўтарскія перадачы: «Я тут зраблю, я…»
Я за, я не супраць аўтарскага тэлебачання. Але стаць аўтарам нейкай перадачы — трэба разумець, што гэта каласальная праца, у адзіночку такую перадачу не зробіш. І мы вельмі шмат, вельмі шмат апускаемся ніжэй за планку, калі падрыхтоўваем гэтыя перадачы. Таму будзьце вельмі акуратныя, прадумвайце ўсё.
Выйсці на экран і ляпіць там усё запар, выбачайце мяне за гэта слова, лаючы ўсё і ўся вакол, лічачы, што ты ўжо ва ўсім разабраўся — небяспечная тэндэнцыя, падумайце над гэтым»,
— сказаў Лукашэнка.
«Апусціцеся на зямлю, сядзьце і падумайце, — дадаў ён. — І тыя, хто сёння зазвяздзіўся на гэтых праграмах, пастаўце перад імі планку — ніжэй нельга, скачыце, будзеце на экранах тэлевізара. Не — ну, ідзіце рыхтуйцеся. У адваротным выпадку вы згубіцеся, а мы вымушаны будзем ад вас адмовіцца».
Каго меў на ўвазе палітык, не ўдакладнялася.
Пазней маладая спецыялістка «Магілёўскіх ведамасцяў» Ксенія Буглак спытала ў Лукашэнкі, як ён ставіцца да «дзёрзкай журналістыкі», напрыклад да таго, што робіць Рыгор Азаронак. Палітык адказаў, што смеласць і рэзкасць ухваляе.
«Але рабіце гэта як можна карэктней. Не трэба крыўдзіць тых, каго вы не павінны пакрыўдзіць».
Каментары