«Не звяртаць увагі на меркаванні маралі на карысць крэатыўнасці». Узламана перапіска супрацоўнікаў расійскай разведкі
Журналісты атрымалі перапіску супрацоўнікаў ГРУ з планамі Расіі па дэстабілізацыі краін Захаду.
Журналісты выдання The Insider змаглі атрымаць доступ да перапіскі супрацоўнікаў Службы ваеннай разведкі Расіі (СВР), якія адказваюць за «інфармацыйную вайну» з Захадам.
Група супрацоўнікаў СВР, перапіска якіх патрапіла ў рукі журналістаў, дзейнічае пад прыкрыццём Міжнароднага цэнтра бяспекі «Міратворац», створанага ў снежні 2020 года.
Ключавую ролю ў арганізацыі адыгрывае 45-гадовы Міхаіл Колесаў. Мужчына служыць у вайсковай частцы 33949 (упраўленне С) СВР, якая займаецца абслугоўваннем шпіёнаў-нелегалаў. Адначасова Колесаў з'яўляецца афіцэрам ФСБ.
Акрамя Колесава, журналісты называюць імя Міхаіла Кулёміна, які з'яўляецца сынам генерала Аляксандра Кулёміна з 12-га галоўнага ўпраўлення Міністэрства абароны Расіі, якое курыруе ядзернае ўзбраенне.
Колесаў разам з Кулёміным рыхтавалі аналітычныя даведкі аб інфармацыйнай вайне, якія накіроўвалі ў розныя сілавыя і палітычныя ведамствы. Сярод іх — навукова-тэхнічная служба ФСБ, якая курыруе галоўная хакерскае падраздзяленне і Інстытут крыміналістыкі.
Метадычка інфармацыйнай вайны
Журналісты The Insider знаёмяць са зместам справаздачы, якую Колесаў і Кулёмін прадставілі на круглым стале ў Савеце Федэрацыі ў маі 2022 года.
Аўтары прапануюць дзейнічаць на фронце інфармацыйнай вайны рашуча і агрэсіўна з мэтай паглыблення ўнутраных супярэчнасцей паміж правячымі элітамі краін Захаду, эскалацыі антыўрадавых выступаў і «разгойдвання» аморфнай часткі электарату.
Для паспяховасці аперацый прапануецца падзяліць аўдыторыю на дзве часткі — рацыянальную і эмацыйную. Для кожнай з іх рыхтаваць і ўкідваць у інфармацыйную прасторы з рэгулярнасцю два разы на тыдзень асобныя сюжэты. Пры гэтым яны заклікалі больш апеляваць да эмоцый (і перш за ўсё да страху).
Для распаўсюджання рознага роду негатыўных ідэй афіцэры прапанавалі выкарыстанне новых інтэрнэт-платформаў замест састарэлых RT і Sputnik.
У якасці такой платформы яны бачылі выдуманую (ці спецыяльна створаную ў віртуальнай прасторы) недзяржаўную праўкраінскую арганізацыю радыкальнага толку, што дазволіла б выключыць любую прывязку да Расіі.
Па меркаванні СБШнікаў, такая платформа «дазволіць трансляваць практычна любыя тэзісы, прапагандаваць самыя лявацкія ідэі і высоўваць патрабаванні палітычнага і эканамічнага характару аж да самых абсурдных». Мэта — дыскрэдытацыя «кіеўскага рэжыму» ў вачах «калектыўнага Захаду».
Аўтары асобна падкрэсліваюць, што для вырашэння пастаўленых задач пры складанні кантэнту «неабходна не звяртаць увагі на меркаванні маралі на карысць крэатыўнасці».
У дадатку да дакумента Колесаў прадставіў канкрэтны план выканання пастаўленых задач з расцэнкамі. У ім згадваецца стварэнне спецыяльнага сайта пад выглядам «інфармацыйнага агенцтва» (як варыянт — «агенцтва незалежных даследаванняў»), відэаролікаў і на іх аснове шортсаў, якія публікуюцца 1-2 разы на дзень, кампанія ў сацыяльных сетках і рассылка ў месенджарах у адпаведнасці з «планам геалакацыі рэцыпіентаў».
Таксама ў плане арганізацыя вулічных акцый у Еўропе з колькасцю маніфестантаў да 100 чалавек і расцэнкай па 100 еўра на ўдзельніка.
Рэалізацыя на практыцы
Журналісты звяртаюць увагу, што змест «метадычкі» цалкам укладваецца ў логіку наступных кампаній Крамля ў Еўропе і ЗША. У якасці прыкладу яны прыводзяць сетку ботаў Doppelganger, якую звязваюць з ГРУ, што змагла павялічыць свой ахоп у Х (Twitter) да 1,5 мільёна чалавек.
Праз яе перыядычна распаўсюджваюцца розныя фэйкавыя паведамленні. Напрыклад, фэйкавыя антыўкраінскія цытаты заходніх знакамітасцяў ці дыпфейк, на якім падробленым голасам Тома Круза пужалі тэрактамі на будучай Алімпіядзе ў Парыжы.
Сярод перапіскі Колесава і Кулёміна журналісты знайшлі канкрэтны праект пад назвай «Лесаруб», накіраваны на дыскрэдытацыю расійскага эмігранта ў ЗША, які спансіраваў Фонд барацьбы з карупцыяй, заснаваны Аляксеем Навальным.
Яго прапаноўвалі прадставіць як «гаманец Кадырава», які збег з чачэнскімі грашыма ў Бостан.
Як вынікае з перапіскі, СБРаўцы лічылі гэты праект паспяхова рэалізаваным. Сам жа банкір са здзіўленнем расказаў The Insider, што гэтай кампаніі па сваёй дыскрэдытацыі нават не заўважыў.
Крамлёўскія боты завалілі інтэрнэт фэйкавымі цытатамі заходніх знакамітасцяў
Як працуе хлусня: рускія стварылі фэйкавы канал украінскіх марпехаў, цяпер яго бясконца цытуе прапаганда, у тым ліку мінская
Фабрыка накрутак. Як УКантакце ператварае рунэт у тэлевізар з дапамогай комікаў, троляў і блогераў
99% расійскіх фэйкавых акаўнтаў сацсеткі пакідаюць некранутымі — сакрэтныя дакументы ЗША
Каментары