Мітрапаліт Іларыён меў складаныя адносіны са сваім келейнікам, які яго ў выніку абакраў.
Падрабязнасці жыцця мітрапаліта Будапешцкага і Венгерскага Іларыёна (Георгія Алфеева), які ў мінулым быў правай рукой патрыярха Кірыла і кіраваў Аддзелам замежных царкоўных сувязяў Маскоўскага патрыярхату, расказала «Новая газета. Еўропа».
У чэрвені 2022 года без відавочных на тое прычын Іларыён быў адпраўлены ў Венгрыю, што выглядала як яўнае паніжэнне. У кастрычніку таго ж года ў Будапешт прыехаў 18-гадовы Георгій Сузукі, які паходзіць з руска-японскай сям'і. Нейкі час хлопец быў у перапісцы з мітрапалітам і прапанаваў сябе ў якасці келейніка. Іларыён прыняў гэтую прапанову.
Па словах Сузукі, з якім журналістам выдання атрымалася паразмаўляць, спачатку ён жыў у сваёй келлі, але праз некалькі тыдняў мітрапаліт прапанаваў яму пераехаць у пакой сваёй кватэры для дапамогі па гаспадарцы.
Хлопец расказвае сваю версію развіцця падзей, якія прывялі да таго, што ён разам з мітрапалітам апынуўся ў адным ложку, праўда, да сэксуальнага кантакту не дайшло.
Георгій сцвярджае, што не мог супрацьстаяць 57-гадоваму ўплывоваму мітрапаліту, які запэўніваў яго, што яны павінны жыць разам. У выніку яны сталі рэгулярна спаць у адным ложку. Калі ж хлопец паспрабаваў выказаць незадаволенасць, то пачуў на свой адрас пагрозы.
Па словах Сузукі, пасля гэтага выпадку ён пачаў рабіць запісы размоваў з мітрапалітам, каб забяспечыць сваю бяспеку.
У студзені 2024 года Георгій Сузукі вырашыў збегчы ад мітрапаліта. Пры гэтым хлопец прыхапіў з сабою дарагі гадзіннік і грошы на агульную суму 30 тысяч еўра. Цяпер супраць Сузукі ў Венгрыі заведзена крымінальная справа. Ён знаходзіцца ў базе вышуку венгерскай паліцыі.
У размове з журналістамі Сузукі расказаў падрабязнасці жыцця мітрапаліта ў Венгрыі. Па словах былога келейніка, час паміж нядзельнымі службамі Іларыён праводзіць у падарожжах і яхт-турах.
Георгій таксама прыслаў журналістам здымак дамовы на набыццё Іларыёнам памесця плошчай у 2360 квадратных метраў за 2 150 000 еўра ў прыгарадзе Будапешта.
На адным з запісаў, якія зрабіў хлопец, мітрапаліт сцвярджае, што грошы на асабняк атрымаў ад продажу сваёй кватэры на маскоўскім Арбаце і ахвяраванняў «спонсараў», якіх запэўніў у тым, што іх грошы пойдуць на будаўніцтва скіта для манахаў.
Выданне звяртае ўвагу на тое, што мітрапаліт Іларыён неаднаразова выступаў у падтрымку расійскага закона аб забароне «ЛГБТ-прапаганды» і заявамі пра тое, што пры жаданні чалавека можна «вярнуць» да «традыцыйнай» арыентацыі.
Пасля ўцёкаў свайго келейніка ў Японію да сям'і мітрапаліт адправіў яму ліст з выбачэннямі. Пасля перапіска звялася да гандлю з сям'ёй Сузукі адносна сумы, за якую тая пагодзіцца забыцца пра тое, што адбылося.
У размове з журналістамі Іларыён катэгарычна абверг абвінавачанні ў дамаганнях і паабяцаў падаць судовую позву аб паклёпе. Пасля размовы з «Новай Газетай. Еўропа» мітрапаліт тэрмінова вылецеў у Маскву.
Незалежны эксперт па РПЦ на ўмовах ананімнасці пацвердзіў выданню, што ў асяроддзі Іларыёна даўно ходзяць чуткі пра ягоныя адносіны з прыслужнікамі. Аднак дзеянні Георгія Сузукі, паводле слоў эксперта, падобныя да распаўсюджанай у царкве практыкі, калі малады чалавек дабіваецца даверу іерарха і нават шукае інтымных адносін з ім для наступнага шантажу.
«Сітуацыя, калі нейкі паслушнік уціраецца ў давер да архірэя, атрымлівае фатаграфіі яго прыватнага жыцця і потым патрабуе за іх выкуп, даволі распаўсюджаная», — цытуе выданне словы эксперта.
У матэрыяле таксама адзначаецца, што мітрапаліт Іларыён падчас свайго знаходжання ў Венгрыі выконваў ролю пасярэдніка паміж РПЦ і Захадам і сустракаўся з вышэйшымі чынамі Каталіцкай царквы, у тым ліку з Папам Рымскім. У чэрвені 2023 года СМІ нават пісалі аб пасярэдніцтве Іларыёна ў перадачы ўкраінскіх палонных Венгрыі.
Цяпер чытаюць
Акадэмію КДБ будуюць проста на Залатагорскіх могілках. З зямлі дастаюць парэшткі мінчукоў, якіх тут хавалі сотні гадоў24
Каментары