«Папрасілі памяняць ложак, бо меў звычку спаць у вялікай жаночай кампаніі». Як Кім Ір Сэн прыязджаў у БССР
Заснавальнік КНДР прыязджаў у Беларусь 40 гадоў таму, у 1984 годзе. Пра візіт і тое, што гэтаму папярэднічала, расказаў у сваім тэлеграм-канале «Пульс Леніна-19» былы дыпламат Павел Мацукевіч.
Кім Ір Сэн кіраваў Паўночнай Карэяй амаль 50 гадоў (1945—1994), памёр за два дні да абрання Лукашэнкі прэзідэнтам, 8 ліпеня 1994 года. Яму было 82 гады. У краіне была абвешчана трохгадовая жалоба.
У БССР ён прыязджаў у маі 1984 года яшчэ поўны сіл.
«Сякія-такія з дарожных звычак Кім Ір Сэна відавочна перайшлі ў спадчыну ягонаму ўнуку Кім Чэн Ыну. Напрыклад, любоў да бронецягніка», — піша Павел Мацукевіч.
«У нас было сваё МЗС і дыпламаты, але не было ўласнай замежнай палітыкі і стасункаў з замежнымі краінамі. Усё гэта з'яўлялася прэрагатывай СССР.
І вось у пачатку мая 1984-га з пратакольнага аддзела саюзнага МЗС у Мінск прыйшла інфармацыя, што ў СССР з афіцыйным візітам прыбудзе дэлегацыя КНДР на чале з яе лідарам. Меркавалася, што пасля мерапрыемстваў у Маскве яна наведае Мінск і Брэст, адкуль потым адправіцца далей у Польшчу.
Праз тыдзень пасля гэтага паведамлення ў Мінск прыбыла перадавая група паўночнакарэйцаў па падрыхтоўцы знаходжання ў БССР прэзідэнта КНДР. Яе ўзначальваў пасол Паўночнай Карэі ў СССР Квон Хі Генам. Тады ж стала вядома, што Кім Ір Сэна будуць суправаджаць каля 150 асоб.
Перадавая група аб'ехала ўсе аб'екты, якія павінен быў наведаць лідар КНДР, і па выніках суперпільнага агляду выказала некалькі арыгінальных заўваг.
Госці, у прыватнасці, папрасілі «прыбраць прыступку на Прывакзальнай плошчы», каб пазбавіць заснавальніка КНДР ад лішніх рухаў цела пасля выхаду з бронецягніка на перон.
Наступная просьба тычылася ліфта ў рэзідэнцыі «Заслаўе» — трэба было зрабіць так, каб ён менш шумеў і больш плаўна спыняўся.
Нарэшце, карэйцы пажадалі іншы ложак для свайго правадыра — вялікага памеру з пракладкай пласта фанеры пад мяккім матрацам.
Першыя дзве просьбы былі лёгка задаволены, а вось наконт ложка прыйшлося карэйцам панервавацца, а Мінску добра напружыцца, а ўсё з-за яго нестандартнага памеру і сціслых тэрмінаў на выраб.
Ложак патрэбен быў гасцям менавіта такі нестандартны і ніякі іншы: як высветлілася пазней, Кім Ір Сэн меў звычку спаць у вялікай жаночай кампаніі, але не дзеля ўцех, а дзеля цеплыні, а таксама ў мэтах аховы, мабыць».
Цяпер чытаюць
СК апублікаваў відэазапіс падзення беспілотніка. На абломках паказалі ўкраінскія надпісы17
Каментары