Абвінавачаны ў харасменце выкладчык ЕГУ Сялецкі выйграў суд ва ўніверсітэта
Агульная сума кампенсацыі складзе каля 40 тысяч еўра.
Літоўскі суд стаў на бок звольненага ў канцы мінулага года выкладчыка Еўрапейскага гуманітарнага ўніверсітэта Сяргея Сялецкага, якога абвінавацілі ў харасменце. Мужчына судзіўся супраць свайго былога працадаўцы і цалкам задаволены рашэннем суда. Пра гэта «Еўрарадыё» паведаміла яго адвакатка Эвеліна Трушкінене.
Паводле юрысткі, звальненне Сялецкага было прызнанае неправамерным. Мужчыну таксама прысудзілі кампенсацыю за прастой цягам дзевяці месяцаў, калі ён не мог выконваць свае абавязкі выкладчыка, а таксама маральную шкоду і выдаткі на юрыдычную абарону.
Агульная сума кампенсацыі складзе каля 40 тысяч еўра. Рашэнне было апублікаванае ўчора ў другой палове дня, 2 кастрычніка, на сайце суда.
Таксама ЕГУ абавязалі аднавіць Сялецкага на працоўным месцы пачынаючы з сённяшняга дня, паколькі рашэнне ўжо часткова ўступіла ў сілу — такую магчымасць дае працоўнае права Літвы.
«Ён гэтаму вельмі рады, бо рашэнне суда вельмі дэталёвае, суд яго вельмі добра разгледзеў. Ён звярнуў увагу, што дакументы [аб звальненні] былі падрыхтаваныя няправільна, у тым ліку і на тое, што яны маглі быць падробленыя, і яшчэ на шэраг іншых момантаў. <…> Так, ён вельмі задаволены, бо ён нічога [дрэннага] не рабіў і гэты год для яго быў цяжкім», — адзначыла Трушкінене.
Пры гэтым у ЕГУ ёсць 30 дзён, каб падаць апеляцыю і адмяніць прынятае рашэнне.
«Мы пакуль не абмяркоўвалі [далейшыя планы]. Паглядзім, будзе апеляцыя ці не. Пакуль займаемся толькі гэтай справай. Самае галоўнае, што тут важна сказаць, — акадэмічная супольнасць адміністрацыі і рэктару [ЕГУ] казала, што няправільна ўсё [звальненне Сялецкага] робіцца. І цяпер мы прыйшлі да таго, што акадэмічная супольнасць мела рацыю», — падкрэсліла юрыстка.
Сяргей Сялецкі — беларускі мастак і выкладчык ЕГУ, якога ўніверсітэт у снежні 2023 года звольніў пасля скандалу з абвінавачаннямі ў сексуальных дамаганнях да студэнтак універсітэта.
Пра іх частка дзяўчат расказала медыя публічна, частка — на ўмовах ананімнасці. Паводле вынікаў унутранага разбору ЕГУ звольніў Сялецкага і адлічыў студэнтку Таццяну Барысаву, якая публічна расказала пра харасмент.
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»27
Каментары
А хто дакладна яго падтрымліваў? Сказана так, нібыта ўся супольнасць была на яго баку.
Таксама з артыкулу вынікае, што справа ў няправільна падрыхтаваных дакументах на звальненне, пра харасмент зараз фактычна нічога не сказана.
Было б правільна і паслядоўна, каб ахвяры давялі б свае справы да судоў.
Тады б і ўніверсітэту было б зараз на што абаперціся.
Хаця сам універсітэт паводзіў сябе непаслядоўна і мутна.