Кангрэсвумен Марджары Тэйлар Грын увойдзе ў новае міністэрства Ілана Маска па кантролі над эфектыўнасцю ўрада ЗША.
Член Кангрэса ЗША ад штата Джорджыя з Рэспубліканскай партыі Марджары Тэйлар Грын паведаміла ў сваіх сацсетках, што ўвойдзе ў наваствораны Дэпартамент дзяржаўнай эфектыўнасці (DOGE), кіраўнікамі якога стануць бізнэсоўцы Ілан Маск і Вівек Рамасвамі.
«З нецярлівасцю чакаю, як стану старшынёй новага падкамітэта, які, паводле задумы, будзе працаваць у цесным супрацоўніцтве з прэзідэнтам Трампам, Іланам Маскам, Вівекам Рамасвамі і ўсёй камандай Дэпартамента дзяржаўнай эфектыўнасці. Мы будзем выяўляць і расследаваць марнатраўства, карупцыю і цалкам бескарысную дзейнасць федэральных органаў улады», — заявіла Грын амерыканскаму тэлеканалу Fox News.
Тэлеканал са спасылкай на ўласныя крыніцы адзначае, што Марджары Тэйлар Грын узначаліць у DOGE «Падкамітэт па павышэнні дзяржаўнай эфектыўнасці».
Чакаецца, што падкамітэт будзе займацца «выкараненнем марнатраўства, махлярства і злоўжыванняў у федэральным урадзе, а таксама «расследаваць нерацыянальныя выдаткі, рэарганізоўваць федэральныя ведамствы для павышэння іх эфектыўнасці і шукаць рашэнні для ліквідацыі бюракратычнай цяганіны».
Марджары Тэйлар Грын вядомая сваімі скандальнымі заявамі наконт унутранай і міжнароднай палітыкі ЗША, а таксама падтрымкай канспіралагічных тэорый, датычных супернікаў Дональда Трампа.
Так, палітык сцвярджала, што маштабныя лясныя пажары ў Каліфорніі ў 2021 годзе былі справакаваныя «яўрэйскімі касмічнымі лазерамі», якія нібыта кантралююцца сям'ёй Ротшыльдаў. Яшчэ Грын называла экс-прэзідэнта ЗША Барака Абаму і былую кандыдатку ў прэзідэнты Хілары Клінтан «сатанінскімі педафіламі-канібаламі, якія кіруюць таемным урадам, супраць якога змагаецца Дональд Трамп».
Датычна міжнароднай палітыкі, Грын выступае рэзка супраць фінансавай дапамогі замежным краінам, заяўляючы, што «цяжка заробленыя» падаткі амерыканцаў павінны выкарыстоўвацца выключна ўнутры ЗША.
Кангрэсвумен рэгулярна галасавала супраць грашовай дапамогі Украіне, абгрунтоўваючы гэта тым, што краіна не з'яўляецца саюзнікам ЗША і членам НАТА (пры гэтым палітык выступае супраць прыёму Украіны ў альянс, а да гэтага галасавала супраць пашырэння блока за кошт Фінляндыі і Швецыі).
У сакавіку 2022 года Марджары Тэйлар Грын казала, што Украіна сама «падштурхнула мядзведзя» да агрэсіі, здымаючы тым самым адказнасць з Расіі за пачатак вайны.
Крамлёўская прапаганда ўжо некалькі гадоў актыўна выкарыстоўвае заявы Грын для падтрымання і распаўсюджвання ўласных наратываў. Напрыклад, у красавіку 2024 года тэлеканал CNN заўважыў, што расійскія медыя горача віталі спробы Грын сарваць законапраекты аб вайсковай і эканамічнай дапамозе Украіне.
Такія паводзіны Грын даўно выклікаюць гарачыя спрэчкі ў ЗША: крытыкі абвінавачваюць жанчыну ў рэтрансляцыі ідэй расійскай прапаганды, у той час як яе прыхільнікі сцвярджаюць, што яна «ўсяго толькі абараняе інтарэсы Амерыкі».
У кожным разе, прызначэнне Марджары Тэйлар Грын у DOGE дасць ёй магчымасць рэгуляваць амерыканскія грашовыя выдаткі на Украіну, у тым ліку тармазіць ці спыняць іх.
Каментары